Jerem%EDas 27
27
Anik k'utb'al re i yuku
1Che ukaj junab' re urajawinik ma Sedequías, chi uk'ojol ma Josías pa Judá, i Ajwal xlapan ru' ma Jeremías, 2xub'ij che: Cha'ana jub'an kolob' xaq jun yuku, te'uri chaxima ronojel rij aqul. 3Chrijil chik ile chataqa b'i jun tzij chke i ajawinelab' pa Edom, pa Moab, pa Amón, pa Tiro xaq pa Sidón, chkij i ajb'il tzij chi je k'unnaq pa Jerusalén chusolixik i ajawinel ma Sedequías. 4Cheataqa chub'ixkil chke ni'pa je o pkiwi, chi yin in Ajwal chi ronojel kintiki che, chi ki-Dios aj Israel, kinb'ij: 5Ru' nim laj incho'ab' xin-an i jyub' ta'aj, ni'pa i winaq xaq i chikop chi je o chwach, xaq kinya che i jun pachin che kwaj kinya wi. 6B'ay, yin inya'om ronojel ni'pa ulew pu'ab' wajpatan ma Nabucodonosor, ajawinel re i tinimit Babilonia, xaq je inya'om ne ni'pa chikop aj pa taq es pu'ab'. 7Konojel ni'pa i nimaq taq tinimit lik kek'iji ni pu'ab' ire, pu'ab' rak'al xaq pu'ab' i ri umam k'a kuriqa ni ij chi i nim laj utinimit ire le kk'iji ni pki'ab' i nimaq taq tinimit xaq nimaq taq ajawinelab'. 8We o jujun nimaq taq tinimit xaq we ajawinelab' chi kkiya ti kib' pu'ab' ma Nabucodonosor, Yin kinya ni utojb'alil pkiwi, ru' nimaq taq ch'oj, ru' wa'jal xaq ru' itzel laj taq yob'il, k'a kekanaj ni konojel pu'ab'. Yin in Ajwal, xinb'iw ile.
9Rumali yix mikoj retalil chke i profeta, chke ajnanel xaq chke ni'pa kkisaqij wach ke'el usuk' i achik', xaq mitene chke je aj-itz, chi kkaj kkib'ij wach kuk'ulmaj k-on panoq, chi xaq kkib'ij taq chiwe utz taj kiya iwib' pu'ab' i ajawinel re i tinimit Babilonia. 10Ile chi kb'ix chiwe qatzij taj xa nuk'um tzij, are i kich'ak yix che ile, chi kixelsax b'i che iwulew, xaq yin kixinkichersaj nu b'ik, xaq kixkam na. 11Xwiri i jun nim laj tinimit chi kuya rib' pu'ab' i ajawinel aj pa Babilonia, yin kinya ni che chi kkanaj kan chwach rulew, re kjeqi ni chwach xaq kutik ni uwach. Yin in Ajwal, xinb'iw ile.
12Yin, chi in ma Jeremías, xinkamulij ub'ixkil ronojel iri che ma Sedequías, chi ajawinel re i tinimit Judá, xaq xinb'ij che: “Chiya iwib' pu'ab' i ajawinel re i tinimit Babilonia, xaq pu'ab' utinimit, keje ile kixk'asi na. 13Lik nti puwi katkam yet, xaq i atinimit rumal i nim laj ch'oj, rumal i wa'jal xaq rumal itzel laj taq yob'il. Man i Ajwal ub'im chi ile kuk'ulmaj ni nim laj tinimit chi kuya ti rib' pu'ab' i ajawinel aj Babilonia. 14Mikoj taq retalil chke i profeta le chi kixkitunu re kiya ti iwib' pu'ab' i ajawinel aj pa Babilonia, man ni'pa i kkib'ij chiwe xa nuk'um tzij. 15I Ajwal kub'ij: Ire je utaqom tu b'ik; Ni'pa i tzij chi kkib'ij pub'i i Ajwal le, xa je are ike je nuk'uwnaq. Keje uri ile chi Ajwal pa k'isb'al re kixukichersaj nu b'i yix, lik junam kixkam na.”
16Te'uri xinlapan ku' ajsujul sipon xaq ku' i winaq, xinb'ij chke: Keje iri kub'ij i Ajwal: Mikoj retalil chke i profeta chi kkisaqij chi ya ktzalijsax chali pa Babilonia ronojel ni'pa i jalajuj taq chapb'al prachoch i Dios. Ronojel ile chi kkb'ij chiwe xa nuk'um tzij. 17¡Mikoj taq retalil chke! Chiya iwib' pu'ab' i ajawinel aj pa Babilonia man keje ile kixk'asi na ¿Kiwaj b'a yix chi i tinimit k-on pacha jut'ub'aj ja wulijnaq? 18We lik qatzij je profeta xaq we lik qatzij chi yin in ch'awnaq ku', chkitz'onoji chwe yin, chi in Ajwal chi ronojel kintiki che, chi kek'am tu b'i jalajuj taq chapb'al pa Babilonia chi k'a o prachoch i Ajwal, xaq ni'pa i k'a o pa nim laj rachoch i ajawinel re i tinimit Judá xaq pa tinimit Jerusalén.
19-21I ma Nabucodonosor, ajawinel re i Babilonia, xuk'am b'i ma Jeconías pa Jerusalén, chi uk'ojol ma Joacim, ajawinel re i tinimit Judá, are xtaq b'i pa Babilonia junam ku' i winaq chi nimaq ki'ij re i tinimit Judá xaq i Jerusalén, xuk'am tu b'i raqan ja xaq i nimaq taq k'olb'al ya chi antal ru' i anch'ich', xaq i ukub'ib'al i ja xaq i jalajuj taq chapb'al chila prachoch i Ajwal xaq chrij i jub'an chapb'al chi k'a o chi pa tinimit. I Ajwal chi ronojel ktiki che, chi ki-Dios aj Israel, keje iri kub'ij chrij i chapb'al chi yatal kan prachoch i Ajwal, xaq i jub'an chik chi yatal kan pa nim laj rachoch i ajawinel aj pa Judá xaq i Jerusalén: 22Kekik'am nu b'i pa Babilonia, kekanaj ni chila, k'a kinch'ob' ni yin junpa keink'am chali che i k'ijib'ali. Yin in Ajwal, xinb'iw ile.
Currently Selected:
Jerem%EDas 27: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
