Malako 1

Yowani Mutondihi mu kumu a Nzala

Mty 3.1-12; Luk 3.1-18; Yow 1.19-28

1Mbandihili a Musamu wu Mubwe wa Yisu Kristo, Mwana a Nzambi. 2We bu baasonehe mu muhanda wu mumbihuli Esaya:

«Mono, me miitsindaha iluumbi hya me hu busu bwa we,

mu uvangimasa nzila a we#Mal 3.1; Mty 11.10; Luk 7.27 .

3Ni ndaha a nde wuuna wu li mu uta ibila mu kumu a nzala:

“Vangimasaani nzila a Pfumu,

suungahaani misoho mya nde#Esa 40.3; Mal 3.1; Mty 3.3; Luk 3.4; Yow 1.23 !”»

4Yowani Mutondihi apali mu kumu a nzala. Nde akata ibila: «Sobwaani mbiili, yakaani tondihili mana Nzambi anyahula masumu ma benu#Mty 3.1; Luk 3.3; Yow 1.23 .» 5Bisu tsi a Yuda yoosi na baatu boosi ba musyenge a Yeruselemi, baakayene huli nde. Bo baakasiinga masumu ma bo ŋa kuungi la baatu. Na Yowani akatondehe bo, mu nzali a Yolodani#Mty 3.5; Luk 3.7 . 6Yowani aba alwata ikutu hi baatuunga mu myoso mya buuru nga irunga. Na mu luungu la nde, aba ahada mudi wu mukobo ibulu. Nde akabaadya makooko na maadi ma nyuhi a tsyehe#2Pf 1.8; Mty 3.4; Lev 11.22 . 7Nde akayabisa bunuubu: «Huuba na muutu wu uya hu mbisa a me, wu afulala me matwala. Me a handi wu akuha mu ubaandama na unyangula mikudu mi bikoodi bya nde ve#Mty 3.11; Luk 3.16; Yow 1.27 . 8Me, me miitondehe benu mu mamba, ka nde, nde sa atondehe benu mu Livupu la Ngidi.»

Tondihili a Yisu na ndobisili a nde

Mty 3.13; 4.11; Luk 3.21-22; 4.1-13

9Mu taangu mo yiina, Yisu amati hu musyenge a Nazareti mu itaanzi hya Ngalili, na Yowani atondihi nde mu nzali a Yolodani. 10Bu Yisu haapali mu nzali, masulubete, nde amoni mayulu maadibumi. Na Livupu laakulimini ŋa yulu a nde we libembe#Mty 3.16; Luk 3.21; Yow 1.32 . 11Ndaha mosi yaayuhini hu mayulu: «We ni Mwana a me wu litondo. Mu we me ndi mu umono kinya a me yoosi#Mkg 2.7; Esa 42.1; Mty 3.17; 17.5; Mkg 7; Luk 3.22; 9.35; Kol 1.13; 2Pe 1.17 .»

Mty 4.1-11; Luk 4.1-13

12Masulubete, Livupu la Nzambi laabiti Yisu hu kumu a nzala#Mty 4.1; Luk 4.1 . 13Huuna, nde avyosi maku mana ma bilumbu, na Saatana alobisi nde. Bibulu bya bwadi byaba itwadi na Yisu, na bapofi baakakumbasa nde.

Yisu li mu uyabisa Musamu wu Mubwe

Mty 4.12-17; Luk 4.14-15

14Humbisa a hu baakotisi Yowani mu kondaayi, Yisu ayeni hu Ngalili. Nde akayabisa Musamu wu Mubwe wa Nzambi#Mty 4.12; Luk 4.14; Yow 4.43 , 15na nde akaleele: «Tangu yimiito, na Ipfumu hya Nzambi hyaka bebele. Sobwaani mbiili a benu, na saani imiinu mu Musamu wu Mubwe#Esa 56.1; Ezk 47.10 .»

Yisu miiteele balobi bana

Mty 4.18-22; Luk 5.1-11

16Bu Yisu hakataangila muvanga a dyanga li musyenge a Ngalili, nde amoni Simoni na Andele mwana a ngu a Simoni. Bo baakabwaha malihi ma bo mu dyanga, mu tooni ati, bo aba balobi. 17Buuna, Yisu aleeli bo: «Duukalaani me, me ukitusa benu balobi ba baatu.» 18Masulubete, bo baatiimbi malihi ma bo, na baaduukili Yisu#Luk 5.11; 18.28 . 19Bu Yisu haasusihi mwana a lala, nde amoni Yaki, mwana a Zebedayi na Yowani, mwana a ngu a nde. Bo baabeedi kaka mu bootehe, mu ubaaloondo malihi ma bo#Mty 4.21 . 20Masulubete, Yisu ateeli bo. Bo baasiisi taata a bo Zebedayi na basalili ba nde mutso a bootehe, na bo baaduukili Yisu.

Yisu miibeeloso muutu nga livupu lilibi

Luk 4.31-37

21Yisu na bayihi ba nde baayeni hu musyenge a Kapernahumi. Masulubete, mu ilumbu hya saba, bo baakoti mu nzo lisambulu yi Bayudaayo na Yisu abaandihi ulongese.

