Ezequiel 41
41
1Te'uri i achi xinuk'am chub'i chila chupam i rachoch i Ajwal, xaq xeupaj i aqan: Chkijujunal o keb' xik'ab' che kipimol. 2I uchija o oxib' xik'ab' ru' nik'aj che uwach; i chapb'al re o jun xik'ab' ru' nik'aj che uwach chkijujunal. Te'uri xupaj i upam ja nim pa nik'aj re i ja, i upam o oxlajuj xik'ab' ru' nik'aj che raqan i waqib' xik'ab' ru' nik'aj che uwach. 3Te'uri x-e che i upam ja nim k'a chupam loq xaq xupaj i aqan re i okb'al, chkijujunal o nik'aj xik'ab' che upimol. I okb'al b'ik o keb' xik'ab' che uwach, i aqan chi o pa taq utzal o keb' xik'ab' ru' nik'aj chke upimol. 4Te'uri xupaj i upam ja nim chi o k'a chupam loq, i o waqib' xik'ab' ru' nik'aj chkijujunal utzal. Are uri xub'ij chwe: “Iri lik are i lo'laj k'ijib'al re i Dios.”
I utasaj upam ja yaktal putzal i tapial
5Te'uri i achi xupaj i uwach xan chi lik nim uwach chi o chrij i rachoch i Ajwal chi o keb' xik'ab' che upimol. Chrij chwach i rachoch i Ajwal, xaq chutzal, o tasalaq chi o jun xik'ab' ru' nik'aj che unajtil raqan. 6I tasalaq le ukalem rib' jun o puwi i jun chik, chi ke'eloq oxib' ja ukalem rib', chkijujunal i kale ja o lajuj juwinaq tasaj upam. I tapial re i rachoch i Ajwal mas pich' uwach chkijujunal i kale ja le, i pkiwi aqan le kkik'am kitob'al i et re i tasaj re upam ja, keje ile kkik'am ti kicho'ab' che i tapial. 7Chrij i tasaj re upam ja chi o chrij chwach i rachoch i Ajwal o jun elb'al b'ik chi kupon k'a puwi, keje ile k-an b'i elik che, k'a chuxe' loq pa nik'aj xaq k'a che urox kale ja. 8Yin xwil chrij chwach i rachoch i Ajwal o puwi jun kub'ib'al naj uwi, chi xaq puwi ile yaktal wi i tasalaq re upam ja. I ukub'ib'al i ja le o keb' xik'ab' che unajtil rij. 9-10I uwach xan chi o chisaq chi lik nim uwach re tasaj upam ja o jun xik'ab' ru' nik'aj che upimol xaq chrij chwach ronojel i rachoch i Ajwal; chkixol i tasalaq re i ja chi usutim rij i rachoch i Ajwal, xaq i tasaj re upam ja ke i ajsujul sipon, o kan jun jamjik chi nti o chwach chi o waqib' xik'ab' ru' nik'aj che uwach. 11I tasalaq re upam ja kutzu uwach i jamjik chi nti o chwach rumal jun uchija chi kkanaj pa moxab' i jun chik uchija pa wiqab'. I unimal i raqan i jamjik chi nti o chwach are jun tapial chi o jun xik'ab' ru' nik'aj che upimol.
I tak'tik ja chi o pusuk' i qajb'al ij
12Pusuk' i uqajb'al ij, ktzun b'i che uwaja tz'apim, o jun tak'tik ja chi o oxib' juwinaq xik'ab' ru' nik'aj che uwach i lajuj juwinaq (30) che unajtil raqan, ru' jun tapial chi o jun xik'ab' ru' nik'aj che upimol.
Ronojel unimal i rachoch i Ajwal
13I achi xupaj i rachoch i Ajwal i unimal ronojel o oxlajuj juwinaq (33) xik'ab' che raqan. I uwach i uwaja tz'apilik, xaq i tak'taq ja i utapial, xaq o oxlajuj juwinaq (33) xik'ab' chke. 14I uwach i rachoch i Ajwal xaq i uwaja chi tz'apilik chi kkanaj prelb'al ij, o oxlajuj juwinaq (33) xik'ab' chke. 15Te'uri xupaj i raqan i tak'tik ja chi kkanaj chrij i rachoch i Ajwal, chwach i uwaja tz'apilik, xaq i tapial chi o pa taq utzal, o oxlajuj juwinaq (33) xik'ab' che.
K'ijib'al chi o li pa ja re i rachoch i Ajwal xaq i okb'al b'ik.
I u'anik i rachoch i Ajwal
16-17Ch'uqtal rij ru' tz'alam. I wantana chi o k'ark'ar ch'ich' che xaq chapb'al re chi o chrij chwach je ch'uqum ru' i tz'alam che taq oxib' utzal. I unajtil kixol i wantana ru' i pulew, xaq i rajsik i uchija, xaq ch'uqtal kij. I uwach taq xan re i rachoch i Ajwal chupam xaq i chisaq, 18tz'ajtal rij ru' jalajuj taq querubín xaq che i palma. Chkijujunal i querubín o keb' kipalaj; 19che juperaj, o jun upalaj achi kutaqej jun palma, i juperaj chik upalaj jun koj kutaqej jun chik palma. Keje ile chrij ronojel i rachoch i Ajwal. 20Anom i k'exwach ke querubín xaq palma, kjeqan b'i pulew k'a pkiwi i uchija. Chwach xan re i nim laj upam ja chi o pa nik'aj, 21i chapb'al re uchija o aqan che chi kajib' utzal. Chwach i okb'al che i lik Lo'laj K'ijib'al re i Dios.
I sujb'al sipon re che'
22Jun sujb'al sipon re che' chi o jun mejelik ch'uk ru' jun ripaj ab'aj pa taq utzal i jun xik'ab' unajtil rij. Xaq o uch'uk, i ukub'ib'al pa taq utzal re che'. I achi xub'ij chwe: Iri are i mexa chi o chwach i Ajwal.
I uchija
23-24I k'ijib'al chi o pa okb'al re pa nik'aj re i ja xaq keje i lik Lo'laj K'ijib'al re i Dios, o uchija chi kale che. Chkijujunal uchija o keb' uperaj chke chi kejaq b'i chwach xan. 25Chke uchija re i okb'al chupam i nim laj ja punik'ajal, anom k'exwach chwach ke taq querubín xaq uk'exwach palma, xaqjun pacha je o che i tapial. Chwach li okb'al b'ik, chisaq loq, o jun uchija chi antal ru' b'irilaq taq che'. 26Chke jujunal taq utzal i okb'al o wantana k'ark'ar ch'ich' xaq o uk'exwach palma che. I utasaj upam ja chi unak'om rib' ru' i rachoch i Ajwal xaq o jun uchija chi antal ru' b'irilaq taq che'.
Currently Selected:
Ezequiel 41: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
