Daniel 9
9
Ma Daniel xlapan ru' i Dios xutz'onoj puwi utinimit
1Ma Darío, chi rak'al ma Asuero, chi aj pa tinimit Media, ku'at tzij puwi i ajawinik ke i aj Caldea. 2Che i nab'e junab' re rajawinik, yin ma Daniel kintijin te'eq chrajlaxik uwach i wuj re i profeta ma Jeremías, chrij i lajuj oxwinaq (70) junab' chi kik'aw na re k-antaj na chi kutij ni uyej i tinimit Jerusalén, chrij pacha ub'im i Ajwal che i profeta. 3I xin-an inlapanik xaq ni'pa i kwaj utz'onoxik che i Ajwal Dios, xinmayij inwa'im, xinkoj in-u' chi lik as xaq xinkub'i pa chaj. 4Xinlapan ru' i Ajwal in-Dios, i xinjach inmak che:
Ajwal, nim laj Dios chi xaq Ronojel Kattiki Che, chi lik arewi ka'ano pacha ab'im xaq kaya k'utb'al re i k'axnab'al ak'ux chke i k'ax katkina'o xaq kki'ano wach kub'ij i atzij apixab': 5Oj makunnaq xaq qa'anom i utz taj; lik qa'anom i utz taj; oj k'aslik i at qakojom ti pajil; lik qo'tam kan atzij apixab' xaq i ataqanik. 6Oj kojonnaq ti chke i awajchak chi je are i profeta, chi xech'aw pab'i chke taq i qajawinelab', aj-atzil xaq i qatit qamam, xaq konojel i tinimit Israel. 7Yet, Ajwal, lik at suk'ulik, xwiri yoj chi oj aj Judá lik kojk'ix che wo'or; keje pacha i je jeqel pa Jerusalén xaq pacha i jub'an chik aj Israel, ni'pa i je o naqaj xaq i je o naj, chi je jeqel pa taq tinimit ipa taq xeataq b'i yet rumal xatkiqelo. 8Yoj, Ajwal, oj keje pacha taq i qajawinelab', je aj-atzil xaq qatit qamam, lik kojk'ix che man lik oj makunnaq chawach yet. 9Xwiri chawe yet, Qa-Dios, lik awe yet i tob'al qawach xaq i kuyb'al qamak. Man yoj lik xatqaqelo 10i qaya'om ti qaxikin chatayik, Ajwal chi xaq qa-Dios, xaq oj kojonnaq ti che ak'utunik chi xaya chqe kumal awajchak chi je are i profeta 11Konojel aj Israel xekojon ti che ak'utunik xaq xkaj ti xekojon che ataqanik; rumali lik tzaqnaq pqawi yoj i k'oqonik xaq i saqinik chi tz'ib'tal kan chupam uwuj i ma Moisés chi awajchak, man oj makunnaq chawach yet. 12Yet, are kataq li jun nim laj k'ax pqawi, lik atz'aqatsam ni axib'in ib' chi xa'an chqe yoj xaq chke i xki'at tzij pqawi; man lik nti antalik chwach i jyub' ta'aj chi kmajaw i tojb'alil chi tzaqnaq puwi i Jerusalén. 13Ronojel ni'pa taq i k'axi petnaq pqawi yoj, keje pacha i atb'al tzij chi tz'ib'tal kan chupam uwuj i mam Moisés; xwiri yoj at qatzukum taj, Qajwal Dios xaq qakanam ti kan i qamak, xaq oj terejnaq ti chrij saqil laj atzij. 14Rumali, Ajwal, ayijb'am i k'axi, i ataqom li pqawi yoj; man yet Qajwal Dios, lik at tz'aqat che ni'pa i ka'ano; xwiri yoj xqaj ti xatqata.