22Baatu ba baakayuha nde, baasinzikimuha mu ndongisili a nde. Mu tooni ati, nde akalongese na matwala. Ndongisili a nde yaaba yaasobohono na yi milongisi mi Mikele#Mty 7.28; Luk 4.33 . 23Kaahu masulubete, mutso a nzo lisambulu yi Bayudaayo, hwaba na muutu mumosi wu livupu lilibi laakakwamisa. Nde akafulaha#Luk 4.33 : 24«Yisu musi Nazareti, lo lima na bisu? We yidi mu ubungasana bisu? Me nzaabi na we li: we li wa Ngidi, wu Nzambi amiitsindaha!» 25Yisu afwengili livupu lilibi bunuubu: «Ba swii, na pala mu muutu mo wunuwu!» 26Livupu lilibi laapali mu muutu, laapfwikisi nde mu mifudi na lo laafulihi mubabu wu munene. 27Baatu boosi baakimuhi; na baakafuulasana ŋa hati la bo: «Liniili kaka ki dyambu? Yiniiyi ndongisili yi nyatihi, mu ulongese na matwala! Muutu mo wunuwu li mu utuma napa mavupu ma mabi, na mo kaka mali mu usiingala nde!» 28Masulubete, lidumu la nde laatsamuhi pasi tsyelo mu itaanzi hya Ngalili hyoosi.

Yisu miibeeloso buko bwa Simoni bu mukaasu

Mty 8.14-17; Luk 4.38-41

29Bo bapala mu nzo lisambulu yi Bayudaayo, masulubete Yisu ayeni hu nzo a Simoni na Andele, itwadi na Yaki na Yowani#Mty 8.14; Luk 4.38 . 30Buko bwa Simoni bu mukaasu aba abwamina ŋa taangi, bu haaba na baahu. Na masulubete, baatoosili musamu bubeedu huli Yisu. 31Yisu asusihi huli mubeedu, akaangi nde mu kaka, na atelimisi nde. Baahu laapali mu nde, na buko bwa Simoni akabili bo byudya#Mty 4.23-25; 8.16-17; Luk 4.40-44 .

32Bu tsitsaha yaatoodi, hu nyangu hadyami, baatu baabehili Yisu babeedu boosi, na baatu ba matengo maakakwamisa#Mty 4.24 . 33Baatu boosi ba musyenge, baayakuukama ŋa busu bu munywa a nzo. 34Nde abeelusi babeedu ba balahi, ba mabeedu ma pila mu pila maakakwamisa. Na nde abingi kaka matengo ma malahi. Yisu a hakava matengo muswa wu uyambila ve, mu tooni ati, mo maaba maayaaba na nde ali.

Yisu li mu uyabisa Musamu wu Mubwe hu itaanzi hya Ngalili

Luk 4.42-44

35Ilumbu hi hyaduukili, tsuumba a ngwali, Yisu asuuhi na apali mu nzo mu uyene nde siha hu kumu a nzala, na huuna, nde akoti mu lisambulu#Luk 4.12; Mty 14.23 . 36Simoni na bambaahi ba baaba na nde, baayeni hu uyasaha Yisu. 37Bu baasooli nde, bo baaleeli nde: «Baatu boosi bali mu usaha we.» 38Nde afutili bo: «Tswendaani tsyelo kima, mu mala ma ibiingi mo hinihi. Mana huuna kaka, me nzabisa Musamu wu Mubwe. Mu tooni ati, ni mu nde me anziila#Luk 4.43; Esa 61.1; Luk 4.18 .» 39Na nde ataangili itaanzi hya Ngalili hyoosi, mu ubaalongese mutso manzo ma lisambulu ma Bayudaayo na ubaabinga matengo.

Yisu miibeeloso nga bwatsi

Mty 8.1-4; Luk 5.12-16

40Muutu mumosi nga bwatsi miiya huli Yisu, atsokomo, nde ayayiini Yisu: «Tso we tondi, we utwala utsyemese me!» 41Bu hakwili nde lingebe, Yisu alabi hoho, abembi nde na aleeli: «Me tondi buuna, ba wu atsyeme!» 42Masulubete, bwatsi bwamati mu nde na nde atsyemi. 43Yisu aduti nde matswi, abingi nde mu mawasa, 44na aleeli nde: «Kele, a hayabisa lo huli pasi muutu. Ka yene we mwakulu yamonehele huli ngaanga a Nzambi, na yava nde bungodu bu Moose hatuma mu tsyemili a we, mana bwo buba imbangi huli bo, ti we miibeeloho#Lev 13.2; 14.1 .» 45Ka muutu mo wuuna ayene, abaandihi uyaleele ma malahi na utsala musamu pasi mbuha huli baatu boosi. Ni mu buuna, Yisu hakabwevelekoto mu pasi musyenge ŋa miisu ma baatu. Nde aba ubaatsahala aka mu matsomo ma misyenge, mu hwavele a baatu. Ka baatu baakamata bibiingi byosi, baakaya huli nde.

Currently Selected:

Malako 1: TSA

Highlight

Copy

Compare