1 Pedro 2
2
I k'ak' tinimit re i Dios
1Rumali, chimayij u'anik ronojel i utz taj: Mixt'oronik, mi'an keb' che ipalaj; chimayij urayixik wach i ni we taj; xaq to' mich'ach'a jun chik. 2Keje pacha jun ak'al, we k'ate alaxnaq, lik kk'achirik man kraj utz'um. Keje ile chi'ana yix che utzij i Dios, man kixuk'itsaj, xaq kixuto na. 3Man keje ile, lik qatzij uri ina'om chik wach knaw utzil chomal re i Ajwal.#2.3 Cf. Salmos 34.8.
4Chixtejeb' ru' i Ajwal; man ire are ab'aj k'aslik chi xutaq li Dios; are i Jesucristo chi winaq xa xkixutuj, xwiri i Dios ucha'om na, man nim u'ij upatan uya'om. 5Yix chiya che i Dios kixuyijb'a, ix ajpatan chwach Ire, lik ix chom, xaq ix uyijb'am che i chak le. Ipatan are usujuxik sipon chwach i Dios, xwiri i sipon le chi kisujuj chwach are ik'aslemal yix. I Dios utz kril i sipon le chi kisujuj chwach, rumal i Jesucristo. 6Keje iri tz'ib'tal chupam uwuj i Dios:
pintinimit Sion, kinkoj ni jun ab'aj chi lik
nim uchak re ukub'ib'al ja, chi lik
in cha'om yin, xaq lik nim u'ij.
Pachin kukub'a uk'ux che ire le, lik ksach ti uri puk'aslemal.#2.6 Keje ile ub'im i Dios. Isaías 28.16 (gr.).
7I jun le, lik nim uchak chiwe yix chi ikub'am ik'ux che. Xwiri, i jub'an chi kikub'am ti kik'ux che, ke'el uri pacha tz'ib'tal chupam uwuj i Dios, chi keje iri kub'ij:
I ab'aj chi xkixutuj i je aj-anol ja,
are i ab'aj le xe'eloq lik nim ni uchak che i ukub'ib'al ja.#2.7 Keje ile tz'ib'tal kanoq. Salmos 118.22.
8Xaq xub'ij:
“I ab'aj le, je o ni winaq kkitakij kaqan che; xaq ketzaq na.”#2.8 Keje ile tz'ib'talik. Ike ketzaq ut man kkikoj ti utzij i Dios; are kiwach ile. Isaías 8.14.
Ike kkitakij ni kaqan man kekojon ti che i lo'laj tzij, ile lik are kmajaw chke.
9 # 2.9 Ujer, are i aj Israel winaq je ucha'om te i Dios. Xwiri, ike xko'taj kan i ki'ij. Xwiri yix wo'or ix winaq chi ix ucha'om i Dios, yix ki'an uchak jun rajpatan i Dios. Chwach i Ajwal chi ajawinel. Yix ix are jun ch'am laj tinimit;#2.9 Deuteronomio 4.20; 7.6; 14.2; cf. Tito 2.14. ix jun tinimit chi lik re Ire. Keje ile u'anom chiwe man kib'ij ni chke i winaq wach i nimaq taq anik u'anom i Dios#2.9 Isaías 43.21; Hechos 2.11. chi ix usik'im ru', elsab'al iwe pa equmal, oksab'al iwe pa saq ru' Ire. 10Yix, ujer ix utinimit ti i Dios, xwiri wo'or lik ix utinimit chik Ire. Yix, ujer i Dios xril ti tob'al iwach, xwiri wo'or lik rilom chik tob'al iwach.#2.10 Oseas 1.6,9; 2.23; cf. Romanos 9.25-26.
