Malako 10

Bafarisi bamiitehele Yisu mweto

Mty 19.1-12; Luk 16.18

1Yisu miimata ŋaana, na miiyene hu itaanzi hya Yude hi hili hu simu lina la Yolodani. Koonge a baatu yaabwekuukama ŋa pedu a nde; na nde akalongese bo we bu hwaba ipfu hya nde#Mty 19.1 . 2Kabu bibaayaka Bafarisi laayidi huli Yisu mu utehele nde mweto na baafuuli nde: «Baava muswa huli mulumi mu ubinga mukadi a nde?» 3Yisu akaali bo mu hyuhu: «Ki mukele Moose haaviidi benu?» 4Bo baaleeli ti: «Moose aviidi muswa mu usonehe muhanda a tsalili makweele, na wu ubinga mukadi a nde#Pfu 24.1; Yel 3.1; Mty 5.31 .» 5Buuna Yisu aleeli bo: «Ni mu tooni bunono bu mitima mya benu, Moose haasonihi tumili mo yiina. 6Ka ŋa mbandu a pangili a tsi, Nzambi “avaangi bo bahala na mukaasu#Mba 1.27; Mty 19.4 .” 7“Ni mu buuna, bahala umata mu nzo a taata na ngu a nde na nde ukangama na mukadi a nde, 8na bo a basaali boole ve, ka nyutu ndulu mosi.” 9Buuna, nyaha muutu aveletahula bi Nzambi haapfuuta.» 10Bu bo baayafutaha hu nzo, bayihi kaka baabwefuula Yisu mu musamu mo wuuna. 11Nde aviidi bo mvutu: «Pasi muutu wu ubinga mukadi a nde na ubwekwele mukima, miisa mayamba huli mukadi watsomi. 12Na tso mukaasu wu baakwele bingi mulumi a nde, na kweeli mukima, nde miisa mayamba.»

Yisu miisyeme baana

Mty 19.13-15; Luk 18.15-17

13Baatu baabehili Yisu baana, mana nde abeembe bo#10.13 mana nde abeembe bo Peleve iliimbu hi ubeembe mu ubeeloso bo. . Ka bayihi baasyembi bo.

14Bu Yisu haamoni buuna, nde amoni lingebe na aleeli huli bayihi ba nde: «Nyahaani bibabana biya huli me, a likubasa bo ve; mu tooni ati, Ipfumu hya Nzambi hili hya ba baafwanina na bo. 15Mu mbuli me ndi mu undeele benu, woosi wu uveleyaka Ipfumu hya Nzambi we imwamwana, a huukoto huuna ve.» 16Titswene nde avoli baana, abuumbi bo na asyemi bo mu usuusala bo myoho.

Busina na Ipfumu hya Nzambi

Mty 19.16-30; Luk 18.18-30

17Bu Yisu haakayene mu nzila, bahala limosi laayidi tiinu, laatsokimi ŋa busu bwa nde na laafuuli nde: «Mulongisi wu mubwe, hima me apfwana usa mu ubaha moonyi wu bilima na bilima?» 18Yisu aleeli nde: «Mu hima we bibaayaka mu uteele me wu mubwe? A hu bibaayaka na muutu tso mumosi wu bibaayaka wu mubwe ve, vengo Nzambi siha. 19We yaabi Mikele: “A duba ve, a sa mayamba ve, a yiba ve, a ta imbangi hi upfuta mu muutu ve, a va muutu mbele ve, kiinza taata a we na ngu a we#Pal 20.12-16; Pfu 5.16-20; Pfu 24.14.”» 20Bahala laafutili nde: «Mulongisi, me atsingili matumili mo maana moosi umata bufudu bwa me.» 21Yisu atali bahala, atondi lo na aleeli lo: «Isiha ndulu imosi hyamiivele we: yene, yasumbasa byosi bi we bibaayaka na byo na va mbongo a fwanda huli biyaha, na we ubaha busina hu yulu. Titswene yaanga, duukala me.» 22Ka hu mbisa uyuha mambu mo maana, bahala laasulimini binama, na lo laayeni na lingebe, mu tooni ati, lo laaba na busina bu bulahi. 23Yisu atala bayihi ba nde ba baaba baadiinga nde, nde aleeli bo: «Hu bibaayaka pasi mu bisina mu ukoto mu Ipfumu hya Nzambi!» 24Bayihi baamoni boomo bu baayuhi mambu mo maana. Ka Yisu abweleele bo: «Baana ba me, ki pila a pasi mu ukoto mu Ipfumu hya Nzambi! 25Hwaleenge huli buuru nga irunga mu uvyoho ŋa vulu la tsongi, ka a huli isina mu ukoto mu Ipfumu hya Nzambi ve.» 26Bayihi baabwesinzakimuha, na baakaleelesene: «A ka bunuubu, na utwala uyoboho?» 27Yisu atali bo na aleeli: «Hubaakondosono huli baatu, ka a huli Nzambi ve, mu tooni ati, Nzambi ubaatwala moosi.» 28Buuna, Peetelo aleeli nde: «A ka bisu! Bisu laamiisiisa byosi mu uduukala we.» 29Yisu afutili nde: «Mu mbuli me ndi mu undeele benu, tso muutu siisi nzo a nde, baana ba ngu a nde, bakedi ba nde, ngu a nde, taata a nde, baana ba nde, buuve mangundu ma nde mu tooni a me na mu tooni a Musamu wu mubwe, 30nde sa ayaka mu taangu mo yiniiyi kama-kama: mu manzo, baana ba ngu, bakedi, bangu, baana, mangundu, na mbingisili kaka. Na mu taangu yi yili mu uya, nde sa ayaka moonyi wu bilima na bilima. 31Baatu ba balahi ba bali lolo yiniiyi batsomi, buuba baatu ba tsyelele, na baatu ba tsyelele, buuba baatu batsomi.»

