Jerem%EDas 46
46
Uch'akik i Egipto pa Carquemis
1I Ajwal xch'aw ru' ma Jeremías, chi profeta, chkij i nimaq taq tinimit. 2Iri are utzijonik chkij aj Egipto, xaq chkij i achiyab' chi je yij che i ch'oj re ma faraón Necao, ajawinel re Egipto, chi o te'eq pa Carquemis, chunaqaj raqana Éufrates, chi are ma Nabucodonosor, ajawinel re Babilonia, xuch'ak che ukaj junab' re rajawinik ma Joacim, uk'ojol ma Josías, ajawinel re Judá:
3¡Chiyijb'a i tob'al ib'!
¡Chijeqa i ch'oj!
4¡Cheiwiqa i kaway!
¡Yix chi ix ajrij kaway, chix-anoq!
¡Chikojo i tob'al ijolom xaq chi'ana jun cholaj che iwib'!
¡Chi'ana uware i che' ch'ich' utzam!
¡Xaq chikojo i tob'al iwib'!
5Xwiri ¿Wach i kwilo le?
Xetzalij chkij rumal i nim laj xib'rikil.
I kajch'oj xekicher b'ik man xech'akik;
pa'anem xe'anmajik, lik xetzun ti chkij.
¡Xaipa o i k'ax!
Yin in Ajwal, xinb'iw ile.
6¡Kkich'ij ti anmajik i jub'an chi lik kkich'ij i b'e,
xaq kkich'ij ti uto'ik kib' jub'an chi lik ko kiwach!
Pa moxab', chunaqaj i raqana Éufrates,
kkitakij kaqan xaq ketzaqik.
7¿Pachin ile chi knimarik pacha i raqana Nilo,
pacha jun raqana chi lik ko kjuk'uk'ik?
8Are i tinimit Egipto, chi knimarik pacha i raqana Nilo,
pacha jun raqana chi lik ko kjuk'uk'ik.
I tinimit Egipto kub'ij: “Kinnimarik xaq kinch'uq ni uwach ulew,
kinsach ni kiwach i tinimit xaq kiwinaq.”
9¡Lik chkich'ija b'e i kaway!
¡Chkiwach i ch'ich'!
¡Chkich'ija b'e i achiyab' chi ko kiwach chi je yij che i ch'oj;
i achiyab' chi je yij che i ch'oj re Etiopía xaq aj Put,
chi kiwiqom kib' ru' i tob'al ib';
i achiyab' chi je yij che i ch'oj aj Lud,
chi lik kkiriq uk'aqik i ch'ab'!
10Iri are u'ij i Ajwal chi ronojel ktiki che,
i iji are ku'anb'ej uk'exel i utz taj chke i rajch'oj chrij.
I ch'ich' chi k'ulala o uware o pu'ab' i Ajwal i ku'an ni sokonik chke konojel ni'pa i keuriqo,
lik k'a ko'on ni kaq rumal i uk'iyal kik'.
Rumali i Ajwal chi ronojel ktiki che ku'an jun nim laj kamik
che i tinimit moxab' chunaqaj i raqana Éufrates.
11¡Tinimit Egipto,
jat k'a pa Galaad chutzukuxik kunb'al!
¡Xwiri tupu lik k'i kunb'al katijo,
lik nti kuchakuj uri chawe,
lik nti chik kunb'al kmajaw chawe yet!
12I nimaq taq tinimit keta'am chik chi qajnaq chik a'ij,
chi xaq chwach ronojel i jyub' ta'aj ktataj asik';
Lik ketzaq i ajch'oj pa taq ulew are kkik'ulaj kib' chu'anik i ch'oj,
junam na kkib'alk'atij kib' pa taq ulew.
I u'anik ch'oj re ma Nabucodonosor pa tinimit Egipto
13I Ajwal xch'aw ru' i profeta chi ma Jeremías are ma Nabucodonosor, ajawinel re Babilonia, are enam te'eq re chu'anik ch'oj pa tinimit Egipto:
14Chitzijoj pa Egipto,
pa Migdol, pa Menfis xaq pa tinimit Tafnes:
¡Lik chitatb'ej, lik chiyijb'a iwib'!
