Jerem%EDas 13
13
Anik k'utb'al re i suk'ul ti laj kik'aslemal aj Israel
1I Ajwal xub'ij chwe: Jat, jalo'o jun paqb'al apam chi lik lino xaq chaxima xe apam, xwiri mach'enensaj ru' ya. 2Are uri yin xinlo' i paqb'al pamaj pacha xinutaq i Ajwal che, xaq xinxim xe inpam. 3Are uri xch'aw julaj chik i Ajwal chwe xaq xub'ij: 4“Chak'ama i paqb'al pamaj chi xalo'o chi akojom le, jat chi raqana Éufrates, xaq chawuwaj chila chupam jun tartik re i ab'aj.” 5Are uri yin xin-e chi raqana Éufrates, xwuwaj chila, chrij pacha xinutaq i Ajwal che.
6Are lik k'iyal ij ik'awnaq chik, i Ajwal xub'ij chwe: “Jat chi raqana Éufrates chak'ama li paqb'al pamaj chi xatintaq chruwaxik chila.” 7Are uri yin xin-e chi raqana Éufrates, xintzukuj pulew xaq xwesaj li i paqb'al pamaj ipa wuwam wi kanoq, xwiri lik pok'arnaq chik, xaq lik nti chik uchak.
8Are uri i Ajwal xch'aw chik julaj chik chwe, 9xaq xub'ij chwe: Lik keje usachik uwach ukojik ki'ij aj Judá xaq aj Jerusalén ile kin-ano. 10I itzel laj tinimit le, kraj ti kkojon che intaqanik, xaq lik kumayij ti b'uyil chu'anik i utz ti laj urayijb'al uk'ux. Terejnaq chkij i jub'an chik dios, chu'anik upatan xaq chukojik ki'ij. Lik keje pacha i paqb'al pamaj le, chi lik nti chik uchak. 11Keje pacha ku'an jun chi lik ko kub'ajij i paqb'al upam, keje ile in-anom te'eq Yin chke konojel aj Israel xaq chke konojel aj Judá, lik je o te'eq wu', man je intinimit te'eq xaq kkiya retamaxik inb'i, xaq je are te'eq in-ij inchomal. Xwiri lik xekojon ti chwe. Yin chi in Ajwal, xinb'iw ile.
Jun chik anik k'utb'al re utojb'alil re k-on panoq
12Xaq chab'ij chke: I Ajwal chi ki-Dios aj Israel kub'ij: “Xab'i chi xar knoj che i uwa'al uva muqb'am.” I aj Israel kkib'ij ni chawe: ¿Xatab'a qeta'am ti ile chi xab'i chi xar knoj che i uwa'al uva muqb'am? 13Are uri yet kala' ni uwach chke: I Ajwal kub'ij: Kein-ab'arsaj konojel ni'pa je jeqel che i nim laj tinimiti, ajawinelab' chi kekub'i pukub'ib'al ma David chi o u'ij, ajsujul sipon, profeta xaq konojel ni'pa je jeqel pa Jerusalén. 14Te'uri keinpaxij na pacha upaxixik i xar, to' chkiwach ike kki'an kib', qajawxelab' ku' kak'al, xaq i chuchxelab' ku' kak'al. Lik kwil ti tob'al kiwach, kinsach ni kiwach, mixat jub'i' kwil tob'al kiwach xaq mixat jub'i' k'ax taq kuna ink'ux. Yin in Ajwal, xinb'iw ile.
Usaqixik i k'ax chke aj Israel
15¡Ix aj Israel, i Ajwal ktijin che i lapanik!
Mi'an nim che iwib', lik chitatb'ej wach kub'ij.
16Chikojo u'ij Iwajwal Dios,
tz'aqat k'amaja kukoj li equm,
man moqxa kitakij taq iwaqan chwi taq jyub' xib'in ib',
tz'aqat k'amaja ku'an tz'intz'ik equm,
are k'amaja ku'an tz'intz'ik muj che,
i yix le saq te'eq iwoy-em.
17Yix we kixkojon taj,
xani'al uri kino'ik rumal u'anik nim che iwib';
lik kturur ni uwa'al inwach,
man kek'am b'i prexil uchij i Ajwal.
Utzijonik i Dios che i Ajawinel
18Chab'ij che ajawinel xaq che i ati ixoq ajawinel:
Chixqaj li pikub'ib'al chi o u'ij, chixkul pulew,
man tzaqnaq li koron
chi kuya te'eq ichomal.
19Ni'pa i tinimit re i Neguev is sutim rij,
lik mijun kya' che kok b'ik.
Konojel ni'pa aj Judá xe'elsax b'i pa cho'ab' chwach kulew,
lik konojel xe'elsax b'i pa cho'ab' chwach i kulew.
20Chixtaqen b'i naj xaq chiwila pe
wach kik'unik i je ajch'oj chiwij chila pa moxab'.
¿Ipa je o wi i jalajuj taq chij chi kul ink'ux yin chke xaq je inya'om pa'ab',
i jalajuj taq chij le are te'eq keyaw a'ij?
Utzijoxik kelsaxik b'i aj Israel chwach kulew
21¿Jerusalén, wach chik kab'ij
are katrajawix kumal i winaq chi yet xeatijoj?
Lik kpe ni k'ax pawi
pacha uk'axk'ol chi kutij jun ixoq ru' utujanik.
22Xaq we katz'onoj b'uchak kak'ulmaj ile,
rajwaxik kawetamaj chi rumal i nim laj mak atzalal a'anom.
¡Rumali at kich'anb'am
xaq xkimin kib' awu' pa cho'ab'!
23¿Ktiki wa jun aj Etiopía chujalwachixik utzunb'al?
¿Ktiki wa jun b'alam chrelsaxik i k'ob'k'ob' che utzunb'al rij?
Xaq keje yix ile chi uk'amom rib' chiwe ki'an i utz taj,
kixtiki ti chu'anik i utz.
24Rumali kinjachersaj b'i iwach yix
pacha i k'im chi kyak b'i rumal i tew pa tz'inilik jyub' chaqij.
25Are ak'aslemal ile, Israel,
are kmajaw ile chi kin-an Yin chawe.
Yin in Ajwal kinb'iw ile.
Man xinsach chak'ux,
xaq xaya ak'ux chke i tiox chi nti ki'ij.
26Xaq yin lik katinch'anb'a na xaq lik katinya ni pa nim laj k'ixb'alil.
27Lik wilom i utz ti laj urayijb'al ak'ux xaq wilom uminik awib' ru' jun chi at k'ulinaq ti ru'
xaq i ch'am ti laj ak'aslemal re uch'akik amer chwach ach'akul,
xaqmanal taq xa'an
chwi taq loma, xaq pa taq es.
¡Lik to' awach yet Jerusalén!
¿Ni'pa nawi chik ij kach'ij keje ile chi at ch'am taj?
Currently Selected:
Jerem%EDas 13: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