Utz laj k'utunik
11Wachalal chi lik kixwaj, kinlapan iwu' pacha taq ix winaq ix aj naj chi xa ix aj-ik'awel waral chwach i jyub' ta'aj. Rumali, kintz'onoj utzil chiwe, chi lik chi'atij irayijb'al chi xa re ich'akul, man i rayijb'al le xa ku'an ch'oj ru' iwanima. 12I winaq chi keta'am ti Dios, kkib'ij chi yix ix utz ti laj taq winaq. Xwiri, chom chix-ol chkiwach ike, keje ile kkil na, chi utz kixtijin chu'ankil; te'uri kkikoj u'ij i Dios are kuriq i ij chi kk'un chu'anik i atb'al tzij pqawi.
U'anik i taqanik ke aj-atol tzij
13Rumal i Ajwal, yix chiya iwib' pki'ab' i raqan u'ab' i atb'al tzij. Chikojo i atz laj atol tzij aj Roma, man ire lik atz upatan, 14Chixkojon chke i raqan u'ab' i atol tzij chi keutaq b'ik, man ike kkiya utojb'alil chke i winaq chi utz ti kki'ano, xaq kkikoj ki'ij i winaq chi utz i kki'ano. 15I Dios kraj chi yix lik ki'an i utz, atb'al kichi' i jub'an chi je sachnaq xaq kixkich'ach'a; keje ile kkimayij ub'ixkil i tzij chiwij chi nti uchak.
16Yix ix o ti pu'ab' jun chik winaq, man ix rajchak i Dios, xwiri ru' ile mich'ob' taq yix chi utz we ki'an i utz taj. 17Lik chiya ki'ij konojel: K'ax cheina iwachalal chwach i Cristo; chiya u'ij i Dios; xaq chiqajsaj i'ij chwach i atz laj atol tzij.
I anik chi o chkiqul i je ajtaqon
18Yix, chi ix taqon, chiya iwib' pki'ab' iwajaw; lik cheikojo, nti k-ono we je utz, xaq we je utz taj, xaq we je k'an, lik cheikojo. 19Utz ki'ano we kich'ij ni'pa taq i k'ax chi kya' piwi tupu nti imak. We keje ile ki'ano alaj uri chi kiwaj u'anik i chom chwach i Dios, i Dios lik utz uri krilo. 20Xwiri we yix kitij i k'ax xa rumal imak i'anom, i kich'ij i k'ax le ru' unimal ik'ux, ¿Utz nawi uri kril i Dios ile? Xwiri we yix kitij i k'ax xa rumal jun utz i'anom i kich'ij i k'ax le ru' unimal ik'ux, ile chom uri kril i Dios.#2.20 Efesios 6.5-8; Colosenses 3.22-25; 1 Timoteo 6.1-2. 21Are kraj i Dios ile chiwe rumali xixusik'ij ru'. Chk'un chik'ux, i Cristo xutij uyej tob'al iwe yix. Keje ile uk'utum kan chqe wach usuk' i terejik chrij Ire. 22Ire lik nti umak xu'ano, xaq lik nti jun t'oronik xu'ano. 23Are xyo'yax kumal i winaq, ire xula' ti uwach chke. Are xki'an k'ax che, Ire lik nti jun tzij re okb'al il xub'ij chke; xa xukub'a uk'ux che i Dios, man reta'am chi u'atb'al tzij i Dios lik suk'ulik. 24Lik are i Jesucristo xreqaj i qamak che uch'akul are xuya rib' chi xkamsax chwach i krus. Keje ile xu'an chqe chi kkam ni i mak atzalal chqe, xaq kojk'asi ni che jun k'aslemal utz i suk'ulik. Xwi ta la ile, i Jesucristo xuch'ijo chi xsoktajik tob'al iwe yix.#2.24 Isaías 53:5. 25U'onom loq, yix ix keje pacha i chij chi sachnaq,#2.25 Isaías 53:6, Ezequiel 34:23. xwiri wo'or ix tzalijnaq chik ru' i Cristo, chi ajchajal re iwanima. Ire kixuchajij pacha jun ajyu'ul chij chi keuchajij uchij.
Currently Selected:
1 Pedro 2: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
