Ezequiel 33
33
Anik chi o chuqul i ajchajinel
1I Ajwal xlapan wu' xaq xub'ij chwe: 2Yet, winaq, cha'ijla awach aj tinimit i chab'ij chke: Are kintaq b'i ch'oj che jun tinimit, i winaq che i tinimit le, kkicha jun chke ike re kchajinik. 3I chajinel are krilo chi ktijin kuponik i achiyab' chi je yij che i ch'oj chu'anik ch'oj chkij ike, kuxut'ij i trompeta man keje ile i winaq kkiyijb'a kib'. 4We o jun kuta uch'awb'al i trompeta xaq kkojon ti che, i je ajch'oj keuponik kkikamsaj, lik are ni ire ajmak uri chi kkamik, 5man xuta uch'awb'al i trompeta xwiri xkojon ti che; lik are ire uri ajmak che ukamik, man wetene xkojon che kuto te ri uk'aslemal. 6Xwiri i ajchajinel we xrilo chi xeupon i achiyab' chi je yij che i ch'oj i kuxut'ij ti i trompeta re kkiyijb'a kib' i winaq, i ajch'oj keuponik i kkikamsaj jun chke ike, ire kkam ni rumal umak, xwiri Yin kintz'onoj ni che i ajchajinel le wach ukamik i kamnaq le.
7Rumali yet, winaq, Yin at inya'om pa chajinel re i tinimit Israel. Yet rajwaxik kak'am intzij xaq katzijoj i kasaqij chke ike. 8Rumali we xuk'ulmaj taq jun anik chi Yin kinch'ik tzij re kamik chrij jun utz ti laj winaq; xwiri yet, we kab'ij ti che ire chi kujalwachij uk'aslemal, ire ku'an taj, i utz ti laj winaq le kkam ni rumal umak, xwiri Yin kintz'onoj ni chawe yet wach ukamik. 9Xwiri, we yet, kab'ij usuk' che i utz ti laj winaq le, chi kujalwachij uk'aslemal, ire we k-on taj, ire kkam ni rumal umak, xwiri yet kato ni ak'aslemal.
Anik chi o chuqul
10Yet, winaq, chab'ij che i tinimit Israel: Yix kib'ij: Lik k'i i utz taj qa'anom xaq k'i i qamak qa'anom. Rumali ktijin qa'ayik pqak'aslemal. ¿Wach nawi kqa'an yoj re kojtotajik? 11Xwiri Yin in Ajwal, kinsaqij pub'i ink'aslemal chi kwaj ti ukamik i utz ti laj winaq, xwiri are i kwaj Yin chujalwachij uk'aslemal i chk'asi na. Yet, Israel, chakanaj kan i utz ti laj ak'aslemal. ¿Wach uchak katkam na?
12Yet, winaq, chab'ij chke awach aj tinimit: We jun utz laj winaq kmakunik, i utz chi u'anom te'eq kuto taj, we jun i utz ti laj winaq kuya kan u'anik i utz taj, i umak chi ax u'anom wi are ti k-anaw che chi kkamik. We jun utz laj winaq kmakunik, i utz chi u'anom te'eq nti chik uchak che re kk'asi na. 13We yin kinsujuj uk'aslemal jun utz laj winaq, ire, kukub'a uk'ux che i utz ku'ano, xwiri we ku'an i utz taj, kinkoj ti pajil che ni'pa taq i utz chi xu'an puk'aslemal, are ku'ano xa kkam ni rumal i utz taj chi xu'ano. 14We kinch'ik ukamik jun utz ti laj winaq, ire le kuya kan i utz taj chi ku'ano are kujeq u'anik i utz xaq i suk'ulik, 15i kutzalij chik ni'pa i b'iroxik chi utz'onom chwach jun cha'im o wach i rel-am, i ku'ano pacha kub'ij i atb'al tzij chi kyaw i k'aslemal xaq kuya kan i utz taj, lik qatzij kk'asi na xaq kkam taj. 16Man wo'or utz chik i ku'ano xaq suk'ul i ku'ano, rumali kk'asi na, keje uri ile chi kk'un ti chik chink'ux mijun chke ni'pa taq umak chi u'anom te'eq. 17I awach aj tinimit kkib'ij na chi Yin utz ti u'atik tzij kin-ano; xwiri lik qatzij xa are ike chi utz ti u'atik tzij kki'ano. 18I utz laj winaq we kumayij u'anik i utz, xa are ku'an i utz taj, kkam ni rumal umak le. 19We i utz ti laj winaq kuya kan u'anik i utz taj i kujeq u'anik i utz xaq i suk'ulik, rumal u'anik ile kk'asi na. 20Yix lik k'iyalmul kib'ij i tziji: I Ajwal utz ti u'atik tzij ku'ano. Xwiri Yin kin-at ni tzij piwi yix ix aj Israel chijujunal, chrij wach i ki'ano.
