Ezequiel 14
14
Ch'oj chrij ukojik ki'ij i tiox chi xaril je antalik
1Lik je k'i i rijab' re Israel xek'un chwilik re kinya retamaxik chke wach kub'ij i Ajwal. 2Are uri i Ajwal xlapan wu' xaq xub'ij chwe: 3I achiyab'i lik kiya'om kib' chukojik ki'ij i kitiox chi xaril je antalik, xa are kikojom retalil ile chi k-anaw chke kemakunik. ¿Xatab'a kinya chke kelapan wu'? 4Chatlapan ku' xaq chab'ij chke: Iri are kub'ij i Ajwal: Ni'pa i aj Israel chi xa kkiya kib' chukojik ki'ij i tiox chi xaril je antalik i xa are kikojom retalil ile chi k-anaw chke kemakunik, chi xaq kk'un la pa lapanik ru' i profeta, Yin kinya ni la'b'al uwach che chrij wach kmajaw che, rumal lik o k'iyal taq tiox ru'.
5Yin kinyin ni kanima konojel aj Israel chi xinko'taj kanoq rumal kitiox. 6Rumali chab'ij chke aj Israel: “Iri are kub'ij i Ajwal: Chixtzalij chal wu' yin, cheikanaj kan i tiox xaq chikanaj kan ni'pa i b'iroxik chi lik ch'am taj.” 7We jun aj Israel o we jun aj naj chi jeqel pa tinimit Israel kujek' rib' wu' i kujach rib' ru' ronojel uk'ux chukojik ki'ij i tiox chi xaril je antalik, xa are ukojom retalil ile chi k-anaw che kmakunik, te'uri kupon la ru' jun profeta re kretamaj wach kinb'ij Yin, lik Yin uri kinya ni la'b'al uwach che. 8Kink'ut ni wib' che i achi le xaq lik kinya ni jun tojb'alil che re k'utb'al, anik chi lik kel ni utzijol, kinsachsaj ni uwach chuxol intinimit. Te'uri kiwetamaj ni yix chi Yin in Ajwal.
9We o jun profeta kutzijoj jun tzij chi saqil taj, ile are Yin in Ajwal, xint'or i profeta le; xaq Yin kinyak ni in-ab' chrij re kinya utojb'alil che xaq kwesaj ni chuxol intinimit Israel. 10I winaq chi ku'an i tz'onb'enik xaq keje i profeta, lik kya' ni utojb'alil chke rumal i kimak, 11keje ile i tinimit Israel kujek' ti chik rib' wu' xaq ku'an ti chik i nuk'unik tzij chi utz taj. Ike je are ni intinimit xaq Yin in are i Kajwal. Yin in Ajwal, kinb'ij.
I tinimit Jerusalén kmajawik chi kya' utojb'alil che
12I Ajwal xlapan wu' xaq xub'ij chwe: 13We jun nim laj tinimit kmakun chinwach Yin xaq kkojon ti chwe, Yin lik kinyak ni in-ab' puwi re yab'al utojb'alil umak, xaq kinya ti chik che ni'pa i rajwaxik re kutijo; kintaq na li wa'jal puwi ire, xaq kin-an na chi kekam i winaq xaq i chikop. 14Wetene che i tinimit le je k'as ma Noé, ma Daniel, xaq ma Job, xwi ni ike le je oxib' ketotaj ni uri man je suk'ul laj taq winaq. Yin in Ajwal kinb'ij ile.
15We kintaq b'i itzel laj taq chikop che jun tinimit re kamsab'al ke i winaq chila xaq kki'an jun tz'inilik jyub' che, ipa mijun kraj kik'aw chila rumal xib'rikil chke itzel laj taq chikop le, 16wetene oxib' achiyab' le kejeqi chila, ketiki teneri chkito'ik kik'ojol xaq kimi'al; xwi ike ketotaj na, i tinimit lik kkanaj na pacha jun tz'inilik jyub'. Yin in Ajwal, kinsaqij ile rumal ink'aslemal.
17We kin-ano chi kpe i ch'oj puwi ronojel i tinimit le xaq kintaq kikamsaxik i winaq xaq i chikop, 18wetene oxib' achiyab' le kejeqi chila, ketiki teneri chkito'ik kik'ojol xaq i kimi'al; lik xwi ike ketotaj na. Yin in Ajwal, kinsaqij ile rumal ink'aslemal.
19We kintaq b'i yob'il che i tinimit le, xaq rumal woywal kin-an ni kamik chila, xaq kin-ano chi kekam ni winaq xaq i chikop. 20Wetene kejeqi ma Noé, ma Daniel, xaq ma Job chila, ketiki teneri chkito'ik kik'ojol xaq i kimi'al; xwi ike le ketotaj ni uri rumal je suk'ul laj taq winaq. Yin in Ajwal, kinsaqij ile pink'aslemal.
21Yin in Ajwal, kinb'ij: Lik mas xib'in ib' ru', are kintaq b'i chrij i tinimit Jerusalén kajib' utojb'alil kimak, chi are iri: Ch'oj, wa'jal, itzel laj taq chikop xaq i yob'il chi keukamsaj i winaq xaq i chikop. 22Xa je keb' oxib' na kek'asi ni kanoq xaq ketiki ni che i elik chila junam ku' kik'ojol xaq i kimi'al. Are keupon iwu' yix, yix kiwil ni uri wach kik'aslemal xaq ni'pa i b'iroxik chi ki'anom, lik kkub'i ni ik'ux che rumal i k'ax chi xinpetsaj puwi i tinimit Jerusalén. 23Lik kkub'i ni ik'ux che are kiwilo wach ki'anom ike pkik'aslemal xaq i b'iroxik chi ki'anom. Te'uri kiwetamaj tan chik yix chi Yin lik o ni rumal are xin-an ronojel ile che i tinimit Jerusalén. Yin in Ajwal, xinb'ij ile.
Currently Selected:
Ezequiel 14: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
