Bɔ Rom 3

1Éngɛ ǹtsara é mwɔ bɔ Juu na ayɛ? Kà ǹchwɔ̀ é ndèe bɔ ngɛ na ayɛ? 2Ɔ̧̀ɔɔ éŋwaʼa ǹtsara bɔ Juu ye ghɛʼ ene eghɛʼ gimkpaʼ, Ngwe à dye ndɛ̀ʼ etsɛrɛ mɔ ebe angɔ. 3Mala abɔ deʼ abwaʼ angɔ, à ne me le ebɛrɛ bo, shi kele ebɛrɛ angɔ yà le Ngwe ne fwɛʼ aŋu a shi tɔ̧ɔrɔ ngɛ bo? 4Keʼ nɔ, bɔ gimkpaʼ edɔm ese ba ga andɔɔ, Ngwe ya ga éŋwaʼa akyɛ gimkpaʼ na aŋu e me ŋwɛʼrɛ efwɔ aŋwɛʼrɛ Ngwe kpe,

“Ngwo ga, bɔ nɛɛ kpe ngwo ga éŋwaʼa.

E sɛʼ awɛ, ngwo nde esɛʼ.”

5Bɛʼngɛ, mala eleabwa ǹchù bɔ tee apɛpɛ kpe Ngwe ya ga éŋwaʼa, shi ntsɔ ba ga kpe ayɛ? Ntsɔ ba ga kwɔ̀nɔ̀ Ngwe, mala engɔ nyii abɔ? (Mmɛ na ga ene ezɔɔrɔ gho). 6E ke me né mwɔ éngɛ bo! Mala Ngwe ne ma ga éŋwaʼa bo, è yà sa sɛ̀ʼɛ ese anchwɔnchwɔ ngɛ ene. 7Bɛʼngɛ, mala andɔɔ ndza me né le enarabwa mane enɛŋɛrɛkɛ Ngwe ngɔɔ embè embè, e sa wa kwɔ̀nɔ̀ angu ena abwa bɔɔbɔɔ ngɛ ene? 8Ayɛ le ntsɔ ne ga kpe ntsɔ fɔɔ embè sa le abwa bɔɔbɔɔ mbɔʼtye ǹchwɔ̀ gli bo? Abɔ deʼ ba zhiri à sɛɛrɛ kpe na abwa yɛ mmɛ ma zhiri a tee ngɛ a zɔ. Angɔ nɛɛ kpe Ngwe yà sɛʼ gɛrɛ tsɔŋɔ angɔ, e me koʼro é le ngɛ.

Tsɛ̀ʼ gho deʼ me koʼro efàarà Ngwe bo

9Éngɛ ga kpe ntsɔ bɔ Juu be pɛ fɔɔ abɔ abê? Keʼ, ka mpiʼ! Mmɛ shi tee apɛpɛ kpe bɔ gimkpaʼ, bɔ Juu mane ebɛbɔ, e be enji ekama abwa bɔɔbɔɔ. 10Aŋu aŋwɛʼrɛ Ngwe me ga kpe, “Tsɛ̀ʼ gho deʼ ŋwàʼ è me koʼro efàarà Ngwe bo. 11Ne tsɛʼ gho deʼ è me le azɔm kà e ma zɛ̀ʼ Ngwe bo. 12Bɔ gimkpaʼ a shi kɔmɔ akuchim àmɔ̀ ndɛ̀ʼ ebe Ngwe, shi ela bli. Angɔ bɔ gimkpaʼ a shi nyim aghɛʼ, tsɛʼ gho deʼ e ma le ebwa ǹchwɔ̀ deʼ bo, ka gho deʼ ŋwàʼ nɔ. 13Aga angɔ na dìmi na gho ku efwɔ eshe kesoo nɔ, angɔ ka bo ga andɔɔ, enɛmɛrɛ angɔ me shwe ene aga ǹchù, ǹtsɔ̀ jwe ma dɔ̀ŋɔ aghoboklo angɔ. 14Apan mane aju aga ka bo gli aklo angɔ. 15Elo angɔ ba zamma é nyii gɛrɛ zhudu bɔ. 16Angɔ fɔɔ afwɔ, e tsɔŋɔ ebwa, e bwɛn afwɔ, e ti ebwa, bɔ sa zɔ ǹgoʼ. 17Angɔ ke né tsɔmɔ ene m̀bwarambwad nè bɔ bo. 18Angɔ de ke le ebum ene Ngwe bo, ka mpiʼ.” 19Enjitsɔ, ntsɔ be nɛ̀ɛ kpe, ka de mwɔ ebwa we wɛ etsɛrɛ ma ga ngɛ, e na ga ebe abɔ byɛ e mwɔ enji etsɛrɛ ngɛ, mbɔʼtye bɔ gimkpaʼ gwɔbɔ aklo àmɔ̀ gɛrɛ nɛɛ kpe Ngwe yà sɛʼ ese gimkpaʼ. 20Tsɛ̀ʼ gho deʼ ŋwaʼ ma yà me koʼro efàarà Ngwe mbɔʼnga à ma shi etsɛrɛ bo. Etsɛrɛ na kpede abɔ tyetye é nɛ̀ɛ kpe ntsɔ shi le abwa bɔɔbɔɔ.