Utzaqik i tinimit Jerusalén
21Che ujo' ij re ulajuj ik' re i kab'lajuj junab' re qelsaxik b'ik pa cho'ab' chwach qulew, jun achi chi anmajnaq li pa Jerusalén, xk'unik i xulap chwe chi i tinimit xtzaq pki'ab' i ajch'oj chrij.
22Che a'ab' are k'amaja kupon i anmajnaq b'ik, i Ajwal uya'om te u'ab' pinwi; che usaqirb'al, are xk'un i achi, i Ajwal xutzalijsaj chik inch'ab'al are uri xinya kan ile chi kel ti chik inch'ab'al.
I k'iyal taq umak i tinimit
23I Ajwal xlapan wu', i xub'ij chwe: 24I winaq chi je jeqel pa taq tinimit re Israel chi je o puyej, ketijin chub'ixkil: Ma Abraham chi xa jun, xwiri, xu'an rajaw i nim laj ulewi; mas o ne qe yoji che, man lik oj k'i, re koju'an ni rajaw i nim laj ulewi. 25Rumali chab'ij chke: Keje iri kub'ij i Ajwal: Yix kitij i ti' chi o kik' che, kikoj taq ki'ij i tiox chi xaril je antalik, ki'an i kamsanik, ¿I kich'ob' taq wa yix chi kixu'an ni rajaw i nim laj ulewi? 26Ki'an i kamsanik ru' i ch'ich' re ch'ojb'al, ki'an taq i b'iroxik chi ch'am taj chinwach Yin, achiyab' xaq ixoqib' kki'an i ch'am taj ru' kich'akul, ¿I kich'ob' taq wa yix chi kixu'an rajaw i nim laj ulewi?
27Xaq chab'ij chke: Keje iri kub'ij i Ajwal: Lik kinsaqij pub'i ink'aslemal chi ni'pa i je jeqel pa taq tinimit chi je o puyej, lik kekamsax na, i jub'an chi je jeqel pa taq es, kin-an na chi ketijaw kumal itzel taq chikop, xaq i jub'an chi je jeqel xol taq ab'aj xaq i jub'an chi je jeqel pa taq pek, kekam ni rumal yob'il. 28Kin-an ni che i nim laj tinimit chi lik pacha tz'inilik jyub' xaq wulijnaq, lik kinsach ni uwach ucho'ab' chi lik k-anaw che chi kukoj u'ij. Ni'pa i tzam taq jyub' re i tinimit Israel kekanaj na pacha tz'inilik jyub'; chi lik mijun kik'aw chik chwach. 29Yin, are kin-an kan tz'inilik jyub' xaq lik wulijnaq che i nim laj tinimit, rumal i kimak chi lik ch'am taj chi xki'ano, te'uri kketamaj na chi Yin in Ajwal.
30I awach aj tinimit katkich'ach'a chrij i tapial, xaq xol taq uchija ke i ja, i kkib'ij chkiwach: Chixpetoq, chqata i tzij chi petnaq ru' i Ajwal. 31Keje ile, intinimit kk'unik, kkub'i chawach, pacha ax ku'an wi te'eq, re kutatb'ej atzij. Xwiri kki'an ti ile pkik'aslemal. K'iyalmul kkib'ij pacha taq kki'an b'ix che, re k'axnab'al k'uxij, xwiri i kanima xa teren chrij i mer. 32Ike kkich'ob'o chi yet at keje pacha jun chi kub'ixaj i b'ix re k'axnab'al k'uxij, chi lik chom uqul, xaq lik ktiki chu'ojmaxik i arpa. Kkita atzij, xwiri kki'an ti pkik'aslemal. 33Xwiri, ronojel ile k-antaj na, i are k-antajik, kketamaj na chi o te jun profeta chkixol ike.
Currently Selected:
Ezequiel 33: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
