Malako 8

Yisu miiliisala biveeve bina bya baatu

Mty 15.32-39

1Mu bilumbu mo biina, koonge yinene ya baatu yaabweyadiinga Yisu. Bu bo baaba baavele na byudya, Yisu ateeli bayihi ba nde na aleeli bo. 2«Me ndi mu umono lingebe mu tooni a baatu mo baniiba. Lolo yiniiyi huka bilumbu bitatu bi bo bali mu ukwilala na me, na bo a bali na tso isiha hyudya ve. 3Tso me pfutili bo mu manzo ma bo nzala, bo buukolo binama mu nzila, mu tooni ati, bamosi mu bo baamata lala.» 4Bayihi ba nde baafutili nde: «Huni luutwala ubaha mapa ma uywatisa bo ŋa ibiingi hi ive na ive hiniihi?» 5Yisu afuuli bo: «Mapa kwe benu lili na mo?» Bo baaleeli: «Tsambu.» 6Nde atumi koonge a baatu mu utsahala ŋa toto. Titswene, hu mbisa uvolo mapa matsambu na ufutala matondo huli Nzambi, nde akesi mo na aviidi huli bayihi ba nde mu ukabila huli boosi. Bo baakabi mo huli koonge a baatu. 7Bo baabweba kaka na mwana a batswi. Hu mbisa umana usyeme batswi, Yisu abweleele huli bayihi mu ukaba kaka batswi. 8Baatu baadiidi na baaywaati, na baatoli byebe tsambu bi byaluuli mu bitini bi mapa bi byasalili. 9Litangu la ba baaba baatsahala ŋaana aba bebele biveeve bina (4 000). Titswene Yisu afutili bo. 10Masulubete, nde anami hyabu na bayihi ba nde na baayeni hu itaanzi hya Dalamanuta.

Bafarisi bali mu uvondo iliimbu hya kimuhili huli Yisu

Mty 16.1-4

11Bafarisi baayidi, baabaandihi ukaakana na Yisu mu utehele nde mweto. Bo baakasaha iliimbu hya kimuhili hi hyumata hu yulu. 12Yisu asuusi ivuumi na aleeli: «Mu hima baatu ba tuungi mo liniili bali mu usaha iliimbu? Mu mbuli me ndi mu undeele benu, a buuva iliimbu tso imosi huli tuungi mo liniili ve!» 13Buuna, nde asiisi bo na abwenama mu hyabu mu uyene hu simu lina.

Levure bibaayaka bafarisi na la Eloode

14Bayihi baavusihini ubita mapa. Bo baaba ndulu na lipa limosi mutso a hyabu. 15Yisu aviidi bo tumili mo yiniiyi: «Dibulaani miisu! Kebaani mu levure#8.15 levureIloho hi hibaadanisa paate. bibaayaka Bafarisi na mu levure la Eloode#Mty 16.6; Luk 12.1 .» 16Bayihi baakakaakana ŋa hati la bo mu tooni ati, bo a baabeedi na mapa ve. 17Bu Yisu haayaabi ma maakavyoho, nde afuuli bo: «Mu hima benu lili mu ukaakana na uleele ti benu a lili na mapa ve? Benu a laasinzatsikaha ve? Benu nzaabili ve? Mitima mya benu bunono mili?

18Benu lili na miisu,

na benu a lili mu umono ve?

Benu lili na matswi,

na benu a lili mu uyuha ve?

Benu a lili mu uyibwala moonyi ve#Yel 5.21; Ezk 12.2,

19Ŋa me atabuli na ukaba mapa ma mataanu huli biveeve bi bitaanu bya baatu, byebe kwe bi byaluuli mu bitini bi mapa benu laabiti?» Bo baafutili: «Kuumi na byole.» 20«Na ŋa me akesi mapa matsambu mu tooni a biveeve bina bya baatu, byebe kwe bi byaluuli mu bitini bi mapa benu laabiti?» Bo baafutili: «Tsambu.» 21Buuna Yisu aleeli bo: «Benu kini a laamaatsikaha ve?»