Aŋu ntsɔ me né me koʼro efàarà Ngwe ngɛ

21Enjitsɔ, Ngwe shi tee aghɛʼnji yɛ e ma nɛ̀ɛ bɔ byɛ e me koʼro efàarà ngɔ ngɛ, aghɛʼ yɛ ne me le ebwa deʼ é fwɛʼ nè etsɛrɛ bo. Aŋwɛʼrɛ etsɛrɛ Mose mane angɔ byɛ bàmɛnɛkɔn Ngwe â ŋwɛʼrɛ ngɛ be tee aghɛʼnji yɛ. 22É me koʼro efàarà Ngwe ne nyɛrɛ zeʼe ene ebɛrɛtaa ene Yeso Kristo. Ngwe na le énde ebe bɔ gimkpaʼ byɛ e me le ebɛrɛ ene Kristo ngɛ. Tsɛ̀ʼ ekobo deʼ ene bɔ Juu mane ebɛbɔ bo. 23Enga bɔ gimkpaʼ shi le abwa bɔɔbɔɔ, enɛŋɛrɛkɛ Ngwe shi nyɛrɛ ebara angɔ. 24Bɛʼngɛ Ngwe na le bɔ e me koʼro efàarà ngɔ, nyɛ̀rɛ̀ zèʼe ene enarataa mɔ ne etɔ̧ɔrɔ nɔ, nyɛ̀rɛ̀ zèʼe achim Yeso Kristo wɛ à lɔɔ angɔ ngɛ. 25Ngwe à sàa Yeso kpe è zeʼe ku shi ewu ngɔ mwɔ na aghɛʼ yɛ e me né dzɛ̀d abwa bɔɔbɔɔ bɔ mala ntsɔ me le ebɛrɛ ene engɔ. Ngwe à le énde é tee kpe mbè we koʼro. Ngwe à ne klini etaa, na aŋu a ne ndɛʼ enyii ebe abɔ ngɔ byɛ a nyim ebwa ekyɛ mbèmbè ngɛ bo. 26Bɛʼngɛ enjitsɔ, Ngwe ya ge enyii akwa angɔ é tee kpe mbè we koʼro, gɛ̀rɛ̀ ga kpe mbè we nu bɔ gimkpaʼ byɛ e bɛrɛ ene Yeso ngɛ kpe e me koʼro efàarà ndze. 27Ntsɔ be né wu fɛfi ene ebwa deʼ? Gbaʼ, mbɔʼnga e ke me pwèere abɔ chi mbɔʼ abwa ǹchwɔ̀ deʼ ntsɔ me fwɛʼ bo, bɛʼngɛ na na aŋu ntsɔ me le ebɛrɛtaa ene Yeso Kristo ngɛ. 28Éngɛ nɔ, ntsɔ ne koʼro efàarà Ngwe enyɛrɛ zeʼe ene ebɛrɛtaa ene Kristo, ke mwɔ ene é shi etsɛrɛ bo. 29Ngwe tyetye ma Ngwe bɔ Juu? Engɔ gɛrɛ ke mwɔ Ngwe ebe ebɛbɔ bo? Ne éŋwaʼa kpe Ngwe gɛrɛ na Ngwe ebɛbɔ. 30Ngwe tye eŋwàʼ, à gɛrɛ tye ma aghɛʼ ŋwaʼ ebe engɔ é le gho deʼ wu koʼro efàarà ngɔ. Engɔ na nu bɔ e me koʼro efàarà mɔ tyetye mwɔ ene ebɛrɛtaa angɔ ene Yeso Kristo, ka e mwɔ ma bɔ Juu ka me ebɛbɔ. 31E mwɔ nɔ, ntsɔ dzɛd etsɛrɛ mbɔʼ ebɛrɛtaa bɔ? Keʼ! Ka mpiʼ, ankɔmɔ engɛ̂, ntsɔ shi etsɛrɛ.

Learn More About Aŋwɛʼrɛ Ebuumu Fe Nè Ngwe

Bɔ Rom 3

Popular Bible Verses from Bɔ Rom 3

Popular Bible Verses from
Bɔ Rom 3