1 Tesalonika 3
3
1Ni mu buuna, bu bisu laaveletwala ukuunda ubwekeele bunzuhisini, bisu laamono bubwe mu uyaba siha hu musyenge a Atenesi. 2Bisu latsindaha benu mwaana a ngu a bisu Timoteho, wu li tsyengi a me mu isalu hya Nzambi, mu nzabisili a Musamu wu Mubwe wa Kristo. Bisu laatuma nde mu uhwadisa benu na uva benu mandoongi mu tooni imiinu hya benu, 3mana pasi muutu avelebwa hutso ikolili mu tooni a mbingisili yi lili mu ubwana. Benu mwakulu liyabi lo, yiina ni kesili a Nzambi mu bisu. 4Ŋa bisu laaba kini ŋa hati la benu, bisu laakayibusa benu ti buumweese bisu pasi. Maana ni ma mavangimi, benu liyabi lo bubwe. 5Ni mu buuna, bu me akambwepeletwala ukuunda ukeele, me atsindihi benu Timoteho mu usaha uyaaba kwadili imiinu hya benu. Me akambata boomo ti mukuyi, mulobisi mo wunuwu, alobese benu na pasi a bisu a yiba ya mu pu.
6Ka bunuubu, Timoteho miiyafutahala bisu, na nde ava bisu matsangu ma mabwe mu tooni imiinu hya benu na litondo la benu. Nde ayabisa bisu, ti benu a laakolo mu utsima bisu na litondo loosi ve. Na ti benu lili na nzala mu ubwemono bisu, we bu bisu kaka lili na nzala ubwemono benu. 7Ni mu buuna baana ba ngu, hutso minyongi mya bisu na mapasi ma bisu moosi, bisu laahwadi mu matsangu mo maana, mu tooni imiinu hya benu. 8Bunuubu, idiingu hya bisu hika lisuunga, mu tooni ati benu limiikangama mu Pfumu mu idiingu hya benu. 9Buni bisu luusinzafutala matondo huli Nzambi mu benu, mu kinya yoosi yi benu lili mu uva bisu, ŋa busu bwe nde? 10Butsuhu na nyangu, bisu libaavondo nde na mukonono woosi, mu uva bisu nzila mu ubwemono benu na mu usuungaha bi byaveleyelemene mu imiinu hya benu.
11Nyaha Nzambi Taata a bisu nde mwakulu na Pfumu a bisu Yisu, badibula bisu nzila yi uto natee huli benu. 12Nyaha Pfumu asinzakulasa na asinzaluusa litondo li benu lili na lo mu bana na mu baatu boosi, mu ifwaani hi litondo li bisu lili na lo mu benu. 13Nyaha nde ahwadisa mitima mya benu, mana benu liba bangidi, ba baavele masyembo ŋa busu bwa Nzambi taata bisu, ŋa Pfumu a bisu Yisu huuya na bapofi ba nde boosi. Amen!
© (Active), Wycliffe Bible Translators, Inc. All rights reserved.