Josu%E9 6
6
Ch'ob'onik chrij u'anik ch'oj chrij i Jericó
1I winaq aj Jericó xkitz'apij uchija re i okb'al che i tinimit tob'al kib' chkiwach i aj Israel, rumali mijun winaq kok b'ik xaq mijun kel loq. 2Xwiri i Ajwal xub'ij che ma Josué: “Yin injachom chik i Jericó pa'ab', junam ku' i rajch'oj, xaq i rajawinel. 3Yix achiyab' aj Israel chi ix yij che i ch'oj kixb'in ni chrij i tinimit juyak che jun ij, keje ile chi'ana, k'a kitz'aqatsaj ni waqib' ij. 4Je wuqub' ajsujul sipon kkik'am nu b'i jujun rok'a' chij chi antal trompet che, kenab'ej nu b'i chwach i kaxa re utrat i Ajwal. Che i uwuq ij lik keb'in ni wuqmul chrij i tinimit Jericó, tz'aqat i ajsujul sipon kkixut'ij i rok'a' chij chi antal trompet che. 5Yix are kita chi rok'a' chij lik chom xaq junwi ch'awik k-ono, xaq keje uri yix ko chixsik'inoq; are uri i tapial chi sutinnaq chrij i tinimit kwulij na loq. Te'uri suk'ulik chixok b'i yix chu'anik ch'oj chrij i tinimit.”
6Are uri ma Josué chi uk'ojol ma Nun, xeusik'ij i ajsujul sipon, xub'ij chke: “Chik'ama b'i kaxa re utrat i Ajwal xaq wuqub' chiwe chkik'ama b'i rok'a' chij chi antal trompet che, kixnab'ej b'i chwach i kaxa.” 7Xaq xub'ij chke i winaq: “Xaq keje yix chixb'in chrij i tinimit. I achiyab' chi je yij che i ch'oj kenab'ej b'i chwach i kaxa re utrat i Ajwal.”
8Konojel is xki'ano pacha xb'ix chke rumal ma Josué. I wuqub' ajsujul sipon xenab'ej b'i chwach i kaxa re utrat i Ajwal, ketijin chuxut'ixik i wuqub' rok'a' chij chi antal trompet che; i kaxa teren b'i chkij. 9I achiyab' chi je yij che i ch'oj xenab'ej b'i chkiwach i ajsujul sipon chi kexut'iw i rok'a' chij, te'uri jub'an chik achiyab' chi je yij che i ch'oj xeterej b'i chrij i kaxa chajb'al re, tz'aqat i je ajsujul sipon ke'uxlan ti chuxut'ixik i rok'a' chij chi antal trompet che. 10Xwiri ma Josué xub'ij iri chke i achiyab' chi je yij che i ch'oj: Yix mixsik'inik xaq to' mixch'awik, k'a kinb'ij ni chiwe are kixsik'inik.
Umajik i Jericó
11Ma Josué xu'ano chi kaxa re utrat i Ajwal, xusutij rij juyak i tinimit Jericó. Te'uri xetzalij chub'i pa kik'ijib'al, chila xewar wi. 12Chukab' ij, ma Josué we' xwalijik xaq i je ajsujul sipon xkik'am b'i kaxa re utrat i Ajwal. 13I wuqub' ajsujul sipon chi je ok'awnaq i rok'a' chij chi antal trompet che, xenab'ej b'i chwach i kaxa re utrat i Ajwal lik ketijin chuxut'ixik i rok'a' chij; i achiyab' chi je yij che i ch'oj xenab'ej b'i chkiwach i kexut'iw i rok'a' chij le, xaq i jub'an chik achiyab' chi je yij che i ch'oj xeterej b'i chrij i kaxa re utrat i Ajwal, tz'aqat i je ajsujul sipon xkimayij ti uxut'ixik i rok'a' chij chi antal trompet che, 14chukab' ij xeb'in chik juyak chrij i tinimit Jericó, te'uri xetzalij chub'i pa kik'ijib'al. Keje ile xki'an ij ij k'a xtz'aqat ni waqib' ij.
