Popular Bible Verses from 1 Pedro 2

Share

Xwiri yix wo'or ix winaq chi ix ucha'om i Dios, yix ki'an uchak jun rajpatan i Dios. Chwach i Ajwal chi ajawinel. Yix ix are jun ch'am laj tinimit; ix jun tinimit chi lik re Ire. Keje ile u'anom chiwe man kib'ij ni chke i winaq wach i nimaq taq anik u'anom i Dios chi ix usik'im ru', elsab'al iwe pa equmal, oksab'al iwe pa saq ru' Ire.

Lik are i Jesucristo xreqaj i qamak che uch'akul are xuya rib' chi xkamsax chwach i krus. Keje ile xu'an chqe chi kkam ni i mak atzalal chqe, xaq kojk'asi ni che jun k'aslemal utz i suk'ulik. Xwi ta la ile, i Jesucristo xuch'ijo chi xsoktajik tob'al iwe yix. U'onom loq, yix ix keje pacha i chij chi sachnaq, xwiri wo'or ix tzalijnaq chik ru' i Cristo, chi ajchajal re iwanima. Ire kixuchajij pacha jun ajyu'ul chij chi keuchajij uchij.

Yix, ujer ix utinimit ti i Dios, xwiri wo'or lik ix utinimit chik Ire. Yix, ujer i Dios xril ti tob'al iwach, xwiri wo'or lik rilom chik tob'al iwach.

Keje pacha jun ak'al, we k'ate alaxnaq, lik kk'achirik man kraj utz'um. Keje ile chi'ana yix che utzij i Dios, man kixuk'itsaj, xaq kixuto na.

Wachalal chi lik kixwaj, kinlapan iwu' pacha taq ix winaq ix aj naj chi xa ix aj-ik'awel waral chwach i jyub' ta'aj. Rumali, kintz'onoj utzil chiwe, chi lik chi'atij irayijb'al chi xa re ich'akul, man i rayijb'al le xa ku'an ch'oj ru' iwanima. I winaq chi keta'am ti Dios, kkib'ij chi yix ix utz ti laj taq winaq. Xwiri, chom chix-ol chkiwach ike, keje ile kkil na, chi utz kixtijin chu'ankil; te'uri kkikoj u'ij i Dios are kuriq i ij chi kk'un chu'anik i atb'al tzij pqawi.

Yix chiya che i Dios kixuyijb'a, ix ajpatan chwach Ire, lik ix chom, xaq ix uyijb'am che i chak le. Ipatan are usujuxik sipon chwach i Dios, xwiri i sipon le chi kisujuj chwach are ik'aslemal yix. I Dios utz kril i sipon le chi kisujuj chwach, rumal i Jesucristo.

Rumali, chimayij u'anik ronojel i utz taj: Mixt'oronik, mi'an keb' che ipalaj; chimayij urayixik wach i ni we taj; xaq to' mich'ach'a jun chik.

Chixtejeb' ru' i Ajwal; man ire are ab'aj k'aslik chi xutaq li Dios; are i Jesucristo chi winaq xa xkixutuj, xwiri i Dios ucha'om na, man nim u'ij upatan uya'om.

Yix ix o ti pu'ab' jun chik winaq, man ix rajchak i Dios, xwiri ru' ile mich'ob' taq yix chi utz we ki'an i utz taj.

I Dios kraj chi yix lik ki'an i utz, atb'al kichi' i jub'an chi je sachnaq xaq kixkich'ach'a; keje ile kkimayij ub'ixkil i tzij chiwij chi nti uchak.