Ezequiel 40
40
Ilik pa wachij re i rachoch i Dios k-on panoq
1-2Che i ij lajuj re i ik', chi are i ij re i k'ak' junab', i Ajwal xuya u'ab' pinwi, i che jun k'utik rib' pinwach xinu'atsaj che i jyub' Israel. Ya ktz'aqat i jo'ob' juwinaq (25) junab' chi xojk'am b'i pa Babilonia, xaq o chik kajlajuj junab' che are xchaptaj i tinimit Jerusalén.
Che i jyub' Israel, i Ajwal xinuya puwi jun jyub' lik naj uwi; i chila loq, xintzun b'i pa wiqab', ipa xwil wi uk'iyal taq nimaq ja chi pacha ktzun jun tinimit. 3I Ajwal xinuk'am b'i chila, i xwil jun achi chi keje ktzunik pacha anch'ich'. Tak'al xol uchija, o jun rab'aj k'ul pu'ab' re lino xaq jun che' re pajanik. 4I achi le xub'ij chwe: “Lik utz rilik cha'ana xaq lik utz utayik cha'ana; lik chakojo i retalil che ronojel ni'pa kink'ut chawe, man i Dios at uk'amom li chi man yin kink'ut ni chawe. Te'uri chatzijoj che i tinimit Israel ronojel ni'pa i kawilo.”
Uchija chi o pusuk' i relb'al ij
5Chrij rachoch i Ajwal o jun tapial usutim rij. I che' re pajb'al chi rok'am i achi pu'ab' o keb' xik'ab' che raqan. Are uri xupaj i tapial, iri o keb' xik'ab' che uwach xaq o keb' xik'ab' che unajtil rij. 6Te'uri x-e che i okb'al chi o prelb'al ij, xel b'i che i anb'al i xupaj i et re uwi uchija, chi o keb' xik'ab' che uwach. 7I jujun tasaj chi o chuk'ulel i okb'al b'ik unimal chkijujunal o keb' xik'ab' unajtil raqan xaq keb' xik'ab' o che uwach, i chkixol i keb' tasaj le o jun xik'ab' ru' nik'aj uxol. Te'uri o i uchija re okb'al, chi ktzun b'i chwach i rachoch i Ajwal. I et re uwi uchija ri o keb' xik'ab' che uwach. 8-9I achi le xupaj i okb'al b'ik chi o pa okb'al re i rachoch i Ajwal, i okb'al le o keb' xik'ab' ru' nik'aj che. Xaq o keb' aqan chi o jun mejelik ch'uk che upimol. 10(Pa taq uk'ulel i okb'al b'ik re prelb'al ij o oxib' tasaj upam, konojel xaqjun kinimaqil, xaq i aqan chi o chkik'ulel xaq lik xaqjun kinimaqil.)
11Te'uri i achi xupaj i uchija re okb'al: O oxib' xik'ab' ru' nik'aj che uwach, i okb'al b'ik o kajib' xik'ab' ru' nik'aj che. 12Chkiwach i jujun tasaj o jun tapial ch'utin chi o nik'aj xik'ab' che uwach chke i keb' utzal. Chkijujunal i tasaj o keb' xik'ab' che uwach i keb' xik'ab' che raqan. 13Te'uri xupaj uwach ronojel i okb'al b'ik, k'a chupam li jun tasaj k'a che chik jun upam tasaj chi o chwach, kik'aw chupam jun uchija kel k'a che uchija chi o chwach, xaq o wajxaqib' xik'ab' che ru' nik'aj. 14Te'uri xupaj i okb'al b'ik: waqib' xik'ab' ru' nik'aj o che. I nim laj ja re okb'al b'ik ktzun uwach k'ulala re uwach i rachoch i Ajwal. 15Ronojel i unajtil raqan, k'a chwaja loq re i uchija k'a pa ja re i okb'al b'ik, o waqlajuj xik'ab' ru' nik'aj che. 16I k'ark'ar ch'ich' chupam xaq chrij chwach i nim laj ja re okb'al b'ik. Xaq keje i okb'al b'ik o wantana che chrij chwach xaq chupam. I aqan antal uk'exwach palma chwach.
