Deuteronomio 23

Winaq chi elsam b'i pa komon

1Jun achi we puch'um usaqmol xaq we k'atzim i anb'al uchul, kya' ti uri che kok b'i pa ja re i molb'al ib' re i Ajwal.

2Jun winaq we xa sik'om ak'al kya' ti uri che kok pa ja re i molb'al ib' re i Ajwal, xaq kya' ti chke ulajuj umuq uxikin.

3I aj Amón xaq aj Moab lik kya' ti chke ke'ok pa ja re i molb'al ib' re i Ajwal xaq kya' ti chke ulajuj umuq uxikin. 4Man are xixik'aw yix chupam i kulew are petik iwe chila pa Egipto, ike xkiya ti iwa xaq xkiya ti iya', xwi ta la ile, xaq xkitoj ma Balaam, chi uk'ojol ma Beor, chi aj Petor re i Mesopotamia man kutzijoj ni jun k'oqb'al chiwij yix. 5Xwiri Iwajwal Dios xu'an taj pacha xutz'onoj ma Balaam, man puk'exel i k'oqonik xuya utzil chomal piwi yix, man i Dios k'ax kixuna'o. 6Mitzukuj uri i chomb'al ib' xaq i utz laj olem ke ike che ronojel ij re ik'aslemal.

7Xwiri mtitat ipam chke aj Edom man ike le je i wachalal xaq mtitat ipam chke aj Egipto man xixk'iji chila pkulew. 8Xwiri urox kimuq kixikin ike le utz kiya chke ke'ok pa ja re i molb'al ib' re i Ajwal.

Atb'al tzij chrij i jos-inik

9Yix are kix-e pa ch'oj chkij ajch'oj chiwij chichajij iwib' chu'anik i utz taj chwach i Dios. 10We jun chiwe yix xb'elel li rijayil puwaram, lik ch'am ti uri, rumali rajwaxik kel b'i che i k'ijib'al ipa je o wi i jub'an chik chi je yij che i ch'oj, xaq lik kok ti chkixol jun ij. 11Are kqaj ij katin na man are kok-ab' kok chik chkixol i rachi'il ipa je o wi.

12Rajwaxik chi o jun k'ijib'al re tzaqb'al ib' naj pan jub'i' che i k'ijib'al ipa je o wi i achiyab' chi je yij che i ch'oj. 13Ru' ronojel ni'pa i rajwaxik, xaq kuk'am b'i jun estaka man are kraj utzaqik rib', ku'an jun ral jul ru' estaka, te'uri are ktzaqtaj rib' chupam i jul le, kumuq kan uwi ukis ru' ulew. 14Man Iwajwal Dios lik o chixol yix, chila che i k'ijib'al re kixuto xaq re uya'ik i ch'akanik pkiwi i ajch'oj chiwij, rumali i lo'laj ik'ijib'al yix le rajwaxik chi lik ch'am, man keje ile i Dios kuriq ti jun b'iroxik chi utz taj chila, man we olik, kujek' rib' uri iwu'.

Atb'al tzij chi kuto i winaq chi k-anmajik

15Jun winaq chi o pa k'ax rumal i rajaw we x-anmaj li chi rachoch i rajaw, kupon iwu' yix chutzukuxik tob'al rib', miya chik che i rajaw ipa x-anmaj wi loq. 16Chiya che chi kjeqi iwu' pa tinimit ipa kraj wi ire xaq che i k'ijib'al chi kucha ire, xwiri mijun much'ich'a.

U'atixik ukojik ki'ij jub'an chik dios

17Mijun achi xaq mijun ixoq aj Israel kuya rib' chukojik u'ij jun chik dios. 18Miya taq che jun winaq chi kuya jun usipon prachoch i Dios ru' i mer chi uch'akom chukojik u'ij jun chik dios, man ile lik kmuluw uk'ux i Ajwal Dios che.

19Mitz'onoj alaj re jun cha'im che jun iwach aj tinimit, tupu mer xaq we jalajuj taq b'iroxik chi tijawik re, xaq xab'iroxik chi kiya b'i pa cha'im kitz'onoj ti alaj che. 20Xwi chke i winaq chi aj naj, utz kitz'onoj alaj che wach taq kiya chke pa cha'im, xwiri mitz'onoj alaj re jun cha'im chke iwach aj tinimit. Keje ile Iwajwal Dios kuya ni utzil chomal piwi che ronojel ni'pa ki'an chwach ulew chi kuya Ire chiwe kixjeqi chwach.

21Are ki'an jun sujunik chwach Iwajwal Dios, mixb'aytaj chuya'ik man i Ajwal lik kutz'onoj ni chiwe wach xisujuj, we xiya taj, lik ix ajmak uri chwach. 22We nti jun sujunik ki'ano lik nti jun imak uri, 23xwiri we ronojel ik'ux ki'an jun sujunik chwach Iwajwal Dios, lik chi'ana uri.

24Are kixok chupam i tikonb'al re i uva re ilok'anij, utz uri kitij uwach i uva le ni'pa kiwaj, xwiri mijun uwach uva kik'am b'i chupam i teb' xaq i chikach. 25Xaq are kixok chupam u-trigo ilok'anij le, xwi utz kich'up i trigo ru' i'ab', xwiri mi'at taq ru' os.

Currently Selected:

Deuteronomio 23: ACHICUB

Highlight

Copy

Compare