15Qajwal Dios, yet xak'ut i nim laj acho'ab' are xeawesaj li atinimit pa Egipto, chi lik xu'an nim u'ij ab'i k'a che taq li ij le k'a are wo'or; xwiri yoj oj makunnaq i qa'anom i utz taj. 16Ajwal, qeta'am chi lik utz ak'ux. Cha'ana utzil chomal, chawesaj i nim laj awoywal puwi i tinimit Jerusalén, man ire are i nim laj atinimit, i lo'laj awulew. Konojel i winaq ke i nimaq taq tinimit chi o chrij chwach lik kkiyo'ya i Jerusalén xaq che atinimit, rumal i qamak atzalal xaq ke i qatit qamam. 17Qa-Dios chata ulapanik xaq utz'onb'enik awajchak yeti; rumal ab'i Ajwal, chawila ru' k'axnab'al ak'ux i b'isb'al laj anik chi xuk'ulmaj awachoch. 18Chojata, in-Dios lik chata; chawila ru' utayik ub'e uyej chi o pqawi xaq re i tinimit ipa koksax wi u'ij ab'i. Kqa'an ti tz'onb'enik chawe we kqab'ij chi we suk'ul taq qak'aslemal, lik are rumal i nim laj tob'al awach yet chqe. 19 ¡Qajwal, Qajwal! ¡Chojata, chakuyu qamak! ¡Chojatatb'ej, Ajwal chatpet chqato'ik! ¡Chawe yet, in-Dios, xaq rumal i nim laj atinimit, awinaq, chi kkikoj u'ij ab'i, lik matb'aytajik!
Tzijonik re i Ajwal re i lajuj oxwinaq (70) seman
20Yin xinmayij ti lapanik ru' i Dios, xinjach inmak xaq umak intinimit Israel, i xinya intz'onb'enik chwach i Wajwal Dios rumal i lo'laj rulew. 21Tz'aqat yin kintijin che i lapanik ru' i Dios, i ángel Gabriel chi winaqirnaq te'eq pinwach, krupupik xk'un ipa in o wi yin. Lik are chik i or chi ya ksujux i sipon re qajb'al ij chwach i Dios. 22I xub'ij chwe:
Ma Daniel, in k'unnaq wo'or anb'al re chawe chi kata ub'e i b'iroxiki. 23Are xajeq lapanik ru' i Dios, Ire xula' uwach chawe. Yin in k'unnaq yab'al re usuk' chawe wach i ke'eloq, man i Dios lik katraj. Rumali wo'or lik chatatb'ej wach kinb'ij chawe ri, man keje ile kata ub'e i ilik pa wachij:
24Lajuj oxwinaq (70) seman kik'aw ni
puwi awinaq xaq i lo'laj atinimit
re sachb'al uwach i qelanik xaq i mak atzalal,
keje ile kya' ni kuyb'al mak,
kya' ni atb'al tzij ronojel ij saq,
man keje ile k-antaj ni ilik pa wachij xaq i tzijonik re i Ajwal le
xaq kya' ni u'ij i lo'laj k'ijib'al chi o u'ij.
25O uchak kawetamaj xaq kata ub'e iri:
Lik are kataq
uyijb'axik xaq uyakik i tinimit Jerusalén,
k'a kupon ni i aj-atzil chi o u'ij xaq ch'ikom rij,
kik'aw ni wuqub' seman,
pa taq b'e xaq i tapial chi yijb'am chik re i tinimit Jerusalén
lik kuch'ij ni keb' oxwinaq (62) seman,
xwiri lik che taq ij le lik k'i uyej.
26Are kik'aw keb' oxwinaq (62) seman
kkamsax ni lo'laj aj-atzil chi lik ch'am xaq elsam.
I tinimit Jerusalén i rachoch i Ajwal ksachsax ni kiwach
kumal uwinaq jun ajawinel chi kk'un na.
I k'isb'al ij lik ya kk'unik pacha uk'iyal taq ya,
xaq i ch'oj lik kk'is taj
xaq i sachanik chi b'italik.
27Che chik jun seman puwi ile,
ire ku'an jun trat ku' uk'iyal winaq,
xwiri pa nik'aj che i seman
kusach ni kiwach i sipon porom xaq i jub'an chik sipon.
Xaq usujuxik jun ch'am ti laj sipon
che i k'ijib'al chi ipa ksujux wi i sipon re kojb'al u'ij i Dios,
i sachb'al chi ch'ikom rij,
k'a ktzaq ni puwi i xjeqaw u'anik i ch'am taji.
Currently Selected:
Daniel 9: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
