Pwede abwa 9

Amboo nùrù tan

1Éngɛ angere nùrù tan fee amɔ amboo, mmɛ zɔ etɔrɔta deʼ fyɛ a shi turu a chwâ zeʼe ezob ngɛ, e ndɛ̀ʼ atuuru enduʼu ebla ketsɛʼ engudu ebe etɔrɔta fyɛ. 2Etɔrɔta fyɛ fuʼ enduʼ ebla yɛ, m̀pè enjiʼ deʼ gli efwɔ ne enjiʼ angwa edzɔwu deʼ nɔ, enjiʼ wɛ le enchwe ne ma bla ene ǹchwɔ̀ bo. 3Ǹglibi gli efwɔ enjiʼ wɛ e tu zeʼe a chwâ, e ndɛʼ ekama ebe ǹglibi yɛ é tyɛ bɔ na anglamfoʼ nɔ. 4Â gbeʼre ato ǹglibi yɛ kpe e ka egɛ kà ezɔd tsɔŋɔ, bɛʼngɛ à ga ebe angɔ kpe e ge ebyɛ tye ekwa abɔ byɛ â ne me le anɛ̂ Ngwe ekɔshi amɔ bo ngɛ. 5Ngwe à ke ndɛʼ afwɔ ebe ǹglibi yɛ é zhudu abɔ Ngwe bɔnɔ bo, à tye é gbɛɛrɛ angɔ efwɔ ata tan. Ǹglibi yɛ nɔm gho, afwɔ yɛ twa na anglamfoʼ a nɔm nɔ. 6Efwɔ ata tan zɔnɔ, angɔ ba ngo bii ewu kpe e nu angɔɔ e ne zeʼe bo, angɔ ba ngo ké ku bɛʼngɛ ewu ya ngo dɔrɔ angɔ.

7Ǹglibi yɛ â ne mwɔ na m̀pwɔ̀ bèʼebɔ â me ndeere shi sa kɔʼ ebiri nɔ. Â ne tɛʼ ela deʼ ato angɔ na ǹtàm ara e me ndeere ene aklibi àfɔ̀n nɔ, afaara angɔ mwɔ na afaara bɔ nɔ. 8Nyɔrɔ angɔ mwɔ na nyɔrɔ ato aye nɔ, ashwɔ angɔ gɛrɛ mwɔ na angɔ ǹgɔmaŋwa nɔ. 9Nyɛbid angɔ me kooro ene ala deʼ na m̀foʼro e me ndeere ene atɔrɔ e ma ge ngɔɔ ebiri nɔ, eblaba angɔ sa le akwâ sa flaba kùmù na ekɛd goo m̀pwɔ̀rɔ̀ bèʼebɔ e sa ngɔɔ ebiri nɔ. 10Angɔ me le entsakɔ̀d mane afin na angɔ anglamfoʼ nɔ. Angɔ ma gli entsakɔ̀d amɔ ngɛ é gè eŋwan akwa bɔ ene ata tan. 11Angɔ be le m̀fɔ̀ amɔ wɛ è mwɔ angere wɛ ma kɔʼ ebla ketsɛʼ ngudu ngɛ. E na zɔʼrɔ engɔ atsoʼ hibru kpe Abadɔn, atsoʼ Grik e ma zɔʼrɔ kpe Apoliyɔn, ǹji me ga kpe, “ànyiimi.”

12Enyii mbèmbè ya de fɔɔ, anyii tsɛrɛ àfyee ya zeʼe me ngoʼo fɔɔ.

Angere fee amboo nùrù mfo

13Éngɛ angere nùrù mfo fee amboo mɔ, mmɛ zo etsoʼ deʼ gli zeʼe efwɔ ebɛɛ ǹdɔʼrɔ kwɛ̀ echud twɔrɔ adwe yɛ a me ndeere ene aklibi àfɔ̀n ngɛ, yɛ a me tama efàarà Ngwe ngɛ. 14Etsoʼ wɛ ga ebe angere nùrù mfo wɛ à me klini amboo ngɛ kpe, “Pweere engere kwɛ̀ byɛ Ngwe me gha ene nkuʼru eba engwa ebɔrɔndim Yufrɛds ngɛ.” 15Angere wɛ pweere engere kwɛ̀ byɛ Ngwe à me gha ngɛ. À shi ndeere é zhudu ǹtìmi bɔ ŋwaʼ efwɔ ǹtìmìri bɔ tɛd ene endzobo yɛ, efwɔ anji yɛ, efwɔ eta wɛ mane efwɔ anɔ̂m yɛ. 16Mmɛ zo nuru abɔ ebiri byɛ â me kwaʼ m̀pwɔ̀rɔ̀ ebiri ngɛ, a na bɔ ako tɔɔshin fyee. 17Efwɔ nklama mfu mmɛ zɔ m̀pwɔ̀rɔ̀ bèʼebɔ, abɔ â gɛrɛ me kwaʼa ngɛ me ge m̀foʼro e ma bɔ̀ ne éwu nɔ, ma dzodo na ala deʼ yɛ a ma zɔʼrɔ kpe safaya nɔ, me ŋlaŋara na agwɔ fan nɔ. