Deuteronomio 1
1
Ma Moisés xutaq ub'ixkil chi k-ani elik pa Horeb
1Are i tzij iri chi xub'ij ma Moisés chke konojel aj Israel are je o chila pa tz'inilik jyub' chaqij chi o prelb'al ij che i raqana Jordán, chi o chila Arabá, chwach i Suf, chkixol i tinimit Parán xaq i tinimit Tofel, Labán, Hazerot, xaq i Dizahab. 2Che i jyub' Horeb k'a che i tinimit Cades-barnea julajuj ij kupon wi jun xwiri k-e che i b'e chi k-e che jyub' Seir. 3-4Che i nab'e ij re i ik' julajuj, che i junab' kawinaq (40), ma Moisés xub'ij ronojel chke aj Israel ni'pa xub'ij i Ajwal che ire. Chuxe'el ile ma Moisés xuch'ak ma Sehón chi ajawinel ke aj Hamor chi o te'eq chila pa Hesbón xaq ma Og chi ajawinel re i tinimit Basán, chi o te'eq chila pa Astarot chi o chila che ulew Edrei. 5Are k'a je o aj Israel chila prelb'al ij che i raqana Jordán, pa tinimit Moab, i ma Moisés xub'ij usuk' i atb'al tziji chke:
6I Qajwal Dios xub'ij chwe chila pa Horeb chi kinb'ij iri chiwe: Yix ujer tan ix o chik waral puwi i jyub' Horeb. 7Chimolo b'i ub'itaq iwe, chimaja b'i ib'e, jix chwi taq jyub' ke aj Hamor xaq jix che i ulew chi o chrij chwach pacha i Arabá, chwi taq jyub', xaq chwa taq ta'aj, pa Neguev, chi taq mar, chi kulew aj Canaán, aj Líbano, k'a chila che i nim laj raqana Éufrates. 8Yin injachom ronojel ulew le chiwe yix, rumali jix xaq chix-ol chwach, man Yin chi in Ajwal, insujum chke iwatit imam chi je are mam Abraham, mam Isaac xaq mam Jacob xaq konojel ni'pa kimuq kixikin.
Uch'ikik kij i aj-atol tzij
9Julaj kanoq yin xinb'ij chiwe chi “intukel kintiki ti chiwok'axik yix iwonojel. 10K'i iwak'al uya'om Iwajwal Dios, rumali wo'or lik ix pacha jun nim laj tinimit xaq pacha i ch'umil aj chikaj: 11I Ajwal Dios chi ke iwatit imam chixuk'iyarsaj ni k'iyal lajujwinaq kamo' (1,000) chik puwi i k'iyal wo'or, xaq chuya ni utzil chomal piwi chrij pacha i sujunik chi u'anom chiwe. 12¿Wach u'anik kin-an che i k'ax laj chak re uyijb'axik i jalajuj taq tzij chixol yix xaq re uyijb'axik i jalajuj taq ich'oj? 13Rumali, chi'ulu chkixol pa taq tzob'ajil keb' oxib' achiyab' chi lik o kino'oj xaq lik kkita ub'e, chi xaq is ketiki chu'anik, man yin kin-an ni chke i achiyab' le chi je are ni ike iwaj-atzil yix.”
14Yix xib'ij chwe “lik kumaj qawach ni'pa i xab'ij le”; xixcha.
15Rumali yin xin-ul chkixol i jalajuj taq itzob'ajil yix, achiyab' chi lik o kinojb'al, xaq is ketiki chu'anik, xinya pki'ab' chi je aj-atzil piwi yix. O jujun xinya lajujwinaq kamo' (1,000) achiyab' chkiqul, xaq o xinya jo'winaq (100) achiyab' chkiqul, xaq o xinya lajuj kawinaq (50) achiyab' chkiqul, xaq o xinya lajuj achiyab' chkiqul, xaq o jujun chi xinya chkiqul chi kki'at tzij pkiwi i tzob'ajil. 16I achiyab' le, chi je aj-atzil piwi, xinya i taqaniki chke: “Chiya ixikin chkitayik konojel xaq chi'ata tzij pkiwi ike, nti k-ono we iwach tinimit o we aj naj. 17Are ki'at tzij, lik utz u'anik chi'ana che, pacha u'atik tzij puwi i b'eyom xaq keje u'atik tzij puwi i nib'a', miya taq iwach ru' jun chke lik xaqjun u'atik tzij ki'an pkiwi. Lik mixij iwib' che mijun man i atb'al tzij le re i Dios. I ch'oj we lik nim xaq kixtiki ti yix chuyijb'axik, chik'ama li chwe Yin man kin-at ni tzij pkiwi.”
18Are xinb'ij ile chiwe jela kanoq are xixintaq chu'anik ronojel ni'pa i rajwaxik chi ki'ano.
Kitaqik b'i je kab'lajuj ajtaqenel
19Are xojel chila che i jyub' Horeb, xoj-e pusuk' i jalajuj taq jyub' chila ku' aj Hamor, man keje ile xojutaq i Ajwal chi qa-Dios che. Xojb'in che nim laj tz'inilik jyub' chaqij chi lik xib'in ib' chi iwilom chik yix, k'a xojupon ni chila Cades-barnea. 20Chila che i k'ijib'al le xinb'ij chiwe: “Oj uponnaq chik che i jyub' ke aj Hamor chi are ulew ile chi kuya i Ajwal Dios chqe. 21I Ajwal, chi i Dios yix, kujach ulew le chiwe yix, lik chix-ol uri chrij chwach pacha ub'im i Ajwal chi ki-Dios iwatit imam. Mixij iwib' lik chikowij ik'ux. 22Xwiri yix iwonojel xixk'un chub'ixkil chwe: Utz we kenab'ej b'i keb' oxib' chqe yoj chrilik i ulew man keje ile kkil loq wach mer u'anom ulew le, man are ketzalij loq kkib'ij ni chqe pachike taq b'e kqamaj b'ik xaq pachike taq tinimit kojok wi.”