¡Man i je o chqij chqawach kkitij ni i ch'ich' chi k'ulala o uware!
15¿B'uchak x-anmaj b'i a Apis, chi are a-toro chi o u'ij?
¿B'uchak xuch'ij ti tak'alem?
Man Yin in Ajwal, xintzaqsaj b'ik.
16I achiyab' chi je yij che i ch'oj chi je awe yet, kkitakij b'i kaqan xaq ketzaq b'ik,
kkib'ij ni uri chkiwach:
¡Jo', chojel chi, jo' pa qulew
che i tinimit ipa xojalax wi!
¡Choj-anmaj chwach i ch'oj xaq i kamik!
17I ajawinel re Egipto, chiya pub'i chi tzij taj:
“Chi lik k'i taq kub'ij, xwiri ku'an taj”.
18Yin, chi in ajawinel
xaq inb'i Ajwal, chi ronojel kintiki che,
lik kinsaqij pink'aslemal:
Pacha i jyub' Tabor chi lik mas kwalij chkixol i jub'an chik jyub',
xaq pacha i jyub' Carmelo chi kwalij puwi i mar,
keje uk'unik i ajch'oj ile.
19Lik chiyijb'a iwib' che i elik b'ik pa cho'ab' chwach iwulew,
winaq re Egipto,
man i Menfis k-on pacha tz'inilik jyub',
chi lik ronojel wulijnaq xaq lik mijun kjeqi chik chwach.
20I tinimit Egipto keje pacha jun chom laj b'akil,
xwiri kk'un uch'opixik rumal jun iskatz re pa moxab'.
21I kiwinaq chi je yij che i ch'oj je aj naj chi je moktalik
je keje pacha taq torib' chi je ti'ojab',
xwiri ike le ke'anmaj pa'anem
man nti chik kicho'ab',
man kupon i ij re ksachsax kiwach,
xaq u'oril utojb'alil kimak.
22I tinimit Egipto kxub'anik k-anmaj na pacha jun kumatz,
are ketejeb' i achiyab' chi je yij che i ch'oj
re kkikamsaj ru' ikaj,
pacha taq uk'atzixik i che'.
23¡Kkik'atzij ni pim laj kik'achelaj!
Yin in Ajwal kinb'iw ile.
Lik mas je k'i te'eq chkiwach i sak',
xaq mijun xtiki chkajlaxik.
24I tinimit Egipto kqajsax ni u'ij,
xaq ktzaq ni pu'ab' i tinimit aj pa moxab'.
25I Ajwal, chi ronojel ktiki che, chi ki-Dios aj Israel, kub'ij: Kinya utojb'alil che ma Amón chi ki-dios aj Tebas, xaq chke aj Egipto ru' ki-dios xaq ru' kajawinelab', xaq che ma faraón xaq chke i jub'an chi lik kul kik'ux che ire. 26Kin-an ni chke chi ketzaq pki'ab' i je ajch'oj chkij, ma Nabucodonosor ajawinel re Babilonia, xaq i uwinaq kekamsaxik. Xwiri che jun jo'taj tan, i Egipto kjeqi chik pacha u'onom te'eq ujer. Yin in Ajwal, xinb'iw ile.
I Ajwal kuto ni utinimit
27Maxij awib' tinimit re ma Jacob, wajtaqon;
maxij taq awib', tinimit Israel.
Man yet xaq i awalk'uwal kixwesaj ni
che i tinimit naj ipa ix k'amtal wi b'ik.
Man katk'iji chik pa chomb'al ib',
lik utz katk'iji na, lik mijun katuxib'ij.
28Yin in Ajwal, kinb'ij:
Maxij taq awib' tinimit re ma Jacob, wajtaqon,
man Yin in o awu'.
Kinsachsaj ni kiwach konojel i nimaq taq tinimit,
chkixol ipa xatinkichersaj wi b'ik.
Xwiri yet kinsachsaj ti awach;
xwi kinsuk'b'a ak'aslemal pacha kmajaw chawe;
ru' utojb'alil.
Currently Selected:
Jerem%EDas 46: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
