Lamentaciones 1
1
Nab'e o'ej
1¡Lik tz'inilik xkanaj kan i nim laj tinimit,
chi ujer lik nojnaq te'eq uwach che i winaq!
¡I tinimit chi mas o te'eq u'ij wo'or xkanajik pacha jun malkan!
¡Xaq lik o chuqul u'anik i k'ax laj taq chak kumal jub'an chik tinimit
chi ujer xrajawin te'eq ire pkiwi!
2Are cha'ab' i Jerusalén chi pacha jun ixoq, kji' rumal uwa'al uwach man lik ksiqsat rumal o'ej;
xaq uwa'al uwach le lik klememik kqaj chupalaj.
Chkixol konojel ni'pa taq i kkib'ij chi k'ax taq kkina'o,
lik nti jun chke kyu'uw uxikin.
Konojel i ramiy lik xa xki'an keb' kipalaj che kib' chrij;
lik xa xe'on ajch'oj chrij.
3Lik mas uyej xaq lik mas k'ax laj taq chak,
kutij i tinimit Judá wo'or man chaptalik.
Ujer lik xrajawin te'eq chkixol i jalajuj taq tinimit,
xwiri wo'or lik kuriq ti uxlanem.
Konojel i kiterb'em te'eq,
xekimaja i wo'or lik kiya'om pa k'ax.
4¡Lik nim laj b'is u'anom i pa taq b'e re i tinimit Sion!
¡Lik mijun kk'un pa taq nima'ij!
I uchija re i nim laj tinimit lik je tz'inilik,
i ajsujul sipon chwach i Ajwal lik keo'ik,
i altom keb'isonik
xaq i Jerusalén lik kutij k'ax.
5I ajch'oj chrij lik kkiqajsaj u'ij,
i tzel keilawik lik ke'el chisaq.
Man i Ajwal u'anom che chi kb'isonik
rumal uk'iyal umak chi u'anom.
I je rak'al xe'elsax b'i pa cho'ab' chwach kulew
man xek'am b'i rumal i ajch'oj chkij.
6Lik xsach uwach uchomal i tinimit Sion,
lik qatzij xsach ronojel uchomal;
i kaj-atzil, pacha taq je kej,
kkitzukuj kik'im;
lik kicharerem kaqan, je nab'e
chkiwach i ke'oqtawik.
7I tinimit Jerusalén kk'un chuk'ux i ij re ujer,
are xkanaj kan utukel xaq lik pa b'is;
lik kk'un chuk'ux ronojel ub'eyomal chi o te'eq
ru' ujer;
kk'un chuk'ux are xtzaq pu'ab' i ajch'oj chrij,
are lik mijun xk'un chuto'ik,
xaq are x-il kumal i ajch'oj chrij,
lik xa xkitze'ej utzaqik pa k'ax.
8I tinimit Jerusalén lik k'i umak u'anom,
lik u'anom che rib' chi nti u'ij.
I kekojow te u'ij ujer wo'or xa kkik'aq b'i u'ij,
man lik xkilo chi xtzaqik.
Rumali lik ko'ik,
xaq lik rumal uk'ix are uchel rij kuya'o.
9U'u' lik o ch'am taj che;
xuch'ob' taj wach i utz taj kel ru'.
Lik b'isb'al uch'ob'ik wach utzaqik;
lik mijun kyu'uw uxikin.
¡Chawila pe, Ajwal, i uqajsaxik in-iji
xaq chawila wach taq ukojik u'ij ku'an i ajch'oj chwij!
10I ajch'oj lik u'anom
re che i b'eyomal pa tinimit Jerusalén.
I tinimit lik xeril i winaq chi kkikoj ki'ij i jub'an chik dios,
lik ko kiwach xe'ok b'i pa lo'laj k'ijib'al re i Ajwal,
¡Ajwal, yet xab'ij chi kawaj taj chi ke'ok b'i winaq le
pa wachoch re molb'al ib'!
11Konojel i uwinaq lik ke'o'ik,
xaq lik ketijin chutzukuxik wach kkitijo;
xkiya kib'eyomal chwach i kiwa re kkitijo
re kek'asi na.