Yisu bibaayaka mu uyabisa yabisa bibaayaka mutatu lipfu na tsuuhili a nde

Mty 20.17-19; Luk 18.31-34

32Bo baaba mu nzila mu ukumasa hu Yeruselemi, na Yisu ateehili bayihi. Bayihi baaba na tsisu, na ba baakaduukala bo baaba na boomo. Yisu abwevolo bayihi bakuumi na boole na nde abaandihi uleele bo ma muuyiila nde mu mwana a taangu hoole. 33«Yuhaani! Bisu a benu lika mu ukumasa hu Yeruselemi, hu buuyeholo Mwana a muutu huli bakuutu ba bangaanga ba Nzambi na huli milongisi mi Mikele. Bo buubelese nde mu lipfu, na buuyeholo nde huli bakuutu ba bangoyi. 34Bangoyi buusyebe nde, buutuula nde maate, buufwiinza nde bikooti na buuduba nde. Hu mbisa bilumbu bitatu, nde usuuha mu babaakwa.»

Pondili a Yaki na Yowani

Mty 20.20-28

35Buuna, baana baboole ba Zebedayi, Yaki na Yowani, baayasusaha huli Yisu na baaleeli nde: «Mulongisi, bisu litondi ti we siila bisu bibaayaka bisu luuvondo we.» 36Yisu aleeli bo: «Hima benu litoondi ti me tsiila benu?» 37Bo baafutili nde: «Ŋa we uba hutso muyusu a we, va bisu hyese hi utsahala ŋa pedu a we, mumosi ŋa mbahala a we, mukima ŋa kaasu a we.» 38Ka Yisu aleeli bo: «Benu a liyaabi hi benu lili mu uvondo ve! Benu luutwala unywa mbuungu mapasi yi me unywa, buuve uyaka tondihili yi me unzaka?» 39Bo baafutili nde: «Bisu luutwala.» Yisu aleeli bo: «Benu luunywa mbuungu yi me unywa, na benu luuyaka tondihili yi buutondehe me#Mav 12.2. 40Ka mu bibaayaka litali wu utsahala ŋa mbahala a me, buuve ŋa kaasu a me, a me upa muswa ve. Mambuha mo maana mali ma bo baana ba baamiivangila mo.»

41Bu bayihi bakuumi bakima baayuhi maana, baanyongili Yaki na Yowani. 42Buuna, Yisu ateeli bo boosi na aleeli bo: «Benu liyaabi lo. Batumi ba matsi, bubaatuma baatu ba bo na matwala moosi. Na bapfumu bubaanangimana baatu. 43Ka a hwafwana uba buuna ŋa hati la benu ve. Homo, muutu wu toondi uba mukuutu ŋa hati la benu, sa aba musalili a benu, 44na muutu wu toondi uba watsomi ŋa hati la benu, sa aba muviha a boosi. 45Mu tooni ati, Mwana a muutu a haaya mana basalila nde ve, ka mu usalila baatu na uva muvumu a nde we kodi mu uyobolo ba balahi#Yow 13.14; Flp 2.7; Efe 1.7; Kol 1.4; 1Ti 2.6; Tit 2.14 .»

Yisu miibeeloso inzimana Baritime

Mty 20.29-34; Luk 18.35-43

46Yisu na bayihi ba nde baatoodi hu musyenge a Yeriko. Na bu Yisu haapali mu Yeriko, na bayihi ba nde na koonge a baatu, inzimana imosi nga nduhi a Baritime, mwana a Time, aba atsahala ŋa muvanga a nzila na akasa musohi. 47Bu nde haayuhi ti aba Yisu musi Nazareti, nde abaandihi ufulaha: «Yisu, Mwana a Davidi, kwila me lingebe!» 48Baatu ba balahi baakapfubasa nde mana nde aba swii. Ka nde arangili ufulaha: «Mwana a Davidi, kwila me lingebe!» 49Yisu atsikimi na aleeli: «Teelaani me nde.» Bo baateeli inzimana, na uleele nde: «Hwada, teleme, nde bibaayaka mu uteele we!» 50Buuna, inzimana hyabumi iyunga hya hyo, hyatelimi mu mawasa, na hyayidi huli Yisu. 51Yisu afuuli nde: «Hima we tondi ti me tsiila we?» Inzimana hyafutili: «Rabuni#10.51 RabuniMbindulili ti: Mulongisi., me tondi ubwemono!» 52Na Yisu aleeli nde: «Yene, imiinu hya we himiifuuhasa we#Mty 9.22 .» Na masulubete, nde abwemono na abaandihi uduukala Yisu mu nzila.

Currently Selected:

Malako 10: TSA

Highlight

Copy

Compare