Jerem%EDas 26
26
Ma Jeremías kch'ach'ax ukamsaxik
1Are xujeq ajawinik ma Joacim, chi uk'ojol ma Josías, chila pa Judá, i Ajwal xlapan ru' ma Jeremías, 2xub'ij che: “Chattak'al chwaja re i wachoch, ronojel ni'pa xatintaq chub'ixkil, chab'ij chke i winaq chi kek'un che i tinimit Judá chukojik u'ij i Dios prachoch. Lik maya kan jun tzij, ronojel chab'ij. 3Moqxa kkikoj retalil chawe xaq kkimayij u'anik i utz taj pkik'aslemal, man keje ile yin kinya ti chik uri utojb'alil kimak chke pacha ax inch'ob'om wi te'eq. 4Chab'ij chke chi yin in Ajwal, kinb'inik: We kikoj ti retalil chwe xaq we ki'an taj pacha i k'utunik chi inya'om chiwe, 5xaq we kikoj ti retalil wach b'ital chiwe chuxe'el kumal iwajpatan chi profeta, chi lik k'iyalmul je intaqom b'i iwu' yix xwiri xa xeiqelo, 6kin-an uri che rachoch i Ajwal le pacha xin-an che i jun chila pa Silo. Kin-an ni che i tinimiti chi are pacha jun k'utb'al re i k'oqb'al chke konojel i nimaq taq tinimit chwach i jyub' ta'aj.”
7I je ajsujul sipon, i profeta xaq konojel i winaq xkita i tzij le chi xutzijoj ma Jeremías prachoch i Ajwal. 8Ire are xutzin chub'ixkil ni'pa i taqtal che rumal i Ajwal, i ajsujul sipon, i profeta, xaq konojel i winaq xkichapo xaq xkib'ij che ¡Katkam na! 9¿B'uchak kaxij ti awib' chub'ixkil pub'i i Ajwal chi rachoch i Ajwal kkanaj na pacha i jun chila pa Silo? Chi xaq i tinimit le ksachsax ni uwach xaq lik kkanaj na chi nti chik winaq chwach. Are uri konojel i winaq xkit'ub'ij kib' prachoch i Dios chrij chwach ma Jeremías.
10Ni'pa je aj-atzil re i tinimit Judá are xkita wach i ktijin uk'ulmaxik, xe'el pa nim laj rachoch i ajawinel, xe'e prachoch i Dios, chila xekub'i wi chwach Uchija K'ak'. 11Are uri i ajsujul sipon, xaq i profeta, xkib'ij chke i aj-atzil xaq chke konojel i winaq: “I achi le rajwaxik kkamsaxik, man xub'ij chi kk'oqox i tinimiti, yix lik ru' ixikin xita.”
12I ma Jeremías xlapan ku' i je aj-atzil xaq ku' i winaq, xub'ij chke: “Are i Ajwal xintaqaw li chub'ixkil pub'i ire chi i rachoch i AJWALI xaq i tinimiti kya' ni k'oqb'al pkiwi, ronojel ni'pa xita chi xinb'ij. 13Chi'ana mas utz che ik'aslemal xaq wach ki'ano, chixkojon che i Wajwal Dios, man keje ile kutaq ta li i k'ax laj taq yob'il piwi chi ub'im chiwe. 14Xaq yin in o pi'ab' yix, chi'ana chwe pacha kumaj iwach. 15Xwiri chiwetamaj iri: We kinikamsaj, yix xaq ni'pa i winaq chi je jeqel che i nim laj tinimiti, lik imak uri chi kikamsaj jun chi nti umak, man qatzij are i Ajwal xintaqaw chutzijoxik chiwe ronojel ni'pa i xinb'ij le.”
16Are uri i je aj-atzil xaq i winaq xkib'ij chke i je ajsujul sipon, xaq chke i profeta “Nti puwi kqakamsaj i achi ri, man ni'pa i xub'ij chqe, are i Qajwal Dios b'iwnaq che.”
17O jujun chke unimaqil i tinimit xewalijik xaq xkib'ij chke i winaq chi kimolom kib' chila: 18Che taq i ij re ma Ezequías, chi ajawinel re i tinimit Judá, ma Miqueas aj Moreset xub'ij pub'i i Ajwal chke konojel i winaq aj Judá:
I Ajwal chi ronojel ktiki che, kub'ij:
I tinimit Sion kkanaj na pacha jun ulew re ktuk uwach,
i tinimit Jerusalén k-on na pacha jut'ub'aj ja wulijnaq,
xaq uwi rachoch i Ajwal lik kpe ni es chwach.
19¿Xatab'a i ajawinel ma Ezequías xaq konojel i winaq re tinimit Judá xkikamsaj ma Miqueas? Qatzij taj, i ajawinel lik xuna i xib'rikil chwach i Ajwal, rumali xutz'onoj utzil chi k-il ni tob'al kiwach konojel. Are uri i Ajwal xutaq ta li k'ax laj taq yob'il pkiwi pacha ub'im te'eq. ¿Xatab'a yoj wo'or kqeqaj jun nim laj k'ax?
20Xaq i profeta, chi ma Urías, uk'ojol ma Semaías, chi aj pa nim laj tinimit Quiriat-Jearim, xub'ij pub'i i Ajwal wach i k'oqb'al kpe puwi i tinimit xaq puwi ronojel i ulew, pacha ktijin ma Jeremías chu'anik. 21I ajawinel Joacim, je raqan u'ab' xaq i kaj-atzil xkita wach xub'ij ire, are uri i ajawinel xraj ukamsaxik. Xwiri are xretamaj ma Urías, xuxij rib', x-anmaj b'i pa Egipto. 22I ajawinel ma Joacim xutaq b'i ma Elnatán pa Egipto, chi uk'ojol ma Acbor, xaq i jub'an chik achiyab', 23ike le xkik'am li ma Urías chila pa Egipto, xkijach pu'ab' i ajawinel ma Joacim, are uri ire xutaq ukamsaxik xaq kkik'aq b'i uch'akul chila pa jul ke konojel i kamnaq.
24Xaq ma Ahicam, chi uk'ojol ma Safán, xch'aw chrij ma Jeremías, rumali chi xjachi ti pki'ab' i winaq re kkikamsaj.
Currently Selected:
Jerem%EDas 26: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
