Ezequiel 12
12
Ma Ezequiel kutzijoj kelsaxik b'i winaq pa cho'ab' chwach kulew
1I Ajwal xlapan wu' xaq xub'ij chwe: 2“Yet, winaq, at jeqel chupam jun tinimit chi lik qelqel. O kib'a'wach re ketzunik xwiri ketzun taj, o kixikin re kkita xwiri ketan taj man je are jun tinimit chi lik qelqel. 3Rumali, chayijb'a ronojel ni'pa i rajwaxik chawe man katelsax b'i pa cho'ab' chwach awulew, lik pa'ij chkiwach konojel chatel b'i che awachoch, jat chik che jun k'ijib'al; moqxa ru' ile kkil ub'e chi je are jun tinimit qelqel. 4Lik pa'ij chkiwach konojel, kawesaj b'i ub'itaq awe pacha taq are katelsax b'i pa cho'ab' chwach awulew; che uqajb'al ij katel b'ik xaq chkiwach konojel katel nu b'ik pacha taq katelsax b'i pa cho'ab' chwach awulew. 5Te'uri cha'ana jun tel che i tapial, chkiwach konojel, i chatel b'i chila che i tel le ru' ub'itaq awe. 6Are kok equm, chaya b'i ub'itaq awe chwi ateleb' xaq chatel b'i chkiwach konojel man keje ile katkilo. Chach'uqu apalaj, man keje ile kawil ti i nim laj tinimit. Kwaj yin chi at are jun k'utb'al chi kch'aw pa tinimit Israel.”
7Yin xinyijb'a i ub'itaq we keje pacha xub'ij i Ajwal chwe, xaq lik pa'ij xinel b'i ru' ub'itaq we, pacha taq jun chi xelsax b'i pa cho'ab' chwach rulew. Che uqajb'al ij lik xin-an jun tel che i tapial ru' in-ab', are xok equm, lik chkiwach ike xinya b'i ub'itaq we chwi inteleb' i xink'am b'ik.
8Che jun chik usaqirb'al, i Ajwal xlapan wu' xaq xub'ij chwe: 9Lik qatzij, i tinimit Israel chi lik qelqel, xkitz'onoj chawe: ¿Wach taq kattijin chu'anik? 10Chab'ij chke pinb'i, iri are jun tzijonik re i ajawinel pa Jerusalén xaq chke konojel aj Israel chi je jeqel chila. 11Chab'ij chke chi yet at are jun k'utb'al chi kch'aw chke ike, xaq keje ile kki'an ni ike pacha xa'an yet, man kek'am nu b'ik i ke'elsax b'i pa cho'ab' chwach kulew. 12I aj-atzil ke ike xaq kuk'am nu b'i ub'itaq re chwi uteleb', are kok equm kel nu b'i che i tel chi kki'an ni che i tapial. Xaq uch'uqum upalaj kel nu b'ik man mijun kril upalaj xaq mitene ire kril ti i tinimit. 13Yin kink'aq ni ink'at puwi ire man keje ile ktzaq chupam. Kink'am nu b'i pa tinimit Babilonia, kulew aj Caldea, ulew chi ire kril ti uwach, man chila kkam wi. 14I keinkichersaj nu b'i kiwach che kajib' k'ulala re uwach i jyub' ta'aj konojel i kechajiw te'eq ire, xaq keje kin-an chke i jub'an chik achiyab' chi je yij che i ch'oj, xaq lik keinterb'ej ru' ch'ich' chi k'ulala o uware. 15Are je inkichersam chub'i kiwach pa taq tinimit xaq pa nimaq taq tinimit, kketamaj na chi Yin in Ajwal. 16Xwiri kin-an ni chke chi keb' oxib' panoq ketotaj ni chwach i ch'oj, chwach numik xaq chwach i yob'il, man keje ile xa'ipa ke'e wi pa nimaq taq tinimit, kkilap ni chila ni'pa taq b'iroxik xki'ano chi ch'am taj xaq kketamaj na chi Yin in Ajwal.
K'ak' tzijonik re utojb'alil
17I Ajwal xch'aw julaj chik chwe i xub'ij: 18“Yet, at winaq, chatb'arb'at rumal xib'rikil are katij awa, xaq chak'utu chi katk'achirik are katu' aya'. 19Xaq chab'ij chke i winaq pa tinimit Jerusalén xaq chke konojel aj Israel: Iri are kub'ij i Ajwal: Kitij ni iwa ru' b'is xaq kitu' ni iya' ru' xib'rikil; man i tinimit ksachsax ni uwach, kkanajik nti chik winaq chwach rumal i ch'oj ke uwinaq. 20Ni'pa i tinimit chi je o winaq chupam, lik ksachsax ni kiwach; i tinimit kkanajik lik pacha tz'inilik jyub'. Te'uri kiwetamaj ni yix, chi Yin in Ajwal.”
21I Ajwal xinu'ijla i xub'ij chwe: 22“¿Wach kkaj ub'ixkil i winaq aj Israel are kkib'ij i tziji: Ktijin rik'awik i ij, i utzijonik i profeta k-antaj taj? 23Xwiri chab'ij chke: Iri are kub'ij i Ajwal: Yin kin-an na, chi kkib'ij ti chik i tzij le pa tinimit Israel. Xaq chab'ij chke, chi ya knaqajab' i ij chi k-an ronojel ni'pa taq i xtzijox ub'ixkil pa wachij. 24Man lik nti chik jun tzijonik chi qatzij taj chi kril jun puwach o we kb'ix che xaq mitene tzijonik we qatzij taj chkixol i winaq aj Israel. 25Man Yin in Ajwal, kinch'awik are i kinb'ij k-antaj na, kb'aytaj taj. Lik yix kiwil ni ile chi ix tinimit qelqel. Yin kinch'aw na xaq kin-an na chi k-antaj na wach kinb'ij. Yin in Ajwal, kinya intzij.”
26I Ajwal xlapan wu' i xub'ij chwe: 27“I tinimit Israel ketijin chub'ixkil chi ni'pa taq aya'om utzijoxik pkiwach, lik naj o wi u'anik. 28Rumali chab'ij chke: Iri are kub'ij i Ajwal: Ni'pa intzij kb'aytaj ti u'anik, ni'pa inb'im k-antaj na; Yin in Ajwal, kinya intzij.”
Currently Selected:
Ezequiel 12: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