Yisu miibeeloso inzimana

22Bo bamiito hu Betesayida; baatu bamiibehele Yisu inzimana, na bamiiyayaana nde mu ubeembe nde. 23Yisu akaangi inzimana mu hooho na abiti nde hu muvaanga a bula. Titswene hu mbisa utuutala nde maate mu miisu, nde asuusili nde myoho na afuuli nde: «We miimono isiha?» 24Inzimana hyasiimbuli miisu na hyaleeli: «Me ndi mu umono baatu; bo bali we miti mi me ndi mu umono mu uyene.» 25Titswene, Yisu abwesuusala myoho ŋa yulu a miisu ma muutu mo. Nde amoni bubwe-bubwe: nde abeeluhi, nde akamono bisiha byosi na lisobosono. 26Buuna, Yisu afutili nde hu nzo a nde na aleeli: «A haabila hwawe ukoto tso hutso a bula.»

Peetelo miisilasa ti Yisu ni Masiya

Mty 16.13-20; Luk 9.18-21

27Titswene, Yisu na bayihi ba nde baayeni hu tsyelo a mala ma mali bebele na Sezare ya Filipo#8.27 Sezare ya Filipo musyenge wu bibaayaka bebele na mitswe mya nzali a Yolodani, wu Filipo haatuungi.. Mu nzila, nde akafuula bayihi ba nde: «Mu uyuha bitoyili bya baatu, ti na me ndi?» 28Bo baafutili nde: «Bamosi bali mu uleele ti, we Yowani Mutondihi we bibaayaka, bakima ti, we Eliya we bibaayaka; bakima kaka ti, we mumosi mu mimbihuli we bibaayaka.» 29Na Yisu afuuli bo: «Ka benu buni lileeli, ti me na me ndi?» Peetelo akaali nde: «We ni Masiya!» 30Yisu akebisi bo mu mifudi, mu uveleyambila mu nde huli pasi muutu.

Yisu miiyabisa lipfu la nde na miisyembe Peetelo

31Yisu abaandihi ulongese bo ti hwafwana ti Mwana a muutu asinzamono pasi, banyanza nde huli mikukunyungu, huli bakuutu ba bangaanga ba Nzambi na huli milongisi mi Mikele; hwafwana ti baduba nde, na nde asuuha mu babaakwa humbisa bilumbu bitatu. 32Nde akaleele dyambu mo liina paayalala. Buuna, Peetelo abiti nde ŋa muvanga na abaandihi usyembe nde. 33Ka Yisu akinguhi, atali bayihi ba nde na asyembi Peetelo hu unono: «Yene, vyoho hu mbisa a me, Saatana! Mu tooni ati, matsimi ma we a mali matsimi ma Nzambi ve, ka mo mali ma baatu.»

Buni laafwana uduukala Yisu

34Yisu ateeli koonge a baatu na bayihi ba nde na aleeli bo: «Tso muutu tondi uduukala me, anyaha utsima mambu ma nde mwakulu, nde abita kuruwa a nde pasi ilumbu, na aduukala me#Mty 10.38; 16.24; Luk 9.23; 14.27 . 35Buuna, muutu wu toondi ufuuhasa idiingu hya nde, unyambasana hyo; ka wu unyambasana idiingu hya nde mu tooni a me, na mu tooni a Musamu wu Mubwe, ufuuhasa hyo. 36Ki kaluha muutu hubaha tso nde bahi toto yoosi, na uvinda muvumu a nde? 37Hima muutu huutwala uva ŋa ikiisa hi idiingu hya nde? 38Ni mu buuna, woosi wu umono tsonyi mu me na mu mambu ma me ŋa busu bwa tuungi bibaayaka mayamba na la tsumihili mo liniili, Mwana a Muutu kaka umono tsonyi mu nde, ŋa nde huuya hutso muyusu a Taata a nde na bapofi bangidi.»

Currently Selected:

Malako 8: TSA

Highlight

Copy

Compare