Amós 8
8
U xaaquil takan yich che'
1Je'el ba'ax tu ye'esaj ti' teen Ku Yuumtzila': Yaan ca'ach jun p'éel u xaaquil takan u yich che', 2leti'e' tu káat chi'itaj ti' teen: ¿Ba'ax ca wilic, Amós? ca tin núucaj: jun p'éel xaac u takan yich che'. Ca tu ya'alaj ti' teen Yuumtzil: Israele' dzo'oc u takantal; ma' bíin in sa'ats tu ca'a téeni'. 3Ti' le kiino' u kaayilo'ob jalach naje' bíin suunaco'ob áacam okolo'ob. Ya'abcach máac bíin quíimic ichil ch'ench'enquil, bíin pu'ulco'ob táancab u quimen wíinclilo'ob. Yuumtzil a'alic.
Cu náadzal u p'is óolal Israel
4U'uye'ex lela', te'ex máaxe'ex ca yedzique'ex le j cabal óolo'obo' bey xan ca wóotzicuntique'ex u cajnáalilo'ob le lu'uma'; 5te'ex máaxe'ex ca wa'alique'ex: ¿Ba'ax tiin quéen máanac u kiinbesajil túumben uj, u ti'al ca páatac c conic le trigoo? ¿Ba'ax kiin quéen máanac sábado u ti'al c conic neeko'ob co'ojo'ob, bey xan ma' c chucbesic u p'iisilo'obi'? 6¡Bíin c nakal óotzilcunt le óotzilo'obo' tac quéen u conuba'ob ti' to'on beyo'ob palitzilo'ob u ti'al ca u bo'oto'ob u paaxo'ob, quex chéen ca'a dza'an xanab u p'axmajo'ob! ¡Bíin c con tac u coobil le trigoo! 7Yuumtzile' tu jalach t'aantaj tu yo'olal u nojbe'enil Jacob: Mix bikin bíin in tu'ubs le ba'ax ta beetaje'exo'.
8¿Ma' wa bíin quíilbalnac le lu'um tu yo'olal tuláacal lelo'?
¿Ma' wa bíin okolnaco'ob tuláacal u cajnáalilo'obi'?
¡Lu'ume' bíin na'acac yéetel bíin éemec, je'el bix u na'acal yéetel u yéemel u ja'ilo'ob le Niloo'!
9Yuumtzile' cu ya'alic: Ti'ili'e' kiino' bíin in beet u t'úubul chúumuc kiin, ca'anal yaan kiin quéen in beet u yéekjoche'ental yóokolcaab.
10Bíin in sut okolil a kinbesaje'ex ti' okol tu yo'olal le quimeno'obo',
le kaayo'ob xano' bíin in sut u okom kaayilo'ob mucsaj;
bíin in beet a búuquintique'ex u box nookil quíimil,
ca kolistaba'ex xan tu yo'olal u chíiculal ki'inamil,
Bíin okolnaque'ex je'el bix le máax dzo'oc u quíimil u jun túulili' paale',
tuláacal bíin dzo'ococ ichil yaj óolal.
11Yuumtzile' cu ya'alic: táan u taal kiino'ob
in túuxtic wi'ij te j lu'umo';
ma' u wi'ijil waaji', mix u yukajil ja'i',
ba'ale' u wi'ijil a wu'uyique'ex u t'aan Yuumtzil.
12Le máaco'obo' bíin máanaco'ob x ma' beelil,
táan u máan u caxto'ob u t'aan Yuumtzil,
bíin xi'ico'ob ti' jun p'éel ti' u láak ka'anab,
likbal j xaman tac j lakin, ba'ale' ma' bíin u nuptáanto'obi'.
13X qui'ichpam ch'úupalalo'ob yéetel j xiixib táanquelemo'obo',
ti' le kiino' Mix máac bíin jechic u p'is óolal Yuumtzil.
14Le máaxo'ob cu jalach t'aano'ob tu yo'olal u beetbil kuob Samariae';
le máaxo'ob cu ya'alico'ob: Pactic ku, óotzlech Dan.
Pactic u kuilo'ob Beerseba,
bíin lúubuco'ob u ti'al mix bikin u ca'a líikilo'ob.
Currently Selected:
Amós 8: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992