Bɔ Rom 2

Aŋu Ngwe ma sɛ̀ʼɛ bɔ ngɛ

1Enyɛrɛ éngɛ, ka mwɔ ngwo wɛ, ngwo ke koʼro é sɛʼ gho deʼ bo, mbɔʼnga ngwo na de ma tsɛrɛ esɛʼ ato abɔ tsɛrɛ, ngwo na nyɛ̀ à bɛ̀ʼrɛ̀ ekwa ngwɛ mɔmbwo, enga ngwo wɛ ngwo ma sɛ̀ʼɛ bɔ ngɛ, wa fwɛʼ abwa ŋwaʼ yɛ abɔ byɛ ma fwɛʼ ngɛ. 2Ntsɔ bɔ gimkpaʼ be nɛɛ éŋwaʼa kpe Ngwe ye koʼro é sɛʼ abɔ byɛ e ma fwɛʼ abwa zɔnɔ ngɛ. 3Ngwo we zhuŋu kpe ayɛ? Ngwo wɛ ngwo ma sɛ̀ʼɛ abɔ tsɛrɛ gɛrɛ ma fwɛʼ abwa ŋwàʼ yɛ angɔ ma fwɛʼ ngɛ, ngwo we zhuŋu kpe ngwo wa ngo pɛ etsɛrɛ esɛʼ Ngwe ngà? Keʼ ngwo ke né pɛ bo. 4Mbɔn na sèrè abwa ǹchwɔ̀ yɛ Ngwe ma le akwa ndzɔn ngɛ, sèrè ekii ebwa mane eklinitaa ngɔ. Mbɔn ke nɛɛ kpe Ngwe ye ǹchwɔ̀ mbɔʼnga è ma ke kpe mbɔn kobo eleabwa bɔɔbɔɔ ndzɔn bo? 5Bɛʼngɛ, mbɔn shi kaama ńtara ntsɔn, ne me doʼo é kobo bo, éngɛ mbɔn na zhiiri enyii Ngwe efwɔ akwa ndzɔn anji yɛ Ngwe ma ngo tee eboo mɔ mane etsɛrɛ esɛʼ mɔ yɛ e me koʼro ngɛ. 6Ngwe yà nɛ̀rɛ̀ gho ŋwàʼaŋwàʼ nyɛ̀rɛ̀ zèʼe ene abwa yɛ engɔ à shi fwɛʼ ngɛ.#Psa 62:12; Prv 24:12. 7Abɔ ngɔ byɛ e ma fɔɔ embè é ma le ma ǹchwɔ̀ ngɛ, na bii kpe Ngwe ndɛʼ angɔɔ enɛŋɛrɛkɛ, eghɔ gɛrɛ le angɔ tsɔmɔ àkɔʼɔ bwɛn endzobo kengudu. Ngwe yà ndɛʼ etyê kemyɛ ebe m̀pèrè bɔ tsɔnɔ. 8Bɛʼngɛ abɔ ngɔ byɛ e ma kɔʼ tyetye ma akwa àmɔ̀, ne ma zhuru éŋwaʼa bo, ma doʼo zhuru ma andɔɔ ngɛ, Ngwe yà tee eboo mɔ ebe angɔ, ge enyii kamakam akwa angɔ. 9Ǹgoʼ kɛ́ mane ezɔŋɔrɔ yà mwɔ ebe gho ŋwàʼaŋwàʼ wɛ è ma le abwa bɔɔbɔɔ ngɛ. E yà dye ebe bɔ Juu gɛrɛ shi ngɔ̀ɔ ebe ebɛbɔ. 