15Che uwuq ij, lik k'a we' xewalijik, te'uri keb'in chik chrij i tinimit pacha kijeqom u'ankil, xwiri che i ij le, lik wuqmul xeb'in chrij i tinimit le. 16Are je o che uwuq b'inik, i ajsujul sipon ko xkixut'ij i rok'a' chij lik x-e uqul xki'an che, are uri ma Josué xub'ij chke i winaq: ¡Chixsik'inoq! Man i Ajwal ujachom chik i tinimit pi'ab'. 17I nim laj tinimit Jericó xaq ronojel ni'pa i o chupam ksach ni uwach rumal i k'oqb'al re i Dios, xwi ati Rahab chi kuch'ak umer chwach uch'akul kk'asi na xaq konojel ni'pa i je o chi rachoch, man ire xeruwaj i keb' achiyab' chi xeqataq li chrilik nim laj tinimiti. 18Yix lik nti to' kiyinya che ni'pa i o kan pa tinimit chi lik sachik uwach re rumal i Ajwal, man keje ile ksach ti iwach yix xaq ktzaq ti k'oqb'al re i Dios pkiwi konojel aj Israel. 19Xwiri i an-o'oj, saq-o'oj xaq i jalajuj taq b'iroxik anch'ich', xaq i to' ch'ich' kajach ni pu'ab' i Ajwal, te'uri kya' ni ru' ub'itaq re Ire.
20 Are uri i je ajsujul sipon ko xkixut'ij i rok'a' chij chi antal trompet che, are xkita i aj Israel xaq ike ko xesik'inik pacha b'ital chke rumal ma Josué, are uri xwulij li tapial nim uwach re itinimit. I aj Israel juntir xe'ok b'i pa tinimit i xki'an ke che. 21Te'uri ru' ch'ich' xekikamsaj achiyab', ixoqib', alab'om, rijab' xaq konojel i b'oyexab', chij, axna xaq konojel lik xekamik.
22Te'uri ma Josué xub'ij chke i je keb' achiyab', chi je uponnaq chutaqexik i tinimit le: Jix chi rachoch ati Rahab chi kuch'ak umer chwach uch'akul, chik'ama loq junam ku' i rachalal chrij pacha isujum che. 23Are uri i keb' achiyab' le, xekesaj li ati Rahab junam ku' uqajaw uchuch, ratz ucha', xaq i rachalal; konojel xekik'am b'i che jun k'ijib'al chi xib'in ib' taj naqaj che i kik'ijib'al i aj Israel. 24Te'uri i aj Israel xkinak' a' che i tinimit le, xaq xkinak' che ronojel ni'pa o chupam, xwi i an-o'oj, saq-o'oj, anch'ich', xaq i ch'ich' xkinak' ti a' che, ronojel ile xya' ru' ub'itaq re i Ajwal prachoch. 25Keje uto'ik uk'aslemal ati Rahab ile xu'an ma Josué man xeruwaj i keb' achiyab' chi xeutaq b'i pa Jericó chutaqexik i tinimit le. Rumali ati Rahab xaq i ralk'uwal xejeqi ku' aj Israel xaq k'a je o ku' wo'or.
26Che taq i ij le ma Josué lik xub'ij i tziji: “Xapachin kujeq chik uyakik i tinimit Jericó le lik chk'oqox ni rumal i Ajwal. Xaq kuk'ulmaj na chi puwi uk'ojol atz kukub'a wi ukub'ib'al i tinimit xaq puwi ni uk'ojol cha'xel kukub'a wi uchija.”
27I Ajwal xro'taj ti ma Josué xaq lik xnimarsax u'ij chila che i ulew le.
Currently Selected:
Josu%E9 6: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
