रोमियून 4
4
अब्राहमो को उदारण
1अब हम यहूदी हुना का नाते अपून पुरखा अब्राहम का बारिमें कि कुंनू? उ कसकै धर्मी गिनी ग्यो? 2किलैंकी अगर अब्राहम निका कामून ले धर्मी गिनी जानो, त ऊस घमण्ड करना को कारण हुनो। लेकिन उ परमेश्वरा का सामुनि अपून निका कामून को उ घमण्ड नै कर सकनो, 3पवित्रशास्त्र कि कुंछो? यो कि “परमेश्वर ले जो क्योछ अब्राहम ले उमें विश्वास करछ्य, और उ परमेश्वरा का नजरून में धर्मी गिनी ग्यो।” 4और काम करूनवाला की मजूरी दीनो दान नै हुनो, लेकिन उ मजूरी उको हक्क समझी जाछो। 5और जो परमेश्वर की दया स हासिल करून खिन काम नै करूनो, 6इसीकैं दाऊद उ आदिमी स धन्य कुंछो, जैस परमेश्वर कामून का बिना धर्मी ठैहरूछो, लेकिन जो पापी लोगून धर्मी ठैहरून वाला परमेश्वर में विश्वास करनान, उक विश्वास उ खिन धार्मिकता गिनी जाछो। 7धन्य उन छन, जिनारा बुर काम परमेश्वरे ले माफ कर्यान, और जिनारा पाप उले माफ कर दीयान। 8धन्य छन उन आदिमी जिनोरो पापून को हिसाब परमेश्वर नी लीन।
9तो क्या यो भलि बात, खतना वालान खिन छै, या बिना खतना वालान खिन लै छै? हम यो कुंनू, जो पवित्रशास्त्र में लिख रैछ, “अब्राहम खिन उको विश्वास परमेश्वरा का नजर में धर्मी गिनी ग्यो।” 10तो यो कब भ्योछ? खतना की हालत में या बिना खतना की हालत में? खतना की हालत में नै पर खतना होईन भटे पैलि होईना को छ्यो। 11परमेश्वरे ले ऊस विश्वासा का द्वारा धर्मी ठहराछ जब उको खतना नी होईना को छ्यो। खतना को चिन एक मुहर की छापे की नियाती छै। येक कारण, उ उन लोगून को आत्मिक बाब छै जिनारा पास विश्वास छै और उनोरो खतना नै होरियो। उनून उनार विश्वासा का कारण धर्मी ठहराला। 12और अब्राहम खतना करीन वालान को पुरखा छै, जो नै केवल खतना मेंई भरोस राखनान, लेकिन जिनारा पास ऊसो विश्वास छै, जसो हमार पुरखा अब्राहमो को छ्यो, जो उले खतना करून है पैलि करिनाको छ्यो।
विश्वासा का द्वारा वादा को पुरो हुनो
13परमेश्वरे ले अब्राहम और उक बंश थैं वादा करछ्य कि उ पुर संसारो को हक्कदार होलो। यो येक कारण नै भ्यो कि अब्राहम ले नियम-कानून को पालन करछ्य, लेकिन उले विश्वास करछ्य, और उ परमेश्वरा का नजर में धर्मी गिनी ग्यो। 14अगर अब्राहम और उक बंश स यो वादा यो कारण दी ग्योछ किलैंकी नियम-कानून को पालन करछ्य, त विश्वास बेकार और वादा बेअसर साबित हो ग्यो। 15परमेश्वर उन सबून में क्रोध करछो जो नियम-कानून स पुर रीतिले नै मानना, और जाँ नियम-कानून नै हुना वाँ उको तिरीसकार ले नै हुनो।
16येक कारण लोगून ले विश्वासा का द्वारा परमेश्वरो को वादा हासिल करछ्य। इसो येक कारण हुछो ताकि वादा अनुग्रह ले हासिल हो। तब अब्राहम की सब संतानून को उ वादा पुरो हो सकछो। यो केवल उनून खिन नाहातिन जो मूसा का नियम-कानून का अधीन रूनान, बल्कि हरेक उ आदिमी खिन छै जो अब्राहमाक नियाती विश्वास में जीछो, जो हम सबून को पुरखा छन। 17जसो पवित्रशास्त्र कुंछो कि “मैंले तैंस भौत जातिन को पूर्वज ठैहरा रैछ, उले उ परमेश्वर में विश्वास करछय।” और जो मरीनाक लोगून ज्यून करछो, और जो बात छन ले नै, उनोरो नाम इसकैं लीछो, की माना उन छन। 18अब्राहम निराशा में ले आश राखभेरन विश्वास करछ्य, येक कारण कि उ वचना का अनुसार कि “तेरो बंश इसो होलो,” कि भौत जातिन को बाब हो। 19अब्राहम ले देखछै की उ नान्तिनो पैद करून खिन भौत बुढ़ हो ग्यो छ्यो, किलैंकी उ लगभग सौ सालो को छ्यो। और सारा है ले अब नान्तिनो पैद नी हो सकछी। लेकिन अब्राहम यो जाणभेरन ले विश्वास मजबूत बनिनाको र्योछ, 20और नै अविश्वासी होभेरन परमेश्वरा का वादा में शक करछ्य, लेकिन विश्वास में मजबूत हो भेरन परमेश्वर की महिमा करछ्य। 21और यो बात में ले भरोसा करछ्य की जो वादा परमेश्वरे ले कर रैछ ऊस पुरो करून में उ सामर्थी छै। 22और उक विश्वास कारण उ परमेश्वर की नजर में धर्मी गिनी ग्यो। 23और “यो विश्वास उ खिन धर्मी गिनी ग्योछ,” नै केवल उ खिन लिख रैछ, 24लेकिन हमून खिन ले छै, अगर हम ले परमेश्वर में विश्वास करला, जेले हमार प्रभु यीशु स मरिन में भटे ज्यून करछय, त हम ले विश्वास का कारण धर्मी गिनी जूला। 25यीशु मसीह हमार पापून खिन मारी ग्यान, और परमेश्वरे ले दुबारा मरिन में भटे ऊस ज्यून कर दीछ ताकि हम धर्मी ठैहराई जाँ।
Currently Selected:
रोमियून 4: SORNT
Highlight
Share
Copy
Want to have your highlights saved across all your devices? Sign up or sign in
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