10Bɛʼngɛ enɛŋɛrɛkɛ, eghɔ mane m̀bwarambwad yà mwɔ ebe gho ŋwàʼaŋwàʼ wɛ è ma fwɛʼ abwa ǹchwɔ̀ ngɛ. E yà dye ebe bɔ Juu gɛrɛ shi ngɔ̀ɔ ebe ebɛbɔ. 11Enga Ngwe na sɛ̀ʼɛ bɔ gimkpaʼ ekoʼokoʼo. 12Gho deʼ wɛ è shi le ebwa bɔɔbɔɔ mbɔʼnga à ne me le etsɛrɛ Mose bo ngɛ, è wa ngo nyim ke è de ne me nɛ̀ɛ etsɛrɛ bo. E ba ngo sɛʼ angɔ ketsɛʼ etsɛrɛ, éngɛ angɔ gɛrɛ ba nyimi. Bɔ gimkpaʼ byɛ e gɛrɛ shi le abwa bɔɔbɔɔ, wɛ e gɛrɛ me nɛ̀ɛ etsɛrɛ ngɛ, angɔ gɛrɛ me nɛ̀ɛ ebwa wɛ Ngwe ma ga ngɛ, e gɛrɛ yà sɛʼ angɔ zeʼe achim etsɛrɛ 13Enga ke mwɔ bɔ byɛ e ma zo etsɛrɛ ngɛ a me koʼro efàarà Ngwe bo. Abɔ byɛ e ma fwɛʼ aŋu etsɛrɛ ma gà ngɛ, na angɔ byɛ e me koʼro efàarà Ngwe ngɛ. 14Ebɛbɔ byɛ â dye ne me ndɛʼ etsɛrɛ ebe angɔ bo, e ma fwɛʼ anchwɔnchwɔ me ebwa wɛ etsɛrɛ ma ke ngɛ, ka angɔ dye ma fwɛ̀ʼfwɛʼ ene egha àmɔ̀, e we tee kpe angɔ be nɛɛ ebwa wɛ e me koʼro é le mane engɔ wɛ e ne me koʼro é le bo ngɛ. Angɔ be nɛɛ engɛ̂, ka angɔ de ne me le etsɛrɛ bo. 15Eleabwa angɔ ye tee kpe Ngwe ye ŋwɛʼrɛ abwa yɛ etsɛrɛ ma ke ngɛ efwɔ ńtara angɔ, etaasɔn angɔ mɔmbwo gɛrɛ bɛ̀rɛ antsɛ. Ewunɔ ne èndzobo chɛ ezhuŋu angɔ ma tee ebe angɔ kpe ebwa wunɔ we koʼro kà e ke koʼro bo ngɛ. 16Éngɛ, nyɛ̀rɛ̀ zèʼe ene ekɔn ǹchwɔ̀ wɛ mmɛ ma sɛ̀ɛrɛ̀ ngɛ, anji tsɛrɛ esɛʼ, Ngwe, nyɛ̀rɛ̀ zèʼe achim Yeso Kristo, yà sɛʼ gho ŋwàʼaŋwàʼ ene abwa yɛ engɔ ma zhuŋu efwɔ m̀bɛ̀ʼ ngɛ.

