Ezequiel 47
47
U sayab ja'il kulnaj
1Cu dzo'ocole' le máaco' tu ca'a bisajen tu jool bejil le kulnajo'. Ca tin wilaj túune', táan u jóokol ja' tu yáanal le jool najo', yéetel táan u bin u yáalcab tu tojil j lakin, tu tojil tu'ux cu paacat le kulnajo'. Le ja'o' cu yéemel tu x no'ojil le kulnajo', tu tzéel j noojol ti' le multuunil kultajo'. 2Cu dzo'ocole' tu beetaj in jóokol ti' u lu'umil le kulnaj ti' le jool naj yaan j xamano', ca tu beetaj in lóochol tac tu paach le jool bej yaan paach cu paacat j lakino'. Táan ca'ach u chooj jun p'íit ja' tu tzéel j noojol ti' le jool bejo'. 3Le máaco' jóok tu tojil j lakin u ch'a'ama jun p'éel suume', ca tu p'isaj quinientos metrose', ca tu beetaj in ch'actic le t'o'ol ja'o'; le ja'o' cu kuchul ca'ach tac tin tuuncuy. 4Cu dzo'ocole' tu p'isaj u láak quinientos metrose', ca tu beetaj in ch'actic le t'o'ol ja'o'; le ja'o' cu kuchul ca'ach tac tu pool in píix. Tu p'isaj u láak quinientos metrose' ca tu beetaj in ch'actic le t'o'ol ja'o'; le ja'o' dzo'oc u kuchul ca'ach tac tin kaxnak. 5Tu p'isaj u láac quinientos metrose', ba'ale' le t'o'ol ja'o', dzo'oc u suut jun p'éel áalcab ja'il, ma' páatchaj in ch'actiqui'; dzo'oc u suut jun p'éel taamtam áalcab ja', chéen cu páajtal u ch'acta'al báabil. 6Tu ya'alaj túun ti' teen: Pact ma'alob ba'ax dzo'oc a wilic. Cu dzo'ocole' tu beetaj in suut tu jáal le áalcab ja'o', 7ca tin wilaj yaan ya'abcach che'ob tu ca'a tzéelil. 8Ca tu ya'alaj túun ti' teen: Le ja' cu yáalcab tu tojil j lakin tac tu kóomil Jordán, tu'ux bíin tuulnac ichil Quimen Ka'anab. Le quéen kuchuc te'elo', bíin ch'ujuchajac u ja'il le ka'anabo'. 9Je'el tu'uxac ca kuchuc le t'o'ol ja'o', bíin páatac u cuxtal tuláacal u jejeláasil ba'alche'ob yéetel ya'abcach cayo'ob. Tumen u ja'il le áalcab ja' bíin u ch'ujucquint le káakaj ja'o', u ti'al ca yanac tuláacal u jejeláasil ba'alo'ob cuxa'ano'obi'. 10Líikbal Engandí tac En-eglaime', bíin yanac j chuc cayo'ob, cu dzo'ocole' bíin xan páatchajac u jaykintico'ob u káanil u caybalo'ob te'elo'. Te'elo' bíin yanac xan ya'abcach u jejeláasil cayo'ob je'el bix tu ka'anabil Mediterráneo'. 11Ba'ale' u ukumilo'ob yéetel le áakalche'ob tu'ux cu yactal u ja'ilo'obe' ma' bíin yanac ch'ujuc ja'obi'; bíin p'áatac ch'óoch' ja'il u ti'al u jóokesa'al ta'ab. 12Ti' tu ca'a tzéelil le áalcab ja'o' bíin ch'íijic che'ob cu dzáico'ob ich. Mix bikin bíin júutuc u le'obi', mix bíin ch'éenec u yantal u yicho'obi'. Ti' tuláacal u jujun p'éelal winal bíin yanac u yicho'ob, tumen bíin jóoyabta'aco'ob tumen le ja' cu jóokol te j kulnajo'. U yicho'obe' bíin meyajnac u ti'al jaantbil, u le'obe' u ti'al dzaac.
Cu p'i'isil tac tu'ux cu náacal le múuch' caajo'oba'
13Teen Yuumtzil, tene' quin wa'alic: Le je'elo'oba' u jáalo'ob le múuch' caajo'ob bíin u kamo'ob u ti'alinto'ob u ch'i'ibalo'ob Israel (Ti' Josee' yaan u dza'abal ca'a xóot' u lu'um). 14Tene' tin séeb chi'itaj in dzáic le lu'um ti' a máanja'an ch'i'ibale'exa'. T'oxaba'ex u lajqueet u xéet'elo'ob. Le lu'umo'oba' leti' a kamba'albáile'ex.
15U jáal tu'ux cu náacal j xaman, líikbal tu ka'anabil Mediterraneoe', bíin káatac tac tu caajil Hetlón yéetel tu caajilo'ob Zedad, 16Berota yéetel Sibraim (lelo'obo' ti' yano'ob tu lu'umilo'ob Damasco tu yéetel Hamat), bey xan Hazar-hasticón (cu náacal tu xuul Haurán). 17Bey túuno' u jáal j xamane' bíin xi'ic líikbal Mediterráneo tac Hazar-enán, u ti'al u p'áatal j xaman u lu'umilo'ob Damasco yéetel Hamat.
18U jáal j lakine' bíin xi'ico'ob líikbal tu'ux yaan u xu'ukil tu'ux náacalo'ob Haarán yéetel Damascoe', tac tu caajil Tamar tu tzéel Quimen Ka'anab, tu chowaquil u jáal u yáalcab u ja'il Jordán, leti' bíin meyajnac bey u jolch'aaquil ti' u lu'umilo'ob Galaad yéetel Israel.
19U jáal j noojole', bíin chúunuc líikbal Tamar bíin máanac tu péet che'ilo'ob Meriba-cades yéetel u t'o'ol ja'il Egipto, tac u kuchbal Mediterráneo.
20U jáal j chikine', ti' bíin náacac tu ka'anabil Mediterraneoe', líikbal tu jáal Egiptoe', tac tu jáal ka'anab le yaan actáan ti' u jool u beel Hamat.
21Lela' leti' le múuch' caajo'ob u najmal a t'oxique'ex ichil u doce u ch'i'ibalo'ob Israela'. 22Lelo' leti' le kamba'albáil bíin a kame'exo', bey xan le j táanxel lu'umilo'ob bíin cajlac ichile'ex yaan u paalalo'ob ichile'exo'. U najmal a wilique'exo'ob je'el bix wa ti' sijnalo'ob Israele'. Le quéen a t'oxe'ex le lu'umo'ob ichil u ch'i'ibalo'ob Israelo', unaj xan u dza'abal u ti'alo'obi'. 23Le j táanxel lu'umilo'obo' bíin u kamo'ob u lu'umo'ob ichil u lu'umo'ob le múuch' cajtalil otochnáalo'ob tu'ux cajnáalo'obe'. Teen, Yuumtzil, teen j a'ale.
Currently Selected:
Ezequiel 47: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992