1 Tesalonika 2
2
Pahuli hu Tesalonika
1Benu mwakulu layaaba, baana ba ngu, ti nziili a bisu huli benu a yili yi yavele na kaluha ve. 2Ka benu liyabi kaka ti bisu laayaka bituhi na laamono pasi hu musyenge a Filipo. Ka Nzambi ahwadisa mana bisu lilongese Musamu a nde wu Mubwe, hutso a mbingisili.
3Mambu ma bisu laakalongese a maaba ma mapfuta, buuve ma soho ve, na bisu a laakasaha usoho tso muutu mumosi ve. 4Naana! Nzambi asusa bisu ŋa busu bwa lobese na nde ava bisu Musamu a nde wu Mubwe. Bisu a lili mu utoyo mu usaha muyusu a baatu ve, ka muyusu a Nzambi wu ayaaba matsimi ma mitima mya bisu. 5Benu layaaba lo bubwe, bisu a libaasalila lipedi tso hoole ve. Bisu kaka a lili mu uswehe manzala ma mapfuta humbisa a ma bisu lili mu uleele ve. Nzambi nde mwakulu li mbangi a bisu. 6Bisu a laasaha ti muutu asilasa bisu ve, tso benu, tso bakima. 7Bisu beedi na muswa mu unangimana benu, bu bisu lili biluumbi bya Kristo. Ka bisu laamweese bulembo bwa bisu ŋa hati la benu, we ngu wu li mu ukeelese bibabana bi nde ubaabuungala. 8Bisu laatondo benu mu itesi hi ulongese benu Musamu wu Mubwe wa Nzambi. Litondo mo liina laamiivangimasa bisu mu uva kaka muvumu a bisu mwakulu. Benu laaba na talu yi yafulala ŋa busu bwa bisu! 9Baana baa ngu, benu lili mu uyibwala moonyi mu mapasi ma bisu na ikolili hya bisu. Ni mbuli bisu laakalongese benu Musamu wu Mubwe wa Nzambi hwavele ukolo. Bisu laakasala nyangu na butsuhu, mu ubweveleva mupfuna huli pasi nde ŋa hati la benu.
10Benu lili bambangi ba bisu, napa Nzambi kaka. Mbiili a bisu ŋa busu bwa benu baa nga imiinu, yaaba yi yatsyeme, ya tsiitsa, yi yavele masyembo. 11Benu liyaabi ti, bisu laaba mu pasi muutu mu benu, we bu taata ali mu baana ba nde. 12Bisu laahwadisi benu, laabombisili benu na laayelisi benu mu ubaaba na mbiili yi yafwana ŋa busu bwa Nzambi. Nde wu li mu uteele benu mu ukoto mu ipfumu hya nde na mu muyusu a nde.
13Ni mu buuna, bisu libaafutala matondo huli Nzambi taangu yoosi, bu benu laayaki mambu ma bisu laayabisi benu. Benu a laayaki mo we mambu ma maapali mu muutu ve, ka we bu mo mali ma mbuli, Mambu ma Nzambi, ma mali mu usala na mifudi, ma benu lili mu usa hiitu mu mo. 14Baana baa ngu, benu laamweese buuna, bu benu laaduukala ifwaani hi mabundu ma Nzambi ma itaanzi hya Yude, ma mu baasa imiinu mu Yisu Kristo. Mu tooni ati, baatu ba tsi a benu baamweesi benu pasi, we bu mabundu maamoni pasi ŋa busu bu lituma li Bayudaayo. 15Bo ni ba baadubi Pfumu Yisu Kristo na mimbihuli. Bo baanyongisi bisu kaka. Bo bali bababi ŋa busu bwa Nzambi. Bo bali baboho ba baatu boosi. 16Bo bali mu ukala bisu mu ulongese huli ba bavele Bayudaayo, Mambu ma Nzambi ma mu ubehele bo liyobolo. Bo bali mu ukulasa itesi hi masumu ma bo baasiidi. Ka kesi a Nzambi yamiibwila bo.
Pahuli na nzala ubwemono bisu Tesalonika
17Mu mamatali bisu, baana ba ngu, bisu laaba we bitsana bi bamiitahusa kidumana na benu, mu mwaana a taangu mu miisu, ka a mu mutima ve. Bisu lasaha uyafutaha huli benu, mono buni bisu laasiidi mifudi myosi, mu ubwemono biinzi bya benu. 18Ni mu buuna, bisu laatondi uyamono benu. Na me Pahuli, me anzyehili yehele limosi buuve nzyehele yoole. Ka Saatana akali bisu. 19Ni benu, a baatu bakima ve, lili hiitu hya bisu, kinya a bisu na iliimbu hya mbiingili a bisu, yi bisu luutwala usa nyeme ŋa busu bwa Pfumu a bisu Yisu Kristo, ŋa nde huuya. 20Eye, benu lili tooni muyusu a bisu na kinya a bisu!
© (Active), Wycliffe Bible Translators, Inc. All rights reserved.