Ebwa wɛ etsɛrɛ ma ga mbɔʼ bɔ Juu ngɛ

17Mala mbɔn ga kpe mbɔn na bɔ Juu, ma tsɔmɔ me ene etsɛrɛ, gɛ̀rɛ̀ ma fɛfi ene aghɛʼ yɛ mbɔn mwɔ nè Ngwe ngɛ, 18mbɔn kpe mbɔn be nɛɛ ebwa wɛ Ngwe ma ke ngɛ, gɛ̀rɛ̀ me nɛɛ ebwa wɛ e me nara efàarà Ngwe, mane engɔ wɛ e ne me nara bo ngɛ, mbɔʼnga mbɔn shi bɛɛrɛ etsɛrɛ. 19Mbɔn gɛrɛ me nɛ̀ɛ éŋwaʼa kpe mbɔn ba gbee abɔ byɛ e ne ma zɔ akwâ bo ngɛ, gɛ̀rɛ̀ ma pɛɛ ekɛʼ ebe angɔ byɛ ńtara angɔ bli efwɔ ǹklì ngɛ. 20Mbɔn gɛrɛ ga kpe mbɔn na abɔ byɛ e ma todo bɔ ke nɛɛ ebwa ngɛ, mbɔn ma tee abwa ebe adɔ̀kpara mbɔʼnga mbɔn be nɛɛ abwa gimkpaʼ yɛ etsɛrɛ ma ga ngɛ, nɛɛ éŋwaʼa wɛ mwɔ efwɔ etsɛrɛ ngɛ. 21Mbɔn byɛ mbɔn ma tɛ̀ʼ bɔ ngɛ, mbɔn ke ma tɛʼ angɔn mbɔn mbwo bo? Ngwo na ga kpe ejíi ka nara ngɛ, ngwo ke ma ji bo? 22Mbɔn byɛ mbɔn ma ga kpe bɔ ka andɔb le ngɛ, mbɔn ke ma le andɔb bo? Mbɔn byɛ mbɔn ma tɔrɔ ngwere bli ngɛ, mbɔn ke ma ji ela efwɔ ndɔrɔngwe bli chɛ bo? 23Mbɔn byɛ mbɔn ma fɛfi kpe mbɔn be bere etsɛrɛ Mose ebwo mbɔn ngɛ, mbɔn shi le bɔ sa tsɔʼɔ Ngwe mbɔʼnga mbɔn ke shi etsɛrɛ zɔnɔ bo. 24Ne ǹji yɛ e me ŋwɛʼrɛ efwɔ aŋwɛʼrɛ Ngwe kpe, #Aza 52:5.“Mbɔn bɔ Juu ba le ebɛbɔ e sa ga abwa bɔɔbɔɔ mbɔʼ Ngwe.” 25É ndee akwa ndzɔn e we nara, mala mbɔn ma shi etsɛrɛ, bɛʼngɛ mala mbɔn ne ma shi etsɛrɛ bo, shi ne tsɛʼ ǹji deʼ bo. 26Éngɛ mala gho ebɛbɔ wɛ e ne shi ndee engɔ bo ngɛ, ma shi etsɛrɛ, Ngwe ke ma ngo kede engɔ na gho wɛ e me ndee engɔ nɔ bo? 27É ga éŋwaʼa é ndɔn, ebɛbɔ byɛ e ne me ndee angɔ ene nyɛm ekwa bo ngɛ, byɛ e ma shi etsɛrɛ Ngwe ngɛ, ba ngo nyɛ̀ è bɛ̀ʼrɛ̀ angɔn mbɔn bɔ Juu byɛ e me ndee angɔn, mbɔn gɛrɛ me nɛɛ abwa akɛkɛ mbɔʼ etsɛrɛ Ngwe bɛʼngɛ shi ne ma shi bo ngɛ. 28Mbɔn nɛɛ kpe gho Juu éŋwaʼa ke mwɔ engɔ wɛ e ma zɔ tyetye ene ekwa ngɛ bo, éngɛ ga kpe mbɔʼnga a shi ndee engɔ ene nyɛm ekwa ngɛ bo. 29Keʼ, gho Juu éŋwaʼa ne engɔ wɛ mwɔ gho Juu efwɔ etaa mɔ ngɛ, éngɛ ga kpe etaa ngɔ fe koʼro nè Ngwe. É ndee ekwa gho éŋwaʼa ke me é ndee nyɛm ekwa bo, né ekobo etaa enyɛrɛ zeʼe ene azhwɛɛrɛ Ngwe ke mwɔ etsɛrɛ bo. M̀pè gho zɔnɔ na nu ebɔnɔ mɔ zeʼe ebe Ngwe ne mwɔ ebe bɔ bo.

Currently Selected:

Bɔ Rom 2: nbt

Highlight

Copy

Compare

Want to have your highlights saved across all your devices? Sign up or sign in

Learn More About Aŋwɛʼrɛ Ebuumu Fe Nè Ngwe

Bɔ Rom 2

Popular Bible Verses from Bɔ Rom 2

Popular Bible Verses from
Bɔ Rom 2