Ezequiel 48
48
Bix úuchic u t'o'oxol le lu'umo'ob ti' le Israelitaob
1-7Lela' leti' u kaaba'ob u múuch' cajtalilo'ob le j otochnáalo'ob.
Líikbal tu jáal j xaman, cu bin líikbal Mediterráneo cu ch'actic Hetlón, tu yoocbal tu cáajalo'ob Hamat yéetel Hazar-enán, tu noojol u lu'umilo'ob Damasco yéetel Hamate', tu jujun p'éelil u múuch' cajtalil le otochnáalo'obo', bíin u kamo'ob u xóot'ol u lu'umo'ob líikbal tu jáal j lakin, tac tu jáal j chikino', bíin u kamo'ob beya':
Dan
Aser
Neftalí
Manasés
Efraín
Rubén
Judá
8Tu táakale' ti' yaan le lu'umo'ob u najmal u jun páaycunta'alo', cu bin líikbal j lakin tac j chikin. U cóochile' bíin u p'is doce kilómetros ca'a tac táancoch, u chowaquile' bíin u p'is le buca'aj yaan ti' u láak lu'umo'ob cu bino'ob líikbal j lakin tac j chikino'. Chúumuque' ti' bíin anac le kulnajo'.
Lu'umo'ob jun páaycunano'ob u ti'al Yuumtzil
(Ez 45.1-6)
9Le lu'um jun páaycunta'an u ti'al Yuumtzil tu chúumuc le lu'umo'oba' bíin yanac doce kilómetros ca'a tac táancoch u chowaquil yéetel diez u cóochil. 10Ti' le xéet' lu'uma' bíin jóokesa'ac jun xéet' jun páaycunta'an chéen u ti'al le aj kiino'obo'; j xaman tac j noojole', bíin u p'is doce kilómetros ca'a tac táancoch, j lakin tac j chikine' cinco kilómetros. Chúumuc bíin anac u kulnaj Yuumtzil. 11Le lu'uma' bíin p'a'ata'ac u ti'al le aj kiino'ob u jun páaycunta'ano'ob ti' Yuumtzil, lelo' u ch'i'ibalo'ob Sadoc máaxo'ob tu ch'a'a jo'olto'ob in meeyjulo'ob, tumen ma' tu quetajo'ob le u chuucáan j israelitaob le ca tu p'atajo'ob in beelo'ob je'el bix tu beetajo'ob le j levitaobo'. 12Le t o'olalo', ichil le lu'um jun páaycunta'an ti' Yuumtzil tu tzéel u lu'um le j levitaobo', le aj kiino'obo' bíin yanac jun p'éel lu'um ti'ob, lelo' jun xéet' jach quili'ich lu'um. 13Tu tzéel u lu'um le aj kiino'obo', ti' bíin yanac u ti'al le j levitaobo', bíin u p'is doce kilómetros ca'a tac táancoch u chowaquil yéetel cinco u cóochil. Le lu'um jun páaycunta'an ti' Yuumtzilo' bíin yanac doce kilómetros ca'a tac táancoch u chowaquil yéetel diez u cóochil tu pa'ate'il. 14Lela' leti' le u xéet'el u asab ma'alobil ti' le lu'umo'obo'. Mix jun xéet' je'el u páajtal u co'onol wa u ke'exel wa u máansa'al tu kaaba' yaanal máaque', tumen jun páaycunta'an u ti'al Yuumtzil.
