Jerem%EDas 2
2
Kiqelanik aj Israel
1I Ajwal xinu'ijla yin, xaq xub'ij chwe:
2“Jat xaq chatlapan ku' i winaq pa tinimit Jerusalén,
lik chatsik'in chub'ixkil man keje ile katkita.
¡Keje iri kub'ij i Ajwal!
Kk'un chink'ux are k'a at ak'al winaq, lik jikil te'eq ak'ux chwe,
are xin-an wixoqil chawe, lik k'ax te'eq kinana'o
xaq lik xatterej chwij pa tz'inilik jyub' chaqij,
chi are jun ulew chi nti tikon kuya'o.
3Ix aj Israel lik ijachom te'eq iwib' pin-ab',
lik ix are te'eq mas utz chwach ni'pa inmolonik.
We o jun ku'an te'eq jun utz taj chiwe, Yin kinya utojb'alil che
ru' jalajuj taq k'ax.
Yin in Ajwal, xinb'iw ile.”
4Ix umuq uxikin ma Jacob, iwonojel yix chi ix ralk'uwal ma Israel, chita utzij i Ajwal. 5I Ajwal kub'ij chiwe:
¿Wach i utz taj xkiriq iwatit imam chwe ujer,
man xkijek' kib' wu'?
Xeterej chkij i tiox chi lik nti ki'ij,
xaq lik nti xe'el wi ru' ile.
6Lik xkich'ob' ti intzukuxik yin
chi xewesaj li pa Egipto,
chi xink'am b'e chkiwach pa tz'inilik jyub' chaqij,
ulew chi to' chaqij xaq lik to' pa taq siwan,
nti ya chwach, lik xib'in ib',
man nti jun kjeqi chwach xaq lik nti jun to' kb'eyan chwach.
7Yin xixink'am li che i rax laj ulewi,
man kitij i utz chwach
xaq utz laj taq uwach i tikon.
Xwiri yix xixk'unik xa xiqajsaj u'ij i wulew,
xi'an chwe chi xmuluw ink'ux che i nim laj tinimiti
chi lik we yin.
8I je ajsujul sipon xinkitzukuj taj,
ni'pa i ketijow intinimit xketamaj ti inwach,
ni'pa i je aj-atzil xkiyak kib' chu'anik ch'oj chwij,
xaq i profeta xa are xkitzijoj i tiox Baal
xaq xeterej chkij i tiox chi lik nti kkichakuj.
Atb'al tzij chkij aj Israel
9Rumali, Yin in Ajwal kinb'iw:
Kixink'am b'i yix xaq iwi imam chkiwach aj-atol tzij.
Lik keje ile kin-an na.
10Jix che ulew chi o ya chrij chwach puqajb'al ij xaq chik'ama utaqexik;
chitaqa b'i jun winaq pa Cedar man lik kukoj retalil che,
krilb'ej re we uk'ulmam chik ile chila
11we jun nim laj tinimit ajkojol taq ki'ij i tiox, we ya ujalwachim chik u-dios.
¡Ile chi ne te saqil dios!
Xwiri intinimit in ro'tam kan yin, chi in are u'ij uchomal,
kumal taq i tiox chi lik nti kkichakuj.
12¡Kaj, chaxija awib' chwach iri!
¡Chajeqa siksatik rumal axib'rikil!
Yin in Ajwal, xinb'iw ile.
13Intinimit keb' mak atzalal u'anom:
Xinko'taj kan yin
chi in ralaxb'al ya k'aslik,
xaq xki'an kik'otom ike
chi xa tel laj taq k'otom chi kuk'ol ti i ya.
I rok'am li kimak aj Israel
14I Israel je are i winaq chi je nti pa k'ax rumal i rajaw kichak,
ike xealax ti pa k'ax rumal i rajaw kichak.
¿B'uchak uri chi kjok b'i ub'itaq ke?
15¿B'uchak uri ki'an ch'oj chkij pacha taq ix koj,
chi lik ko kixyererik?
Xaq iwulijsam kan i nimaq taq kitinimit,
i nimaq taq kitinimit xnak' a' che
xaq mijun chik xkanajik.
16I winaq re i tinimit Menfis xaq i tinimit Tafnes
lik xkiraqij ajolom.
17Xak'ulmaj ile rumal xinawo'taj kanoq,
yin in Awajwal Dios
chi kwok'aj te'eq b'e chawach.
18Wo'or ¿Wach kach'ak che chi kat-e pa Egipto
chutu'ik i ya re i raqana Nilo?
¿Wach kach'ak che chi kat-e pa Asiria
chutu'ik i ya re i raqana Éufrates?
19Lik are amak kyaw utojb'alil chawe,
are i suk'ul ti laj ak'ux katukamsaj na.
Chach'ob'o ub'e man keje ile kawil uri wach i utz taj
chi xa'ano chi xinawo'taj kanoq
xaq xakoj ti in-ij Yin,
chi in Awajwal Dios.
Yin in Ajwal, chi ronojel kintiki che, xinb'iw ile.
