Looma 2

Tsundusu butsiitsa ya Nzambi

1Ni mu buuna, pasi wu we li, we wu ubaatsundasa bana, we utwala uleele ve ti we ayaabi ve. Bu we ubaatsundasa bana, we li mu usyembe we mwakulu. Mu toni ati, we wu ubaatsundasa bana, we kaka ubaavanga mamabi we bo.#2Sa 12.5 2Bisu liyabi ti Nzambi ubaatsundasa mu imbuli hyosi, baatu ba bubaavanga ma pila yiina. 3We wu li mu utsundasa ba bubaavanga mamabi, ka we li mu uvanga bumosi we bo! Mu we ti we upeke tsundusu a Nzambi? 4Buve, we bubwe bu bunene bwa Nzambi ubaapenye, mu mukami a nde na bunene bu mutima a nde? We a hayabi ve ti bubwe bwa Nzambi buli mu ubita we hu usobo mbiili?#Esa 30.18 5Ka mu toni a kamini mutima a we, we a hasobo mbiili ve. Buuna, we li mu ukuukaha ŋa yulu a we mwakulu kesi yinene, mu ilumbu hi Nzambi humwese kesi a nde, na tsundusu a nde ya tsiitsa. 6Ilumbu mohiina, Nzambi usyende muutu muutu we bu huli mavanga ma nde.#Yel 17.10; 31.2-19 7Nzambi uva monyi wu bilima na bilima huli ba bali na mukonono wu ubaavanga mambu mamabwe. Bo bali mu usaha muyusu, likiinzu na idiingu hi hyuvelekwa. 8Ka Nzambi umwese kesi na ifwefwe hya nde, huli boosi ba bubaatunala nde na ba bubaasiila nde kene. Mbiili moyiina, yibaatelemene imbuli na yibaasingasala mavanga mamabi. 9Mapasi na minyongi byubwila boosi ba bubaasalila bubi. Hati a tsomi Bayudaayo, titswene ba baavele Bayudaayo! 10Ka Nzambi uva muyusu, likiinzu na hyenze huli pasi nde wu ubaasalila mavanga mamabwe. Hati a tsomi Bayudaayo, titswene ba baavele Bayudaayo!#2Mi 19.7; Yob 34.19 11Mu toni ati, Nzambi a hubaasa burandu mu baatu ve.

12Boosi ba bubaasumaha hwavele uyaaba Mikele mya Moose, buunyambana tso bu baaveleyaaba Mikele momiina. Ka boosi ba bayaabi Mikele na bubaasumaha, buutsundasa bo mu Mikele momiina. 13Ni mu buuna, a ba bali mu uyuha Mikele bali ba baakuha ŋa busu bwa Nzambi ve, ka ni ba bali mu usalila myo, buuba ba baakuha. 14Ŋa Bangoyi ba baaveleyaba Mikele mya Nzambi, bubaasalila myo mu bo mwakulu, bo boosi we ba bali na myo hutso mitima mya bo, tso bu bo baaveleyaba myo. 15Mu mbiili a bo yiina, bo bali mu umwese ti mavanga ma Mikele mili mu utuma, baasonehe mutso mitima mya bo. Tsikihili a bo yi misamu, yili mu uta imbangi. Ni bumosi kaka, matsimi ma mitima mya bo, mubaakese bo, buve mubaavolele bo milembe. 16Maana ni ma mu umonehele, ilumbu hi Nzambi huutsundasa matswehi ma pasi muutu, mu nduhi a Yisu Kristo, we bu Musamu wu Mubwe wu me ndi mu unzaabisa ali mu umwese.

Mbiili Bayudaayo ŋa busu bu Mikele

17Ka we wu li mu ubula mabyoho ti we Muyudaayo, we li mu usiingama mu Mikele na we li mu unyeme ti Nzambi, Nzambi a we. 18We yaabi litondo la Nzambi, na Mikele mili mu ulongese we mu usoolo mamabwe ma muutu huutwala uvanga. 19We li mu umonehele ti, we ni mubiti binzimana wu li mu ulaha bo nzila. We li mu umonehele ti, we ni liyalala la ba bali mu piipidi. 20We li mu umonehele ti, we mulongisi a ba baavele na nzabili, muyihisi bibabana. Eye, we li na hiitu ti hutso Mikele, we ubaha nzaabili na imbuli! 21Ni mu buuna, we wu li mu ulongese bakima, muhima we avelelongese we mwakulu? We wu li mu uyaabisa bana ti uyiba ve, muhima we li mu uyiba? 22We wu li mu uleele ti mayamba usa ve, muhima we li mu usa mayamba? We wu li mu ubelele bifwita, muhima we li mu uyiba bisiha bi bili mu manzo ma nzambi ma bifwita? 23We wu li mu ubinuha ti we na Mikele mya Moose, we li mu umwese Nzambi tsogni mu toni ati, we li mu uvanga ma maasoboono na ma Mikele mili mu utuma! 24Ni mu buuna, ma baasonehe mali mu uleele: «Ni mu toni a benu Bayudaayo, bangoyi bali mu ukwede nduhi a Nzambi.»#Esa 52.5; Ezk 36.23

Ketili ya mbuli

25Mu mbuli, ketili yili na tsongo mu we, tso we li mu usalila Mikele. Ka tso we li mu utsoopolo Mikele, hu li mu umwese ti we kini a baakete ve. 26Tso muutu wu baavelekete li mu usalila Mikele mya Nzambi, Nzambi utwala usiinga nde we muutu wu baamiikete ve? 27Muutu wu baavelekete mu musunya, ka ubaasiingala Mikele, utsundasa we, we wu li mu usumana Mikele, tso bu we ayaaba Mikele mibaasonehe tso bu we li wu baakete. 28Ni mu buuna, Muyudaayo wa mbuli, a ni wu ubaamonehele ŋa miisu ma baatu ti nde Muyudaayo ve, na wu li na iliimbu hya ketili mu musunya a nde. 29Ka Muyudaayo wa mbuli ni wu li wa mu tswehi, wu baakete hutso mutima, mu ketili yi Livupu la Nzambi, kini a yi baasonehe mu Mikele ve. Muyudaayo wa mbuli, ni nde wuuna wu ubaayaka muyusu wu ubaamata huli Nzambi, ka a huli baatu ve.#Pfu 10.16; Yel 4.4

Currently Selected:

Looma 2: TSA

Highlight

Copy