G%E1latas 4

Oj o ti chik pa k'ax rumal rajaw qachak lik oj alk'uwal

1Are i kwaj kinb'ij ni chiwe, are iri: Jun we kya' kan ub'itaq re rumal uqajaw, xwiri k'amaja ktz'aqat ujunab' rajwaxik kroy-ej na knimarik. Tupu ire rajaw ronojel i ub'itaq re chi yatal che, nti pu'ab' man k'amaja knimarik; ire xaqjun uri pacha to' jun winaq chi o pa k'ax rumal i rajaw ru' ja. 2I alk'uwalxel le o i kechajiw na, xaq keje che i ub'itaq re. Man kk'iji ni pki'ab' i je yatal puwi k'a kuriq ni ij chi ch'iktal rumal uqajaw. 3Xaq yoj, ujer are k'a oj ch'utiq, oj keje te'eq pacha ile. Ujer oj o te'eq pu'ab' jun k'utunik chi tz'aqat taj chi xa re uwach i jyub' ta'aj. 4Xwiri, are xuriq i ij chi ch'iktalik, i Dios xutaq li Uk'ojol chwach i jyub' ta'aj. Xalax che jun ixoq pacha qa'anom yoj; xalaxik lik aj Judío winaq, rumali xukoj i ujer atb'al tzij chi ke aj Judío. 5Ire xk'unik xutojb'ej re i qelb'al chisaq ni'pa i oj o te'eq pu'ab' i ujer atb'al tzij. Keje ile xu'ano man kojuk'ulaj i Dios ru' xaq koju'an rak'al ire. 6Te'uri i Dios xutaq li Utewal uk'ojol pqak'ux, aj-ok'anel qe, k'utb'al re chi oj rak'al chik i Dios. Rumal i Utewal le, kqab'ij: “¡Tat, yet at intat!” 7Keje uri ile, alaj chi at rak'al chik i Dios, yet wo'or at elnaq chik pa k'ax pu'ab' awajaw. We at rak'al chik Ire kuya ni uri chawe ni'pa i uyijb'am chke i rak'al; kya' ni chawe rumal i Dios.

8U'onom loq, are k'amaja iweta'am uwach i Dios, ix o te pki'ab' i b'iroxik chi lik pacha taq je dios xwiri je dios taj. 9Xwiri wo'or chi iweta'am chik i Dios; xwiri lik qatzij are i Dios reta'am chik iwach. We keje ile, ¿B'uchak kiwaj kiya chik iwib' pu'ab' jub'an chik k'utunik chi nti u'ij, chi xaq lik utz taj? ¿B'uchak kiwaj kixok chik pu'ab' ile chi pacha taq ix ajtaqon? 10Yix lik k'a ki'an taq ki'ij, jujun ij chi o taq u'ij chiwach yix, xaq jujun taq ik', jujun taq junab' chi o u'ij. 11¡Lik kink'achirik man kwil yin inchak chixol yix, lik nti xajwax wi chiwe!

Kuxtab'al re jun winaq

12Ix, wachalal chwach i Cristo, lik kintz'onoj utzil chiwe, chi'ana che iwib' pacha yin, man yin in-anom che wib' pacha yix. Man yix, nti jun k'ax i'anom chwe. 13Kk'un chik'ux, are nab'e xinb'ij i utz laj tzij k'ak' re i Dios chiwe, xinkanaj chila iwu' rumal jun yob'il chi o chwe. 14Rumal i yob'il le, k'ax ni uk'utik xin-an chiwe. Xwiri tzel ti xiniwilo rumal ile man lik xinik'ulaj iwu'. Xinik'ulaj iwu' pacha uk'ulaxik jun ángel re i Dios xi'ano, pacha lik are i Jesucristo xik'ulaj iwu'. 15¿Pa xikanaj wi i kikotemal le chi xina'o are in o te'eq iwu'? I k'axnab'al ik'ux yix chwe yin lik alaj te'eq. Che taq i ij le, wetene o rumal, xiwesaj teneri ib'a'wach yix kiya chwe yin, rumal i k'axnab'al ik'ux chwe. 16Wo'or ¿Xatab'a in ajch'oj iwu' yix, xa rumal xinb'ij i saq laj tzij chiwe suk'b'al iwe?

