G%E1latas 5
5
Elik pu'ab' i ujer atb'al tzij
1I Cristo xojresaj pu'ab' i ujer atb'al tzij, xu'an chqe chi nti chik pqawi; rumali suk'ulik chix-oloq, miya chik iwib' che i ujer atb'al tzij le.
2Chita pe'. Yin in ma Pablo kinb'ij iri chiwe: We yix kiya iwib' chi k-an i circuncisión chiwe, kel uri nti uchak i Cristo chiwe. 3Xaq kinb'ij chik chiwe chi pachin jun kuya rib' chi k-an i circuncisión che pacha ki'anom aj Judío, o chuqul uri ku'an na pacha i kub'ij ujer atb'al tzij re mam Moisés. 4O jujun chiwe yix chi kkich'ob'o chi ke'el utz chwach i Dios xa rumal u'ankil ni'pa i atb'al tzij le. We keje ki'an yix ile, iwo'tam kan uri i Cristo; xaq iwo'tam kan i utzil chomal chi sujtal chiwe rumal i Dios. 5Xwiri yoj oj keje ti ile. Rumal Lo'laj Utewal i Dios, kul qak'ux che chi koj-el utz chwach i Dios xa rumal ukub'ib'al qak'ux che i Cristo. 6Man mantiox che i Jesucristo, nti k-on uri we antal i circuncisión xaq we ntaj. Ru' i ukub'ib'al qak'ux che i Cristo kqaya retamaxik i k'axnab'al k'uxij.
7Yix, utz i'anom te'eq. ¿Pachin x-atiw ile chiwe chi ximayij ukojik i saq laj tzij? ¿Pachin xixtunuwik? 8Are ti Dios x-anaw ile, man are ire ix usik'im ru'. 9Chk'un chik'ux wach k-on i kunb'al re i wa re trigo: “Xa pich' kok ru' i or, xwiri ronojel i or kwalij rumal”. 10Xwiri yin kul ink'ux che i Ajwal chi kich'ob' yix pacha i kinch'ob' yin man xa jun i Ajwal o pqawi. Xwiri i Dios chuya ni pa tojpen pachin ktijin chuyojik inojb'al yix, nti k-ono xapachinaq.
11Ix, wachalal chwach i Cristo, i tzij chi kintijin yin chupaxsaxik are iri: Chi xa rumal ukamik i Cristo chwach i krus o i qelb'al chisaq. Kinb'ij ti chik we o uchak k-an i circuncisión; wetene k'a kinb'ij ile, keje tene kki'an ch'oj i aj Judío chwij. 12Ni'pa i kixkik'achirsaj chukojik chi o uchak k-an i circuncisión chiwe, mas utz su' wetene kkesaj b'i ukowil i kich'akul ike.
I k'axnab'al k'uxij are ronojel i atb'al tzij
13Yix, ix wachalal chwach i Cristo, ix sik'tal rumal i Dios elsab'al iwe pu'ab' i ujer atb'al tzij. Xwiri mich'ob' yix we ix o'tam chu'anik ronojel urayijb'al i nojb'al yix; are taj. Are i rumal ix o'tam, are tob'al ni re iwib' chiwach rumal uk'axnab'al ik'ux. 14K'ax china iwib' chiwach, man ronojel usuk' i ujer atb'al tzij re i mam Moisés keje pacha kel i jun tziji: “K'ax chana alok'anij pacha k'ax una'ik awib' yet ka'ano.”#5.14 I jun tzij le, we at kojonnaq che, xaqjun kel uri pacha at kojonnaq che ronojel i ujer atb'al tzij. Levítico 19.18. 15Yix ut, we to' ch'oj ki'an chiwach, we to' kiraxij iwib' chiwach, xaq we to' kib'i' iwib' chiwach, chi'ana kwent uri, moqxa kisachsaj iwib' chiwach.
I k'aslemal chrij pacha kub'ij i Lo'laj Utewal i Dios
16Are kwaj kinb'ij chiwe are iri: Chiya iwib' pu'ab' i Lo'laj Utewal i Dios, keje ile kiya ti uri iwib' che i rayijb'al yix. 17Man yoj chi oj winaq, lik qe wi chi to' qarayijb'al yoj k-on ch'oj chrij i Lo'laj Utewal i Dios. Xaq i Lo'laj Utewal i Dios k-on ch'oj chrij i to' qarayijb'al yoj. I keb' le kkaj ti kib'; are i kraj Lo'laj Utewal i Dios chi kqa'ano, yoj kqaj taj. Rumali kixtiki ti chu'ankil pacha i kiwaj yix. 18Xwiri we are i Lo'laj Utewal i Dios ok'awnaq iwach, nti uchak uri kixkojon che i ujer atb'al tzij re i mam Moisés.
19Lik k-aljinik wach taq i utz taj kki'an i winaq chi to' je teren chrij i kirayijb'al ike: O i achiyab' kkimin kib' ku' ixoqib' chi kixoqil taj, xaq o i ixoqib' keje ile kki'ano, o i kki'an i ch'am taj ru' i kich'akul, o i kkiya kib' chu'ankil i k'ixb'alil. 20Xaq o i kkikoj ki'ij i tiox chi xaril je antalik, o i ke'e ku' i ajkojol a', ku' i aj-itz, o tzel kkil jun chik, o i je ajch'oj, o i ktitat kipam che i kachi'il we utz u'anom, o i juntir kpe koywal. I je teren chrij i kirayijb'al le, xwi chke ike kkaj i utz, o i kkitzukuj wach i jachb'al kixol kki'ano; xa kkaj kki'an jutaq tzob'aj che kib'. 21Xa kkirayij wach o ru' jun chik, xaq o i je ajkamsanel, o i ke'ab'arik, o i kkiya kib' chu'anik kinima'ij, kkina ti pich' kib' chu'ankil. Keje ile kki'an i winaq chi kkiya kib' chu'anik i to' kirayijb'al ike, xaq o mas kki'an chwach ile. Kinb'ij chik chiwe pacha ax inb'im wi: Ni'pa i kki'an keje ile, nti ke che i ajawinik re i Dios.
22Xwiri ni'pa i kkiya kib' che Lo'laj Utewal i Dios, ire kuya chke chi o uk'axnab'al kik'ux, kikotemal, uchomal kik'ux chkiwach, unimal kik'ux, je utz chke i winaq, kkiya kib' chkito'ik i winaq, xaq je suk'ul laj taq winaq, 23xaq kki'an ti nim che kib', xaq ketiki chu'atixik urayijb'al kich'akul. Ronojel iri are Lo'laj Utewal i Dios kyawik. Ronojel ni'pa i utz le, mijun atb'al tzij k-ataw na. 24Ni'pa i je re chik i Cristo, is ko'tam kan u'ankil pacha taq o pkik'ux i to' winaq; is kikamsam chik kanoq ni'pa i kirayijb'al chi utz taj, xaq i itzel taq nojb'al, ile is elsam chik ucho'ab' chke. 25We i Lo'laj Utewal i Dios uya'om jun qak'aslemal k'ak'; kumaj uri chi kqaya che ire chi ajk'amol qawach.
26Mqa'an nim che qib'; mqa'an taq ile chi xa petsab'al koywal i qachalal; xaq matitat qapam che i qachi'il we o utz petnaq puwi.
Currently Selected:
G%E1latas 5: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
