Isa%EDas 60
60
U'ij i k'ak' tinimit Jerusalén
1Chatwalijoq, tinimit Jerusalén, chi apasim awib' chupam awalch'inik,
man xupon asaqil,
xaq i u'ij uchomal i Ajwal kwalch'in pawi.
2I equmal kuch'uq uwach i jyub' ta'aj,
xaq i cha'ab' keupasij i nimaq taq tinimit,
xwiri i Ajwal kwalch'in ni pawi yet
xaq pawi yet kwinaqir wi u'ij uchomal.
3I nimaq taq tinimit kek'un che i saq awe yet,
i ajawinelab' kek'un ni ru' awalch'inik re i asaqirb'al.
4Chayaka apalaj xaq chataqej chawij chawach:
Konojel kkimol kib' xaq kek'un awu' yet.
I je ak'ojol lik naj kepe wi,
xaq i ami'al ke'alux na loq.
5Yet, are keawilo lik katkikot na,
awanima lik kuna ni i nim laj kikotemal;
i tinimit je aj chi taq mar kkik'am na li i b'eyomal chawe,
xaq kkijach ni i b'eyomal le chawe ke i nimaq taq tinimit.
6K'iyal taq tzob'aj kamey kkisutij ni awij,
kipetik pa tinimit Madián, xaq pa tinimit Efa,
kek'un konojel ni'pa i je aj Sabá,
chi keqam li an-o'oj xaq i incienso
xaq kkitzijoj ni ronojel ni'pa i chomiq taq anik re i Ajwal.
7Konojel ni'pa i kichikop aj Cedar ke'on ni awe yet,
ni'pa i ti'ojib' taq chij ke aj Nebaiot ke'ax ni pa'ab'
re kasujuj puwi i sujb'al sipon re i Ajwal,
pacha jun sipon re umuyal uk'ok'al
xaq Ire ku'an na chi lik mas k-on chom i chom laj rachoch.
8¿Je pachin taq ike le chi kesayay chikaj pacha sutz',
chi pacha taq palomax chi ke'e pkisok?
9Ile are jub'an barco chi junam ktijin kik'unik,
ku' i barco chi kepe pa Tarsis chi je nab'e loq,
kok'am i je ak'ojol chi naj kepe wi,
chi kok'am li i an-o'oj xaq i saq-o'oj,
kojb'al u'ij Awajwal, chi Lo'laj Dios ke aj Israel,
chi xu'an chawe nim a'ij.
10Je are i winaq je aj naj keyakaw chik i tapial nim uwach chawe chi wulijnaq,
xaq i kajawinelab' kki'an ni kipatan chawij;
tupu xuya utojb'alil i Ajwal pawi rumal i roywal,
wo'or ru' i rutzil uk'ux rilom tob'al awach.
11I uchija re awachoch lik arewi jaqal na,
lik ktz'api ti chipa'ij chicha'ab',
man keje ile kkik'am na li i b'eyomal chawe ke i nimaq taq tinimit,
xaq ke'ok b'i i ajawinelab' ku' i kachnimanelab'.
12I tinimit chi k-on ti upatan chawij, kkam na;
ronojel ni'pa i nimaq taq tinimit kewulijsax na.
13I Ajwal kub'ij che i tinimit Jerusalén:
I ub'eyomal i Líbano kk'un ni awu' yet:
Chaj, tulul chaj, xaq i k'isis,
re anb'al chom che i wachoch,
yab'al u'ij uchomal i k'ijib'al ipa kintak'b'a wi waqan.
14I je kak'al i winaq chi xki'an k'ax chawe,
lik qajnaq ki'ij kek'un ni chawach,
xaq konojel ni'pa xkik'aq b'i a'ij kexuki ni chawach
xaq kkib'ij ni chawe: “Nim laj Tinimit re i Ajwal”.
“Tinimit Sion re i Lo'laj Dios ke aj Israel”.
15Lik kato'tax ti chik,
tzel ti chik katilik xaq atukel ti chik katk'iji'ik,
yin kin-an ni chawe chi o a'ij ronojel ij saq,
usuk' ile are jun kikotemal chi nti uk'isik.
16I nimaq taq tinimit lik kkiya ni i utz laj taq tijawik re chiwe,
xaq i ajawinelab' kkik'am na li kib'eyomal chawe yet,
xaq kawetamaj na, chi Yin in Ajwal, in tol awe,
Yin nim incho'ab', chi u-Dios ma Jacob, in kirol awe.
17Puk'exel i anch'ich' kinya ni an-o'oj chawe,
puk'exel i ch'ich' kinya ni saq-o'oj,
puk'exel i tz'alam kinya ni anch'ich',
puk'exel ab'aj kinya ni ch'ich'.
Kin-an na chi i chomb'al ib' krajawin ni pawi
xaq i suk'ulik kuk'am ni b'e chawach.
18Pa ronojel awulew ktataj ti chik
u'anik i kamik,
xaq k-ani ti chik sachanik xaq i wulijsanik pa awulew,
are i ka'ano kaya pub'i i tapial nim uwach “Totajik”,
xaq i uchija re awachoch kaya ni pub'i “B'ix”.
19Lik kajwax ti chik chawe chi i ij ku'an saq che i pa'ij,
mitene i ik' ku'an saq che i cha'ab',
man Yin chi in Ajwal, are kinyaw i saq pawi ronojel ij saq,
Yin chi in a-Dios, are kinyaw i walch'inik pawi.
20I ij chi kuya i saq pawi lik ktzaq ti chub'ik,
xaq i ik' arewi kchup ti chik,
man Yin, chi in Ajwal, are kinyaw i saq pawi ronojel ij saq,
ni'pa i ij re ab'is kk'is na.
21Konojel i winaq re atinimit lik ke'on ni suk'ul laj taq winaq,
lik je rajaw ni atinimit ronojel ij saq,
ike je are pacha utux jun tikon chi lik Yin xintikawik,
are jun chak chi in-anom Yin ru' in-ab',
k'utb'al re in-ij inchomal.
22I mo'aji chi lik xa pich' koq, kpax ni uwach pa k'iyal taq lajujwinaq kamo' (1,000),
i je keb' oxib' winaq le lik ke'on ni jun nim laj tinimit.
Yin chi in Ajwal,
kin-an na chi juntir k-antaj ile
pa taq u'ijlal.
Currently Selected:
Isa%EDas 60: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