17I winaq chi je k'unnaq iwu' le, ke'anawik pacha taq k'ax kixkina'o; xwiri ru' ti rutzil kik'ux kki'ano, are i kkaj ike kixkesaj chqaxol yoj, anb'al re chiwe chi k'ax keina ike. 18Utz we o i kkaj kixkito, nti k-ono we in o yin iwu', o we ntaj, xwiri chki'ana ni ru' rutzil kik'ux konojel. 19Ix wak'al, lik kink'achir chiwe; in o tan chik pa k'ax iwumal. I k'ax le lik keje pacha i k'ax kutij jun ixoq are kalax jun rak'al. I k'achirik le lik k'a te kik'aw chwe are kixu'an na pacha i Cristo. 20Lik kwaj yin wetene in o iwu' wo'or man kwaj kinch'a'at iwu'; kolo junwi neri jub'i' inch'a'atik chwach iri. Rumali wo'or lik kink'achir iwumal.

I tijojb'al tzij chrij ati Agar xaq i ati Sara

21Yix chi kiwaj kiya iwib' che i atb'al tzij tz'ib'tal kan rumal i mam Moisés, ¿Xatab'a itom ti yix wach usuk' utz'ib'am kan ire? 22Kb'ixik chi mam Abraham xek'iji keb' rak'al je alab'om: Jun xalax ru' ixoq chi xa ajtaqon ru' ja, i jun chik xalax ru' i saqil laj rixoqil chi rajaw ja. 23I rak'al chi xalax ru' i ixoq chi ajtaqon ku', ile to' kirayijb'al ike, rumali i ak'al lik to' winaq xalaxik, xwiri i rak'al ru' i saqil laj rixoqil, ile xalaxik pacha usujum i Dios che i mam Abraham. 24I xinb'ij le chi x-anik, o i kuk'ut chqe. I keb' ixoqib' le kinjunamsaj ru' i keb' trat antal ujer rumal i Dios. I ixoq Agar, chi to' ajtaqon ru' ja, kinjunamsaj ru' i ujer trat chi xu'an i Dios ru' i mam Moisés chila tzam jyub' Sinaí. I trat le are i ujer atb'al tzij tz'ib'tal kan rumal i mam Moisés. Ni'pa i je o pu'ab' i trat le lik pacha je o pu'ab' jun kajaw. 25I ixoq Agar le xinjunamsaj ru' i trat antal tzam jyub' Sinaí chila pa Arabia, chi wo'or ke'eloq are i Jerusalén. Ike je pacha i rak'al i ixoq Agar chi xa ajtaqon ru' ja, man xaq ike je keje pacha i ajtaqon chi je o pu'ab' i kajaw junam ku' i rak'al. 26Xwiri, ixoq Sara xinjunamsaj ru' k'ak' laj tinimit Jerusalén aj chikaj chi are qatinimit yoj chi oj rak'al chik i Dios man oj elnaq chik pu'ab' i ujer atb'al tzij. 27Man are usuk' ile chi tz'ib'tal kan chupam uwuj i Dios ujer. Keje iri kub'ij:

Yet at ixoq chi kat-alan taj, lik chatkikotoq; yet chi nti awak'al, chatsik'in rumal kikotemal.

Yet chi ana'om ti uk'axk'ol ralaxik jun ak'al, chatsik'in ni rumal kikotemal.

Man ixoq chi o'tam kanoq kek'iji ni mas rak'al

chwach ixoq chi o rachijil.#4.27 Keje ile tz'ib'tal kanoq. Isaías 54.1.

28Wachalal chwach i Cristo, yix wo'or ix keje pacha i a Isaac; chi ix alaxnaq pacha ub'im kan i Dios che i mam Abraham. 29Xwiri che taq i ij le are xalax wi i rak'al mam Abraham ru' ati Agar chi rajtaqon, i ak'al xa ku'an ch'oj chrij i a Isaac chi rak'al ati Sara ru' mam Abraham chi are i ak'al xalaxik chi usujum i Dios chke. Wo'or xaq keje kqak'ulmaj yoj ile chi oj rak'al chik i Dios, ike chi k'a kkikoj ujer atb'al tzij tzel kojkilo. 30Xwiri, utz koj-el loq, man chupam uwuj i Dios keje iri kub'ij: “Chawesaj b'i ixoq chi to' ajtaqon ru' ja, xaq i rak'al. Man i rak'al i ixoq le, nti ub'itaq re kya' che rumal uqajaw. Xwi che i jun chi rak'al i ixoq chi saqil laj rixoqil, kya' kan ub'itaq re rumal uqajaw.”#4.30 Keje ile tz'ib'tal kanoq. Génesis 21.10. 31Xaq keje yoj wachalal chwach i Cristo, yoj oj keje pacha i rak'al i saqil laj rixoqil i mam Abraham; oj ti keje pacha i rak'al i ixoq chi to' ajtaqon ru' ja.

Currently Selected:

G%E1latas 4: ACHICUB

Highlight

Compare

Copy