Isa%EDas 65
65
Ukojik kimak i je qelqel
1I Ajwal kub'ij:
Ni'pa nti kitz'onom chwe
are xetejeb' wu';
ni'pa lik in kitzukum taj
je are xinkiriqo.
Che jun tinimit chi in ukuxtam taj xaq in unatam taj
xinb'ij wi: Riy in oliki.
2Lik jun ij inripom b'i in-ab'
k'amb'al uwach jun tinimit chi je qelqel,
chi enam te'eq ke che jun utz ti laj b'e,
je teren chrij i kib'uyil.
3Jun tinimit chi lik chinpalaj
arewi kki'an k'ax chwe ru' i wach kki'ano,
xaq kkisujuj kisipon chkiwach i dios pa tikb'al kotz'ij
chi xaq kkik'at i pom puwi i sujb'al sipon chi antal ru' natril.
4Chi kkub'i xol taq kamnaq,
xaq lik a'ab' kk'iji che i k'ijib'al pa taq latz',
kutij ti'ij aq,
xaq kunojsaj ub'oj che uwa'al taq b'iroxik chi ch'am taj.
5Kub'ij: “Chat-ol chila, mattejeb' li wu',
man lik o in-ij, utz taj chi kinachapo.
I winaq le je keje pacha i a' chi lik jun ij kjuluwik;
lik ku'an k'ax chwe pacha i sib' are kok pintzam.”
6Xwiri ronojel ile lik tz'ib'tal chinwach yin,
xaq lik to' ti kintz'ulej in-ab' chutaqexik;
kinya ni utojb'alil chke,
7ronojel ni'pa i kimak ike
xaq ni'pa i kimak kiqajaw kichuch.
Ike kkiporoj pom puwi i jyub',
xaq kki'an k'ax chwe ru' wach i kki'ano chwi taq loma.
Nab'e kinch'ob' ni uk'iyal kimak, te'uri kinya utojb'alil chke.
Are i Ajwal xb'iw ile.
I Ajwal kusujuj i utzil chomal
8I Ajwal kub'ij:
“I uva are lik k'i uwa'al
i winaq to' ti kki'an k'ax che,
man kkesaj uri k'i uwa'al uva muqb'am che.
Xaq keje ile kin-an yin rumal i k'axnab'al ink'ux chke i wajpatanib':
Kinsachsaj ti uwach ronojel i nim laj tinimit.
9Kin-an na chi ma Jacob kepe ni umuq uxikin,
xaq je o ni winaq pa tinimit Judá chi kejeqi ni chwi nimaq taq injyub'.
Ni'pa i je in-ulum kejeqi ni chwach ulew,
i wajpatanib' kejeqi ni chila.
10I uwa ta'aj Sarón knoj ni chke i chij,
xaq che uwa ta'aj Acor ke'esan ni i chikop
chi re ni i tinimit chi kinutzukuj.
11Xwiri yix chi kijek' iwib' ru' i Ajwal
xaq ksach i lo'laj injyub' chik'ux,
chi kisujuj i ti'b'alil xaq i uwa'al uva muqb'am
che tiox Gad xaq i Mení chi are u-diosil i b'eyomal,
12xwiri lik utz ti kik'ulmaj ru' i le:
Kin-an ni chiwe chi kixkam ru' uware ch'ich'.
Man yin xixinsik'ij xwiri yix xixpe taj;
xinch'aw chiwe xwiri yix xinitatb'ej taj;
xi'ano ni'pa kwaj ti yin,
are xi'ulu ni'pa tzel kwil yin.”
13Rumali, i Ajwal kub'ij:
I wajpatanib' o ni wach kkitijo
xwiri yix kitij ni numik;
ike o ni wach kkitu'u xwiri yix kitij ni k'atik;
ike kekikot na
xwiri yix lik ktze'ex ni ipalaj;
14ike keb'ixan ni ru' kikotemal,
rumal ukikotik kik'ux,
xwiri yix kixsik'in na xaq kixo' ni
rumal i b'is xaq i uyej.
15Ni'pa i je in-ulum kkichapb'ej ni ib'i yix,
re k'oqb'al ke xaq urayixik i kamik pkiwi i jub'an chik,
xwiri i wajpatanib' kinjalwachij ni kib'i.
16Xapachin jun aj pa tinimit kutz'onoj utzil chomal,
lik che ni i saqil laj Dios kutz'onoj wi;
xaq xapachin jun aj pa tinimit are ku'an jun kuxtanik puwi utzij,
lik are ni ub'i i saqil laj Dios kukuxtaj puwi utzij.
Ni'pa i uyej re ujer lik sachnaq chik chink'ux,
lik xesach chinwach.
17Chiwila pe', yin kinnojij u'anik
jun k'ak' kaj xaq jun k'ak' ulew.
Ni'pa ik'awnaq chik lik kkuxtax ti chik,
mijun kk'un chik ile chuk'ux.
18Lik chiqusij xaq chixkikotoq ronojel ij saq,
rumal wach kinnojij u'anik yin,
man kinnojij u'anik jun chom laj tinimit Jerusalén,
xaq i winaq chi lik kekikot che i jeqelem chupam.
19Lik kinkikot yin che i tinimit Jerusalén,
xaq lik kinna ni i kikotemal rumal intinimit.
Chupam i tinimit le lik ktataj ti chik o'ej
mitene i sik' re uyej.
20Chila nti ak'alab' chi we' kekamik
xaq nti rijab' we lik kerijab' taj.
Jun chi kkamik o jo'winaq (100) junab' che lik k'a ak'al uri kkamik,
xaq i jun chi kupon ti che i jo'winaq (100) junab' xa k'oqtal uri.
21I winaq kkiyak ni kachoch xaq kejeqi ni chupam,
kkitik ni uva chwach xaq kkitij ni uwach.
22Kuk'ulmaj ti uri chi jun ku'an i ja xaq jun chik kjeqi chupam,
xaq we jun ktikanik, i jun chik ktijaw uwach i tikon.
Intinimit lik naj na kek'asi'ik, pacha uk'aslemal jun che';
ni'pa i je in-ulum lik kkiqusij ni uwach i kichak.
23To' ti ksach uwach kichak chi kki'ano,
xaq nti kak'al kekam chuxe'el ij re kikamik,
man ike je kimuq kixikin
i jub'an chi yatal utzil chomal pkiwi rumal i Ajwal,
xaq kya' ni utzil chomal pkiwi kimuq kixikin le.
24Chuxe'el insik'ixik kumal,
yin kinla' ni uwach chke,
are k'amaja keutzin chub'ixkil
yin lik intom chik wach kkib'ij.
25I utiw xaq i chij junam na kewa'ik,
i koj kutij ni i k'im pacha ku'an i b'oyex,
xaq i kumatz kutzuq ni rib' che i ulew.
Che ronojel i lo'laj injyub',
lik mijun ku'an taq jun k'ax.
Are i Ajwal xb'iw ile.
Currently Selected:
Isa%EDas 65: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
