Isa%EDas 58
58
I saqil laj umayixik wa'im rumal lapanik ru' i Dios
1I Ajwal xub'ij chwe:
Ko chatsik'inoq, maxij awib',
lik ko chatch'awoq pacha uch'awb'al jun trompeta,
chayaja intinimit rumal umak,
i utinimit ma Jacob rumal umak atzalal.
2Ij ij kinkitzukuj
xaq lik kekikot chretamaxik inb'e,
pacha taq jun tinimit chi ku'an i utz
xaq kuqel ti in-atb'al tzij;
kkitz'onoj i suk'ul laj atb'al tzij chwe
xaq lik kekikotik kki'an taq che kib' i ketejeb' wu'.
3Xwiri kkib'ij:
¿Wach taq uchak kqamayij qawa'im chutz'onoxik che i Dios, chi Ire kril taj?
¿Wach taq uchak kqakoch'ij taq qib', chi Ire kunab'ej taj?
I u'ijlal umayixik wa'im chutz'onoxik che i Dios, yix kik'amo re k'ayinik
xaq re lo'onik, xaq re keiwoqtaj imokom che i chak.
4Che u'ijlal umayixik wa'im chutz'onoxik che i Dios to' kkichap kib' che i tzij, kkichap kib' pa ch'oj,
xaq lik kkichap kib' che i ch'oj pa mo'olem ab'.
Jun ij re umayixik wa'im chutz'onoxik chwe keje ile, ketiki ti che
chi yin kinta i kitz'onb'enik.
5¿Kich'ob' b'awa yix chi umayixik wa'im re i lapanik wu' Yin chi lik kumaj inwach,
are taq uqajik ik'ux rumal i k'ax
xaq ulukb'axik iqul pacha taq jun raxk'am,
xaq ru' ukojik as laj taq i'u' xaq i kotz'olem pa chaj?
Yin kintz'onoj chik chiwe: ¿Are b'a “umayixik wa'im re lapanik wu' Yin ile”,
are b'a jun “ij ile chi kumaj uwach i Ajwal”?
6Are ti ile.
Umayixik wa'im chutz'onoxik chwe Yin chi kumaj inwach are iri:
Are utorik i karena che i jun chi nti umak,
are utorik i won chi ub'ajim i yuku,
are ko'taxik b'i ike chi ki'an k'ax chke,
are uk'isik uwach ronojel ni'pa i utz ti laj u'atik tzij.
7Are rajwaxik chi kaya uwa i jun chi knumik,
are uya'ik uposar i jun chi awachoch chi nti rachoch,
are uya'ik u'u' pachin nti u'u',
are umayixik ti kito'ik konojel ni'pa iwach lo'k'anij.
8We keje ile ki'ano lik kwalch'in uri i saq pik'aslemal pacha i saq re usaqirb'al,
i ni'pa i soktajnaq chawe lik juntir uri kutzirik.
Ni'pa i suk'ulik chi ka'ano lik nab'e ni uri chawach
xaq i in-ij inchomal kterej ni uri chawij.
9Are uri, we kinasik'ij, Yin kinla' uwach chawe,
we katsik'in chutz'onoxik atob'al, Yin kinb'ij ni chawe: “Riy in oliki.”
We kasach uwach u'anik i k'ax chke i winaq,
we nti jun kayo'ya,
xaq we nti tzij kanojij chkij i winaq,
10yet we kaya awib' chuya'ik uwa i jun chi knumik,
we kato i jun chi lik nti chik ucho'ab' xaq kb'isonik rumal nti ni'pa i rajwaxik che,
i saq pak'aslemal lik kwalch'in uri pa equmal,
i aninox kiji ni uri pacha i saq re i tik'il ij.
11Yin arewi kink'am b'e chawach,
lik kinya ni k'iyal taq ti'b'alil chawe pa tz'inilik jyub' chaqij,
kinya ni ucho'ab' ach'akul
xaq at keje na pacha jun tikb'al kotz'ij chi lik ja'talik,
pacha jun ralaxb'al ya chi lik kramtaj ti ya che.
12Atinimit kkiyak chik ronojel ni'pa i wulijnaq ujer
xaq lik kkiya chik ucho'ab' ukub'ib'al i tinimit chi kojtal ujer.
Kya' ni pub'i atinimit:
Ajyijb'al tapial tzaqnaq,
ajyakol ja wulijnaq.
Puwi i ij sábado
13“Chaya u'ij i ij sábado,
matk'ayinik xaq matlo'on che i lo'laj in-ij.
Cha'ana che i ij le chi are jun ij re i kikotemal,
pacha jun ij chi elsam che i Ajwal chi xaq kmajaw che chi kya' u'ij,
chaya u'ij, ma'an taq i rajwaxik awe yet,
xaq mitene katzukuj wach kawaj xaq katok taq chutayik rajil.
14We ka'an ile, kariq uri akikotemal wu',
xaq Yin katink'am b'i che i ch'akanik puwi i nim laj tinimit,
xaq kin-an ni chawe chi kaqusij ni i ub'itaq awe chi xuya aqajaw ma Jacob.”
Lik are i Ajwal xb'iw ile.
Currently Selected:
Isa%EDas 58: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