¡Ajwal, chawila pe intzaqik puyej!
¡Chawila tob'al inwach chupam i k'ax chi in o wi!
12¡Yix, chi kixtijin che i b'e,
chixtak'al chuch'ob'ik we o i k'ax
pacha i we yin,
chi lik ku'an k'ax chwe!
¡I Ajwal xutaq li k'axi pinwi,
are lik xpe roywal!
13I Ajwal lik k'a naj chikaj
xutaq li a' chi lik xuk'at b'i inb'aqil;
xukoj jun tzaqsab'al pinb'e
xaq xu'an chwe chi xintzalij chik chwij;
xaq xinro'taj,
lik arewi kintij uyej.
14I Ajwal lik rilom inmak;
lik inximom wib' rumal inmak le,
pacha taq jun yuku chi lik al o pinwi:
¡Lik kuk'is b'i incho'ab'!
I Ajwal in uya'om pki'ab' i winaq
chi lik kinch'ij ti chik olem ku'.
15I Ajwal xeresaj b'i naj chinwach yin
konojel i achiyab' chi lik ko kiwach chi kinkito te'eq.
Lik xeutaq li jub'an achiyab' chi je yij che i ch'oj re kki'an ch'oj chwij,
re kkisachsaj kiwach achiyab' ko kiwach chi je o wu' yin.
¡I Ajwal lik uya'yam u'ij uchomal i tinimit Judá,
pacha uya'yaxik i uva puk'ijib'al are kelsax uwa'al!
16I b'iroxiki lik kki'an chwe chi kino'ik.
Inb'a'wach lik knoj che uwa'al inwach,
man lik mijun kuyu'uj inxikin,
xaq lik mijun kuyak chik ink'ux.
Lik puyej xekanaj wi kan i wak'al,
man i je ajch'oj chqij lik xetiki chqach'akik.
17I tinimit Sion kurip b'i u'ab' re kutz'onoj utob'al,
xwiri lik mijun ktowik.
I Ajwal lik u'anom jun taqanik chi ma Jacob
ksutix ni rij kumal i ajch'oj chrij;
i tinimit Jerusalén chke ike lik keje
pacha jun b'iroxik chi nti uchak.
18I Ajwal xu'ano pacha i kmajawik
rumal xinqel utaqanik.
¡Tinimit iwonojel, chinita,
chiwila tob'al inwach man in o pa b'is!
¡Alab'om xaq altom chi je we yin xek'am b'ik
man keya' ni pa k'ax!
19Xintz'onoj into'ik chke i kkib'ij chi k'ax taq kinkina'o,
xwiri ike xa xki'an keb' che kipalaj wu'.
I je wajsujul sipon xaq i je uwi ujolom i tinimit Jerusalén chi je we yin xekam pa tinimit le:
¡Je enaq te'eq chutzukuxik wach rajwaxik chke re kkitijo man keje ile kek'asi na!
20¡Chawila pe i k'ax chi in o wi, Ajwal!
¡Kinna yin lik kraqkrij uwach ink'ux!
I uk'axk'ol lik ku'utitej i wanima
are kinch'ob'o chi in qelqel laj winaq te'eq.
Jela chisaq i ch'ich' chi k'ulala o uware keukamsaj i wak'al,
xaq waral pa ja lik je o i kekamsaxik.
21I winaq lik kkita i wo'ej,
xwiri lik mijun kyu'uw inxikin.
Konojel i ajch'oj chwij keta'am wach i utz taj chi in o wi,
xaq lik kekikotik chi Yet xat-anawik.
¡Cha'ana chi kk'un i ij chi atzijom,
chi xaq chkik'ulmaj ni ke, keje pacha xink'ulmaj yin!
22Cha'ana chi kupon chawach
ronojel i kimak atzalal chi ki'anom;
cha'ana chke pacha kumaj i kimak
lik pacha a'anom chwe yin,
man lik k'iyal o'ej kin-ano;
¡Lik k'ax chik i wanima!
Currently Selected:
Lamentaciones 1: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
