Amós 9
9
1Tin wilaj Yuumtzil tu tzéel le u multuunil kultaj táan ca'ach u ya'alic ti' teen:
Kol u jo'ol yocmalo'ob le kulnajo' tac quéen péecnac u yocmal u jool najilo'ob;
ca' lúubuc u xéexet'alo'ob tu yóokol le máaco'obo'.
Le máaxo'ob ma' bíin quíimico'obe' bíin in quíimsico'ob yéetel u yej máascab:
quex ca u yóolto'ob j púudzule', mix jun túul bíin u jechi';
2quex ca u ta'acbesuba'ob tu taamilo'ob le lu'umo', ti' bíin in jóokeso'obi';
quex ca na'acaco'ob tu ca'analil le ca'ano'obo', ti' bíin in wéenso'obi'.
3Wa cu ta'acbescuba'ob tu ca'analil u pu'uquil Carmeloe',
tac xan te'elo', ti' bíin xi'iquen in caxanto'obi';
wa cu ta'acbescuba'ob ti' teen tu taamil le ka'anabo',
ti' bíin in túuxt u sajbe'en ba'alche'ilo'ob le ka'anabo',
u ti'al ca xi'ico'ob u ti'al j xe'exe'et'bilo'ob tumeno'ob.
4Wa ca chu'ucuco'ob j bisbilo'ob táanxel lu'umil tumen u aj p'eeco'obe',
bíin in túuxt in x táadz máascab u ti'al ca xi'ic u quíimso'ob.
¡Bíin in ch'ic in paacat tu yóokolo'ob mantadz u ti'al kaas, ma' u ti'al utzi'!
5Yuumtzil Ku, u yuumil tuláacal páajtalile',
cu péedzkabtic le lu'umo', le lu'umo' cu yíibil,
cu yokolo'ob tuláacal u cajnáalilo'ob.
Le lu'umo' cu na'acal yéetel cu yéemel,
je'el bix u na'acalo'ob yéetel u yéemelo'ob u ja'ilo'ob Niloe'.
6Yuumtzile' tu dzaj u cajtalil te j ca'ano',
tu dzaj xan u nak ca'an tu yóokol le lu'umo';
leti'e' cu t'anic u ja'ilo'ob le ka'anabo'
cu dzo'ocole' cu wequic tu yóokol le lu'uma'.
Yahveh, lela' leti' u kaaba'.
7Je'el ba'ax cu jach a'alic Yuumtzila':
Israelitaex, in ti'al tene' mina'an u jela'anil
ichile'ex yéetel le j etiopeobo'.
Je'el bix tin taasilaque'ex tu caajil Egiptoe',
bey xan tin taasilaco'ob tac Creta le j filisteobo'
likbal tu lu'umil Kire' tin taasaj le j Arameobo'.
8Yuumtzile' cu pactic le j keban ajawila', cu ya'alic:
Bíin in ca'aj in lukes ti' le lu'uma',
ba'ale' ma' bíin in láaj xu'uls u yotochnáalo'ob Jacobi'.
Teen Yuumtzil, Teen a'alic.
9Bíin in ca'aj in wa'al ca líila'ac u yotochnáalo'ob Israel,
je'el bix u péecsa'al trigo ti' jun p'éel cháachabe',
ma' tu lúubul mix jun p'éel neek te j lu'umo'.
10Tuláacal u aj kebanilo'ob in caajale'
bíin quíimco'ob yéetel u yej máascab;
tuláacal le máaxo'ob cu ya'alico'ob: Mix ba'al ti' lelo' bíin úuchuc ti' to'on;
le kaaso' ma' bíin u chuco'oni'.
Bix cu bin j utzquintbil Israel tu ca'a téen
11Táan u taal u kiinil quéen in ca'a líikes u jeenel pasel David. Bíin in mac u joolo'ob, bíin in líikes u x lab pakilo'ob, bíin xan in wutzquiint je'el bix yanil ca'ach ti' le kiino'ob j máanja'ano'obo', 12u ti'al beyo' le cu p'áatal ti' Edom yéetel tuláacal le lu'um in ti'al ca'acho', ca'a suunac ti' Israel. Yuumtzile' tu dzaj u t'aanil, bíin u dzo'ocbese.
13Cu taal u kiino'ob ma'ili' dzo'ococ u jo'ochol trigoe', u kiinil u t'o'ol bukla'al le lu'umo', ma'ili' dzo'ococ u ye'edzel le uvao', ta'itac u kuchul u kiinil u pa'akal le trigoo. Ti' pu'uco'ob yéetel ti' jo'ol lu'umo'ob bíin áalcabnac le vinoo bey yáalcab ja'e'. 14Bíin in taas túun in caajal Israel likbal te j lu'umo'ob tu'ux bisa'abo'obo'. Bíin u ca'a líikeso'ob le noj caajo'ob jeeneltaco'obo', u ti'al ca cajlaco'obi'; bíin u pako'ob uva, bíin u yuko'ob vino'; bíin u pako'ob jana'albe'en che'ob u ti'al u jaantico'ob u yich. 15Tumen bíin in cajcunto'ob láili' tu lu'umo'obe', mix bikin xan bíin suunac lukesbilo'ob ti' u le lu'um tin dzaj ti'obo'. Ku Yuumtzil a'alic.
Currently Selected:
Amós 9: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992