23Pacha i xib'ij yix chwe lik utz xinta yin, rumali xin-ul kab'lajuj chiwe yix jujun xink'am chke i jutzob'ajil. 24I kab'lajuj le xkimaj b'i kib'e xe'e chwi taq jyub' xeupon k'a chila chwa ta'aj chi Escol, xemalkat chwach ronojel i ulew man kkilo wach mer u'anom. 25Te'uri xkik'am li uwach i tikon chi o chila chwach ulew le, xkik'ut chqe xaq xkib'ij: “I ulew chi Qajwal Dios kuya chqe lik chom laj ulew. 26Xwiri yix xiwaj ti enam, xa xiqel i taqanik chi xuya i Ajwal Dios chiwe. 27Are ix o chi iwachoch xaqmanal xich'ach'a, xib'ij: I Dios tzel kojrilo man xojresaj li pa Egipto jachb'al qe pki'ab' aj Hamor kamsab'al qe. 28¿Ipa koj-e wi uri wo'or? Man i qach aj tinimit chi xe'e chrilik ulew xkib'ij chqe chi winaq chila che i tinimit le lik o ki'ij xaq lik naj kij chqawach yoj, i kitinimit lik sutim rij ru' i tapial chi lik naj elnaq b'ik, xaq xkil ne kiwach umuq uxikin ma Anac chi lik naj rij. Ile lik xresaj ronojel ukowil qak'ux.”
29Are uri xinb'ij chke: “Mixij iwib' chke. 30Man i Ajwal chi i-Dios knab'ej nu b'i chiwach xaq ku'an ni ch'oj pik'exel yix, pacha xiwilo chi xu'an chila Egipto, 31xaq pacha xu'an pa tz'inilik jyub' chaqij. I Ajwal chi i-Dios lik xixu'aluj li che ronojel i b'e k'a xixk'un ni che i k'ijib'ali ipa oj o wi, pacha jun qajawxel chi ku'aluj i rak'al.” 32Tupu xiwil ronojel ni'pa ile xwiri yix lik xikub'a ti ik'ux che i Ajwal chi i-Dios. 33Are ire le xnab'ej chiwach pa taq tz'inilik jyub' chaqij ipa xixuxlan wi. Are cha'ab' nab'e chiwach ru' jurab'aj a' xaq i pa'ij nab'e chiwach ru' jurab'aj sutz'.
I Ajwal xpe roywal chke aj Israel
34I Ajwal are xuta chi yix xaqmanal xich'ach'a, lik xpe roywal xaq lik xub'ij i tziji: 35“Mijun chke i je utz ti laj taq lemajili kril uwach i chom laj ulew chi xinsujuj chke katit kimam. 36Xwi ma Caleb, chi uk'ojol ma Jefone, kinya ni che chi kril uwach i ulew le. Xwi ire xaq i umuq uxikin kinya chke chi kkitak' b'a kaqan chwach ulew le, man ire lik xkojon chwe ru' ronojel uk'ux.”
37Xaq iwumal yix chi i Ajwal xpe roywal chwe yin man xub'ij chwe: “Xaq yet katok ti che i ulew le. 38Are ni ma Josué, chi uk'ojol ma Nun, chi teren chawij chu'anik i chak kok nu b'i pak'exel yet che i ulew le. Chaya ukowil uk'ux man are ni ire kjachaw ni ulew chke aj Israel. 39Tupu yix xikojo chi kmaj b'i iwak'al xaq iwixoqil chiwe kumal i je ajch'oj chiwij, xwiri are ni ak'alab' ile chi k'amaja kkita ub'e, are ke'ok nu b'i che ulew le; Yin lik kin-an na chi ke ike na. 40Xwiri ¡Yix chixtzalij chub'i pa tz'inilik jyub' chaqij! Xaq ¡Chixtzalij chub'i chila pusuk' i Mar Kaq!”
Kib'uyil xaq kich'akik aj Israel
41Are uri yix xib'ij chwe: “Oj makunnaq chwach i Ajwal xwiri wo'or koj-e chu'anik ch'oj pacha ub'im i Ajwal chqe.” Are uri yix xik'am b'i ub'itaq iwe pi'ab' chi ki'anb'ej ch'oj, kib'ij taq yix chi k'ax tu b'i elik puwi i jyub'. 42Xwiri i Ajwal xub'ij chwe chi kinb'ij iri chiwe: “Mix-e chu'anik ch'oj man i ajch'oj chiwij kixkich'ak na man Yin kin-e ti iwu'.”
43Yin xinsaqij chiwe xwiri yix xinikoj taj, xa xiqel utaqanik i Ajwal lik xi'an b'uy che iwib' xixel b'i chwi jyub' 44Are uri aj Hamor, chi je jeqel chila chwi jyub' le, xkitak'b'a kib' chu'anik ch'oj iwu' are uri chi xixkoqtaj pacha taq jub'an kab' chi kkoqtaj i pachin keto'tawik, xkijeq u'anik k'ax chiwe chila Seir xkimayij, k'a chila Horma. 45Are xixtzalij loq, yix lik xixo' chwach i Ajwal, xwiri Ire lik xixuta taj xaq xukoj ti retalil. 46Rumali yix xixkanaj kan chila pa Cades k'iyal ij.
Currently Selected:
Deuteronomio 1: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