I uwaja re i chisaq
17Chrijil chik ile i achi xinuk'am b'i chwach pan uwaja chi o chisaq. I uwaja le tusum ab'aj chi taq uchi', xaq o lajuj juwinaq (30) tasaj che upam. 18I tusum ab'aji, are mas naj ti uwi, lik are o ronojel chuchi' xaq pa taq utzal i nimaq taq ja re i okb'al b'ik, i uwach xaqjun unajtil raqan ru' iri. 19I achi le xupaj unajtil uxol i uchija k'a chwach li uchija chi o ikem k'a ru' uchija chi o chisaq re uchija chi o chupam, chi oxlajuj juwinaq xik'ab' o che uxol.
I uchija chi o pa moxab'
20Xaq o jun okb'al b'ik chi o pa moxab' re uwaja re chisaq. I achi xupaj unajtil raqan xaq uwach. 21Xaq o oxib' tasaj che pa taq uk'ulel, aqan, okb'al b'ik chi junam kupaj unimaqil pacha i okb'al re prelb'al ij, chi are waqlajuj xik'ab' ru' nik'aj unajtil i raqan xaq o wajxaqib' ru' nik'aj xik'ab' che uwach. 22I okb'al b'ik, wantana xaq i palma xaqjun kinimaqil ru' i je o pa okb'al b'ik re prelb'al ij, chi xaq ke'an b'i che jun yoch chi o wuqub' cholchol che, re kupon che jun chik okb'al chi o li pa ja. 23Pacha i prelb'al ij, xaq keje pacha pa moxab' chwach i okb'al b'ik chisaq, o chik jun okb'al b'ik chi kel chila k'a chwaja re i chupam loq. I achi xupaj kixol unajtil keb' okb'al b'ik le, chi o oxlajuj juwinaq xik'ab' che.
I uchija chi o pa wiqab'
24Te'uri i achi xinuk'am b'i pa wiqab' ipa o wi jun okb'al xaq xupaj i aqan xaq i okb'al b'ik, chi xaqjun kinimaqil pacha i jub'an chik. 25I tak'tik ja re okb'al xaq ru' i rokb'al, o wantana chrij chwach pacha i jub'an chik. Ronojel unimal o waqlajuj xik'ab' ru' nik'aj che unajtil raqan i uwach o wajxaqib' ru' nik'aj xik'ab' che. 26Xaq o jun yoch che chi o wuqub' cholchol che, xaq i okb'al kkanaj li pa ja. I aqan le o uk'exwach palma chwach, jun che taq k'ulala. 27I uwaja chi o pa ja o jun uchija chi ktzun b'i pa wiqab'. I achi xupaj kixol i keb' uchija chi o pa wiqab', chi o oxlajuj juwinaq xik'ab' che.
I uwaja chi o li pa ja: Uchija chi o pa wiqab'
28Te'uri xinuk'am b'i che i okb'al chi o pa wiqab' k'a chwaja re li pa ja. Xupaj i uchija re pa wiqab', i lik xaqjun unimal ku' i jub'an chik uchija. 29-30I tasaj re i upam ja, i okb'al b'ik xaq i aqan xaqjun kinimaqil ku' i jub'an chik. I tak'tik ja re okb'al, xaq ru' i rokb'al xaq o wantana che chrij chwach, xaq ronojel unimal o waqlajuj xik'ab' ru' nik'aj che unajtil raqan i uwach o wajxaqib' ru' nik'aj xik'ab' che. 31I okb'al b'ik re uwaja chi o chisaq. I aqan o uk'exwach palma chwach. Xaq che i uchija ri o jun yoch re elb'al b'ik chi o wajxaqib' cholchol che.
I uwaja chi o li pa ja: Uchija prelb'al ij
32Te'uri xinuk'am b'i che uwaja chi o li pa ja, che i k'ijib'al pusuk' i relb'al ij, te'uri xupaj i okb'al, chi xaqjun kinimaqil ku' i jub'an chik. 33I tasalaq chi o chupam i ja, i aqan xaq okb'al b'ik lik xaqjun kinimaqil ku' i jub'an chik. I tak'tik ja re i okb'al xaq ru' i rokb'al, o wantana che chrij chwach, xaq ronojel unimal o waqlajuj xik'ab' ru' nik'aj che unajtil raqan i uwach o wajxaqib' ru' nik'aj xik'ab' che. 34I okb'al b'ik chi o pusuk' uwaja chi o chisaq. I aqan o uk'exwach palma chwach k'ulala. Xaq che uchija ri o jun yoch elb'al b'ik chi o wajxaqib' cholchol che.
