Isa%EDas 63
63
I Dios kuya utojb'alil pkiwi i je ajch'oj chrij
1—¿Pachin taq ile chi upetik pa Bosra chi are unimal tinimit re Edom,
chi kaq ktzun u'u',
chi lik chom uwiqik rib' u'anom,
chi xaq are kb'inik lik ktatajik chi lik o ucho'ab'?
—Yin ile chi kintzijoj i ch'akanik che i ch'oj,
xaq lik o incho'ab' re i tonik.
2¿Xaq b'uchak kaq a'u' akojom
pacha taq apuch'um i uva ru' awaqan?
3—Qatzij, yin xinpuch' i uva intukel,
mijun xintowik,
lik mi'naq woywal xeinya'ya i je ajch'oj chwij,
lik ru' woywal xin-an tz'ajtz'ik chke,
xaq i kikik'el xkichkrij che in-u',
are uri xutz'ij ronojel in-u'.
4Yin xinch'ob'o chi kuriqa ni jun ij kin-an i suk'ul laj atb'al tzij;
i ya xuriq i ij chi keinkir intinimit.
5Are uri xinok chutaqexik, xwiri lik nti jun kintowik,
lik xinb'isoj chi lik mijun kintowik.
Inteleb' xuya i ch'akanik re i ch'oj chwe,
xaq i woywal lik are x-anawik chi xinch'ij u'anik ch'oj.
6Lik mi'naq woywal xin-an tz'ajtz'ik chke i nimaq taq tinimit,
xinchup kiwach ru' nim laj woywal
xaq xin-an chke chi lik x-e lemem kikik'el chwach ulew.
Rutzil uk'ux i Dios chke aj Israel
7Yin kwaj kinlapan chrij k'axnab'al uk'ux i Ajwal,
xaq ub'ixaxik ub'ix
rumal ronojel ni'pa u'anom ire chqe yoj,
rumal i nim laj rutzil uk'ux chke i kalk'uwal aj Israel,
rumal wach u'anom ru' i rutzil uk'ux
xaq i nim laj k'axnab'al uk'ux.
8Ire xub'ij: “Ike le je intinimit,
alk'uwalxelab' chi lik kinkik'ayij ti chke i je ajch'oj chwij.”
Xaq ire are i Tol ke
9che ronojel ni'pa i k'ax chi xkitijo.
Are ti jun kitaqom b'i ike xetowik,
lik are i Ajwal xupon chkito'ik.
Are ire xeukiro rumal i k'axnab'al uk'ux xaq i rutzil uk'ux,
xeuyako xaq xeu'aluj. Lik arewi keje ile u'anom.
10Xwiri ike xkiyak kib' chu'anik ch'oj chrij i Ajwal
xaq xki'an k'ax che uch'amil i Dios ru' tzij,
rumali xu'an che rib'
chi ajch'oj chkij
xaq xu'an jun nim laj ch'oj ku'.
11Ike xk'un i ij chkik'ux re ujer,
che taq i ij re ma Moisés chi xeukir utinimit,
xaq kkitz'onoj chkiwach:
¿Ipa o wi i Dios chi xuto ma Moisés chila Nilo,
chi are ajyu'ul uchij?
“¿Ipa o wi i jun chi xuya i lo'laj utewal puk'ux ma Moisés,
12chi xu'ano chi i chom laj ucho'ab'
xrachnimaj ma Moisés,
chi xujaq upam i mar chkiwach utinimit
re riqb'al u'ij ronojel ij saq,
13chi xu'an chke chi xeik'aw chupam i mar chi lik xpilkrij ti i kaqan,
pacha taq kaway chi keb'in pa tz'inilik jyub' chaqij
14xaq pacha i chikop chi keqaj li chwa ta'aj?”
I utewal i Ajwal rok'am b'e chkiwach.
Keje kok'axik utinimit ile xu'ano,
xuriq i u'ij xaq etamaxik uwach.
Lapanik ru' i Dios re utz'onoxik i tob'al ib'
15Chawila Ajwal, k'a chila loq chikaj,
¿Ipa at o wi che i lo'laj ak'ijib'al chi lik ch'am xaq chom ipa at jeqel wi?
¿Ipa o wi i nim laj k'axnab'al ak'ux xaq i acho'ab'?
¿Ipa o wi i utz laj ach'ob'onik chqe yoj?
¿Xk'is i rutzil ak'ux chqe yoj?
16¡Yet at qaqajaw!
Tupu mam Abraham kraj ti kojuk'amo,
xaq mitene aj Israel kojk'un ti chkik'ux,
yet, Ajwal, lik at qaqajaw,
lik ax wi at kiranel qe.
17¿B'uchak Ajwal ka'an chqe chi kqo'taj kan ab'e,
xaq ka'an ko che i qak'ux xa re kqaqajsaj a'ij?
Chajalwachij ile rumal i k'axnab'al ak'ux chke awajpatan xaq chke i tzob'aj chi je awe yet.
18¡Lik k'iyal ti ij i lo'laj atinimit x-on rajaw che i nim laj tinimit!
Man i je ajch'oj chqij xkiya'ya awachoch.
19K-anawik pacha taq lik at ajawinaq ti pqawi,
pacha taq lik enaq ti ab'i chqij.
Currently Selected:
Isa%EDas 63: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
