Ezequiel 11
11
Utojb'alil pkiwi aj Jerusalén
1I ucho'ab' i Ajwal xinuyako xaq xinuk'am b'i che i okb'al chi ktzun uwach pa kel wi li ij re rachoch i Ajwal. Che uchija le je o jo'ob' juwinaq (25) achiyab'. Chkixol ike xwil uwach ma Jaazanías, uk'ojol ma Azur, xaq i ma Pelatías, uk'ojol ma Benaía, chi je are aj-atzil re i tinimit. 2I Ajwal xub'ij chwe: “Are ike ri chi ketijin chuch'ob'ik i kamsanik xaq ketijin chuyijb'axik i itzel laj taq ch'ob'onik pa tinimiti.” 3Kkib'ij: “K'amaja naj chi xqayijb'a chik i ja. Chi kojtotaj wi, keje pacha i ti' chi o pa b'oj.” 4Rumali, chatch'aw pinb'i.
5I utewal i Ajwal xinrajawij, xaq xub'ij chwe chi kinb'ij: Iri are kub'ij i Ajwal: “Ile are kich'ob' yix, ix aj Israel. Yin lik weta'am innojb'al. 6Yix lik k'i kamik i'anom pa tinimiti, i xol taq b'e lik inojsam che i kamnaq. 7Rumali, Yin in Ajwal, kinsaqij chiwe: I tinimit Jerusalén keje na pacha jun b'oj, xwiri i ti' ix are ti yix, xa je are i kich'akul i kamnaq chi yix je ikamsam, rumali yix kixwesaj li pa b'oj. 8¿Kixij iwib' che i ch'oj? Xwiri lik kinpetsaj ni ch'oj piwi yix. Yin in Ajwal, kinsaqij intzij chiwe. 9Kinya ni utojb'alil piwi yix: Kixwesaj nu b'i chi, kixinjach ni chke i winaq aj naj. 10Kixkam ni rumal i ch'ich' chi k'ulala o uware. Yin kin-at ni tzij piwi yix chuchi' taq ulew re Israel, te'uri kiwetamaj na chi Yin in Ajwal. 11I tinimit kajwax ti chiwe yix re b'oj, xaq yix ix are ti ti'. Yin kin-at ni tzij piwi yix chuchi' taq ulew re Israel, 12te'uri kiwetamaj na chi Yin in Ajwal. Yix i'anom ti pik'aslemal wach kub'ij intaqanik xaq mitene i'anom wach kub'ij in-atb'al tzij, xa are ix teren chrij i anik chi kki'an jub'an chik tinimit chi je o chiwij chiwach.”
13Tz'aqat yin kintijin chulapik utzij i Ajwal chke, i ma Pelatías, chi uk'ojol ma Benaía, xtzaq pulew i xkamik. Yin xinxuki'ik, xinqajsaj inpalaj k'a chwach ulew, lik ko xinsik'inik i xinb'ij: “¡Ay, Ajwal! ¿Xatab'a kasach kiwach i jub'i' chik chi k'a je o kan pa tinimit Israel?”
I Dios kutzijoj jun k'ak' trat
14I Ajwal xch'aw chwe xaq xub'ij chwe: 15“I winaq chi je jeqel pa Jerusalén kelapan chkij aj Israel, chi je awach aj tinimit, kkib'ij: ¡Ike lik naj je o wi che i Ajwal! Xwiri chqe yoj xuya i nim laj tinimit re oj rajaw. 16Rumali chab'ij chke: Iri are kub'ij i Ajwal: Yin xewesaj b'i pa cho'ab' chwach kulew xaq xeinkichersaj b'i kiwach pa nimaq taq tinimit, chkixol i nimaq taq tinimit chi etamam ti kiwach, xwiri k'iyal ij ti uwach. Wo'or yin lik in keje pacha jun lo'laj k'ijib'al chke ike ipa je o wi pa taq tinimit. 17Xaq chab'ij chke: Iri are kub'ij i Ajwal: Yin keintzalijsaj na loq che i nimaq taq tinimit le ipa xeinkichersaj wi b'ik, kinmol ni kichi' xaq kinya ni tinimit Israel chke. 18Ike ketzalij ni chal pa kitinimit xaq kkisach ni uwach ronojel ni'pa i titat pamaj xaq ni'pa i ch'am taj chi ktijin u'anik. 19Yin kwesaj ni kanima le chi lik ko pacha ab'aj xaq kinya jun k'ak' kanima i jun k'ak' uxlab'. 20Te'uri kki'an na pacha kub'ij intaqanik xaq in-atb'al tzij, i lik kki'an ni pkik'aslemal. Ike le je are ni intinimit, xaq yin in ki-Dios. 21Xwiri ile chi kkimayij ti ukojik ki'ij i ch'am ti laj taq tiox chi xaril je antalik, xaq lik kkijek' ti kib' che i ronojel i ch'am ti laj taq kimak, Yin kintz'onoj ni chke wach xki'an pkik'aslemal. Yin in ki-Dios aj Israel, xaq lik kin-an na wach i xinb'ij.”
I u'ij uchomal i Ajwal kujek' rib' pa tinimit Jerusalén
22I querubín xe'e rupupik, i sotsaq xeterej b'i chkij. Are uri i u'ij uchomal i Ajwal re i tinimit Israel chi o te'eq pkiwi ike, 23xwalijik xujek' rib' che i tinimit, xe'ol puwi i jyub' chi o chwach i tinimit prelb'al ij. 24Te'uri i ucho'ab' i Ajwal xinuyako i xu'an chwe chi xintzalij chub'i pa tinimit Babilonia chila ipa je o wi i jub'an chi je elsam b'i pa cho'ab' chwach kulew. Iri xwil pinwach are xuk'ut Utewal i Ajwal chwe. Chrijil chik iri xsach pinwach wach xwilo. 25Yin xinlap chke i winaq chi je elsam b'i pa cho'ab' chwach kulew ronojel ni'pa xuk'ut i Ajwal chwe pinwach.
Currently Selected:
Ezequiel 11: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