I uwaja chi o li pa ja: Uchija pusuk' i moxab'
35Te'uri i achi le xinuk'am b'i che okb'al b'ik chi o pusuk' i moxab', te'uri xupaj i okb'al b'ik chi xaqjun kinimaqil ku' i jub'an chik 36xaq o tasalaq chupam, aqan, okb'al b'ik xaq i wantana chrij chwach. I tak'tik ja re okb'al i unimal o waqlajuj xik'ab' ru' nik'aj che unajtil raqan i uwach o wajxaqib' ru' nik'aj xik'ab' che. 37I okb'al b'ik chi o pusuk' uwaja chi o chisaq. I aqan o uk'exwach palma chwach jun che k'ulala. Xaq che uchija ri o jun yoch elb'al b'ik chi o wajxaqib' cholchol che.
I tak'taq ja chi je o junam ru' uchija chi o pa moxab'
38Xaq o jun tasaj chupam i ja chi o re i okb'al che. Chila ipa kech'aj wi i chikop chi kesujux re sipon. 39Che i okb'al re uwaja o kajib' mexa, keb' che k'ulala, puwi ile kekamsax wi i chikop re keporoxik xaq re i sipon rumal i kimak atzalal. 40Chrij i okb'al chi o pa moxab' xaq o keb' mexa k'ulala, 41man keje ile o kajib' mexa pa ja xaq kajib' mexa o chisaq che i tak'tik ja chi o pa okb'al: Ronojel o wajxaqib' mexa. Pkiwi ike le kekamsax wi i chikop. 42-43I kajib' mexa ke i chikop chi keporoxik antal che ch'ayom ab'aj; i kinimal jub'i' chik nti jun xik'ab' che unajtil raqan xaq jub'i' chik nti jun xik'ab' che uwach, xaq jun mejelik ch'uk o che unajtil rij, xaq pkiwi ike kya' wi ti' re i sipon. Chupam li jutasaj re i ja, ronojel chrij chwach o jun upimol uchi' chi o oxib' uwi ab'aj che uwach, chi puwi ile kya' wi sipon re arin xaq ni'pa taq chapb'al chi rajwaxik re kamsab'al ke i chikop chi keporoxik.
44Che uwaja chi o li pa ja, chrij li uchija chi je o pa ja, o keb' tasaj, jun o chutzal uchija pa ja loq pa moxab', ktzun b'i pa wiqab', i jun chik o chutzal uchija pa ja loq pa wiqab', ktzun b'i pa moxab'.
45I achi xub'ij chwe: “I tasaj re upam ja chi ktzun b'i pa wiqab' ile ke i ajsujul sipon chi kki'an kipatan prachoch i Ajwal, 46i tasaj re upam ja chi ktzun b'i pa moxab' ile ke i ajsujul sipon chi kki'an kipatan chwach i sujb'al sipon. Ike le je umuq uxikin i ma Sadoc, lik xwi ike le je aj Leví, chi ya'om chke ketejeb' ru' i Ajwal anb'al re kipatan.”
I uwaja chi o li pa ja xaq i rachoch i Ajwal
47Te'uri i achi le xupaj i uwaja chi o li pa ja, chi are kajib' utzal xaqjun chi o oxlajuj juwinaq xik'ab' che jujun taq utzal. I k'ijib'al re sujb'al sipon o chwach i rachoch i Ajwal. 48I achi xinuk'am b'i che i okb'al re i rachoch i Ajwal xaq xupaj i aqan re i okb'al b'ik: Chkijujunal o jun xik'ab' ru' nik'aj che upimol. I uchija o kajib' xik'ab' ru' nik'aj che uwach, i chapb'al re uchija re okb'al b'ik o jun xik'ab' che uwach chkijujunal. 49Unimal i okb'al b'ik o waqib' xik'ab' ru' nik'aj che uwach i kajib' xik'ab' o che unajtil raqan, k-an b'i elik che ru' jun yoch chi o lajuj cholchol che. Chkijujunal i aqan le o chik jujun aqan chkik'ulel.
Currently Selected:
Ezequiel 40: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