Kiqelanik aj Israel
20Lik ujer tan xayak awib' chu'anik ch'oj chwij,
xawaj ti xatkojon chwe.
Xab'ij: “Kwaj ti u'anik inpatan.”
Puwi ronojel taq jyub' naj uwi
xaq chuxe' ronojel taq che' chi yelyik uxaq
xaq xaya awib' chuch'akik amer chwach ach'akul.
21Yin xatintiko pacha i rutzil laj uva,
pacha i rutzil laj ija re uva.
¡Xwiri lik ayojom chik awib'
chi lik kwetamaj tene chik awach!
22Tupu lik kach'aj taq awib' ru' pu'um chun,
xaq tupu kakoj ronojel i xab'on chi kawaj yet,
xwiri chinwach Yin ksach ti i tz'inik re i mak atzalal chi a'anom.
Yin in Ajwal, xinb'iw ile.
23¿B'uchak uri kab'ij chi: “Intz'itajnaq taj
xaq inkojom ti ki'ij i tiox chi nti ki'ij”?
Chk'un chak'ux wach xa'an chila chwa ta'aj,
lik chakojo retalil ronojel ni'pa i xa'ano,
chi pacha taq ati kamey
chi to' krikikik xaipa k-e wi.
24Pacha taq ati axna chi to' k-e b'i pa taq es,
chi lik kxut'ut tew putzam rumal urayijb'al uch'akul.
Are ketz'anik lik mijun ktiki chuqajsaxik urayijb'al,
we jun ma axna kutzukuj,
lik kkos ti uri chutzukuxik man kuriq che i ij are ketz'anik.
25¡Israel, ma'an k'ax che awaqan che i anem man nti axajab',
maya che paqul kchaqij rumal ak'atik!
Xwiri xab'ij, ntaj, kink'ulmaj ti ile,
yin k'ax kinna i winaq je aj naj, rumali kin-e ku'.
I tinimit Israel kmajawik kya' utojb'alil che
26Keje pacha ili'om chi kk'ix che are knab'tajik,
keje ni kuk'ulmaj i tinimit Israel ile:
Konojel i winaq, ajawinelab', je aj-atzil,
je ajsujul sipon xaq i profeta.
27Kkib'ij che jun che': “Yet at inqajaw,”
xaq kkib'ij che jun ab'aj: “Yet at inchuch.”
Xwiri chwe, yin, kkiya kan uchel kij, are ti kipalaj.
Xwiri xaq k'amo ne kkiriq chwach jun k'ax, kkib'i la chwe:
¡Chatpet chqato'ik!
28Tinimit Judá ¿Ipa je o wi tiox chi xe'ano?
¡Lik je k'i i tiox je o awu' pacha nimaq taq tinimit!
¡Chek'un uri ike ilb'al re we ketiki chawelsaxik che i kamik
are xaqmanal kariqo!
29¿Wach taq kich'ojij yix chwij Yin,
man iwonojel yix lik xi'an qelqel che iwib' chinwach?
Yin in Ajwal, xinb'iw ile.
30Lik nti x-on re chi xinya utojb'alil chke iwak'al yix,
man lik xkita ti ub'e.
Xaq yix lik ix keje pacha itzel laj taq koj,
man xeikamsaj i profeta.
31Xwiri yix, chi ix lemajil che taq i iji,
chitatb'ej utzij i Ajwal;
Israel, ¿Xatab'a in keje yin pacha jun tz'inilik jyub' chaqij chawe yet?
¿In keje b'awa pacha jun ulew chi lik tz'apil uwi rumal i muj?
Intinimit ¿B'uchak kab'ij:
“Lik oj kirtajnaq chik xaq lik kojtzalij ti chik pa'ab'”?
32¿Jun ixoq xatab'a ksach chuk'ux
ni'pa i chomiq taq ab'aj re wiqb'al rib' chi xukojo are xk'uli'ik?
Xwiri yix intinimit
lik ujer tan in sachnaq yin chik'ux.
33¡We are kitzukuxik achiyab' re ka'an urayijb'al ach'akul ku', b'ay ri,
lik aweta'am i b'e!
¡Lik at ati tijonel pa tijonb'al ib' che i utz taj!
34Lik tz'itajnaq ronojel a'u'
rumal kikik'el i winaq nib'a' chi nti kimak,
ke i winaq chi lik nti kimak xariqo.
35Xwiri ru' ti ni'pa i kamik chi xa'ano le, lik k'a kab'ij:
“Lik nti inmak, i Dios ya xik'aw roywal chwe.”
Utzi', man kab'ij chi at makunnaq taj
kin-an jun atb'al tzij chawij.
36¿B'uchak lik katk'achir chkijalwachixik ni'pa kiya'om kiwach awu'?
Xaq i je aj Egipto katko'taj ni atukel,
keje pacha xki'an aj Asiria chawe.
37Xaq kattzalij na li pa Egipto
ru' nim laj k'ixb'alil,
man yin je inxutum ni'pa kiya'om te'eq kik'ux chawe,
xaq lik nti kawechb'ej che chi utz kik'ux awu'.
Currently Selected:
Jerem%EDas 2: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
