Deuteronomio 24
24
Atb'al tzij chrij ujachik kib' i je k'ulinaq
1Jun achi we xk'uli ru' jun ixoq, xwiri k-on panoq we qus ti chik krilo man kunab'ej chi rixoqil xaqmanal kujaluj, kuyijb'a uri jun wuj re jachb'al kib', kujach b'i pu'ab' ixoq te'uri kresaj b'i ru' ja. 2I ixoq le chrijil chik utaqik b'ik rumal i rachijil, utz uri we kk'uli ru' jun chik. 3Xwiri we ukab' rachijil le, keje ile ku'an tan chik che, chi qus ti tan chik krilo, ire le xaq kujach chik jun wuj pu'ab' re jachb'al kib' xaq kresaj chub'i ru' ja o xaq we xkam i ukab' rachijil, 4are uri i nab'e rachijil we kraj tan chik kk'uli ru' i nab'e rixoqil le, i atb'al tzij kuya ti uri che man ixoq le ke'eloq chi ch'am ti laj ixoq chik, man we xk'uli ru', lik jun mak atzalal, chi lik tzel kril i Ajwal; chk'un chik'ux chi kiqajsaj ti u'ij i ulew chi kuya Iwajwal Dios chiwe yix.
Jub'an chik atb'al tzij
5Jun achi we k'ate k'ulinaq, k-e ti uri pa ch'oj xaq nti taq jun chik upatan kya'ik, ile jun junab' uwach man keje ile kk'iji ni chi rachoch junam ru' rixoqil, xaq lik kukikotsaj ni i rixoqil le.
6Jun we k-on jun cha'im awu', matz'onoj taq kan i chaqb'al utzi xaq uka' che, tz'aqat kutoj i uk'as, man ke'el uri chi pacha xatz'onoj kan uk'aslemal che.
7We jun aj Israel xnab'tajik chi kuchap jun rach aj Israel re krel-aj b'ik man kraj k-on winaq che chi o pa k'ax rumal ire xaq we re kuk'ayij. I ili'om winaq le lik kkamsax na man xwi keje ile ksach ni uwach i utz taj chi o chixol yix.
8Jun we xpe i yob'il che tz'umalil che, rajwaxik uri chi ku'an ni ronojel ni'pa xkib'ij i je ajsujul sipon chi aj Leví, lik k-an ni ronojel chrij pacha xinb'ij yin chke ike le. 9Chk'un chik'ux wach xu'an Iwajwal Dios che ati Mariy are xupetsaj i yob'il lepra chrij pa b'e are xixel li pa Egipto.
10We kiya jun cha'im che iwach lok'anij, mixok prachoch chrelsaxik li ub'itaq re, re kik'ol puk'exel ucha'im. 11Are i ki'ano, chiwoy-ej chisaq man are ire kilawik wach ub'itaq re kuya chiwe chwach uk'as tz'aqat keutojo chiwe. 12Xaq we are jun winaq chi nib'a', utz taj chi kik'am kan uchamar che ronojel a'ab', 13lik kitzalij b'i che are kok a'ab' man keje ile are kwarik o kukoj kan chrij. Xaq ire kutz'onoj uri utzil chomal piwi xaq yix lik ki'an uri i utz chwach Iwajwal Dios.
14Mi'an k'ax che jun nib'a' pa chak chi lik rajwaxik uchak che, xaq lik chitojo pacha i kmajawik, nti k-ono we iwach aj Israel xaq we aj naj chi jeqel che jun itinimit. 15Are kqaj ij, su' chitojo man ire nib'a' lik kajwax umer che ij ij re wach kutijo. Man we kitoj taj ire kch'ojin ni uri chwach i Ajwal chiwij yix, ke'el uri chi lik ix ajmak.
16I qajawxelab' kekam ti rumal taq kimak i kak'al xaq i alk'uwalxelab' kekam ti rumal kimak i kiqajaw. Chkijujunal kekam ni rumal kimak chi kki'ano. 17Mi'an jun utz taj chke aj naj xaq chke i ak'alab' chi nti chik kiqajaw kichuch. Mik'am ki'u' i je malkanib' chwach kik'as. 18Msach chik'ux chi yix ix winaq chi ix o te'eq pa k'ax chila pa Egipto, xwiri Iwajwal Dios xixresaj li chila. Rumali kixintaq che chi chixkojon che ronojel ni'pa i kinb'ij chiwe ri.
19Are kimol uwach i tikon pa taq es we o xkanaj kanoq, mixtzalij chub'i chuk'amik, chiya ni kan chila man chumolo nu b'i jun aj naj chi o pitinimit, o jun ak'al chi nti chik uqajaw uchuch, xaq we jun malkan, man keje ile Iwajwal Dios kuya ni utzil chomal piwi che ronojel ni'pa i ki'ano.
20Are kimol uwach i olivo, mikamulij umolik, man ronojel ni'pa i kkanaj kanoq ke ni aj naj, ke ni i ak'alab' chi nti chik kiqajaw kichuch xaq i je malkanib'.
21Are kimol uwach i uva, mikamulij umolik, man ronojel ni'pa i kkanaj kanoq ke ni i aj naj, ke i ak'alab' chi nti chik kiqajaw kichuch xaq i je malkanib'. 22Msach chik'ux chi yix ix winaq chi ix o te'eq pa k'ax chila pa Egipto, rumali kixintaq chu'anik ronojel ni'pa iri.
Currently Selected:
Deuteronomio 24: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