15U yalab le lu'um, yaan doce kilómetros ca'a tac táancoch u chowaquil yéetel ca'a p'éel ca'a tac táancoch u cóochilo', ma' quili'ichi'. Te'elo' je'el u páajtal u cajtal máaco'obe', yéetel bíin yanac xan xíiwo'ob u ti'al u tzéenta'al wacaxo'obi'. Chúumuque' ti' bíin ti'anac le caajo', 16bíin ti'anac ichil u can ti'itzil cu p'isico'ob dos mil doscientos metros tu jujun tzéelil. 17Tu bakpach le caajo' ti' bíin yanac ya'ax xíiw u ti'al u tzéenta'al wacaxo'obi', bíin yanac ciento veinticinco u cóochil ti' u can tzéelilo'ob. 18Tu tzéelo'ob le caajo' p'áatal jun xéet' lu'um, tu tzéel le jun páaycunta'an ti' Yuumtzilo', lelo' yaan cinco kilómetros u chowaquil j lakin yéetel cinco xan j chikin. Le lu'umo' je'el u páajtal u meyajta'ale', u joochilo'obe' bíin meyajnac u ti'al u tzéenta'al le máaco'ob cu meyajo'ob ti' le caajo'. 19Le máaxo'ob cu meyajo'ob ti' le caaj ti' je'el ba'axac múuch' cajtalil otochnáalo'ob u taalo'obe', leti'ob bíin meyajtic le lu'umo'. 20Beyo' tuláacal le lu'um jóokesa'an, le jun páaycuna'an ti' Yuumtzil pa'ate' yéetel le jóokesa'an u ti'al le caajo', bíin yanac doce kilómetros ti' u jujun p'éel u can tzéelil.
U lu'um aj méektáan
(Ez 45.7-8)
21-22Ti' le j méektáano', bíin dza'abac le jun t'o'ol lu'um cu p'áatal chúumuc ti' Judá yéetel Benjamín, lelo' leti' le xóot' lu'um yaan tu tzéelo'ob le jóokesa'an u ti'al Yuumtzil yéetel le jóokesa'an u ti'al le caajo'. Bíin u p'is doce kilómetros ca'a tac táancoch u cóochil, bíin jáayac j lakin tac tu jáal j lakin, tu chikine' bíin kuchuc tac tu jáal ka'anab. Tu chúumuque' bíin p'áatac le jóokesa'an u ti'al Yuumtzilo', yéetel le kulnajo', u núupul yéetel le jóokesa'an u ti'al le j levitaob yéetel u lu'umilo'ob le caajo'.
U lu'um u chuucáan u múuch' cajtalil otochnáalo'obo'
23-27U lu'umo'ob u chuucáan u láak múuch' cajtalil otochnáalo'obo' cu bin tu tojil j noojol. Tu jujun p'éelil le múuch' cajtalil otochnáalo'obo', bíin u kamo'ob u lu'umo'ob likbal tu jáal j lakin tac jáal j chikin bey u bin u tzoolola':
Benjamín
Simeón
Isacar
Zabulón
Gad
28Tu noojol u lu'um Gade', U jáale' cu chúunul líikbal Tamar, cu ch'actic u péet ya'ax káax Meriba-cades yéetel u t'o'ol ja'il Egipto tac tu ka'anabil Mediterráneo.
29Lela' leti' le lu'umo'ob bíin u kamo'ob u múuch' cajtalil u yotochnáalo'ob Israel, u najmal u t'oxla'anta'al ti'o'. Teen, Yuumtzil, teen a'alic.
U jool caajilo'ob Jerusalén
30-34Le caajo' bíin bakpachta'ac tumen jun p'éel tuulum yaan dos mil doscientos cincuenta metros ti' u jujun p'éel u can tzéelil. Tu jujun tzéel le tuulumo' bíin yanac óox p'éel u jool caajo'ob p'ata'an u ti'al óox p'éel u ch'i'ibalo'ob Israel, bey bíin p'áataca': U jool caajilo'ob j xamane': u ti'alo'ob Rubén, Judá yéetel Leví; u jool caajilo'ob j lakine': u ti'alo'ob José, Benjamín yéetel Dan; u jool caajilo'ob j noojole': u ti'alo'ob Simeón, Isacar yéetel Zabulón; tu jool caajilo'ob j chikine': u ti'alo'ob Gad, Aser yéetel Neftalí. 35Le tuulumo' bíin u p'is nueve mil metros u chowaquil tu pa'ate'il, líikbal bejela'e', le caajo' bíin u kaaba'int: Yuumtzile' ti' Yaan waye'.
Currently Selected:
Ezequiel 48: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992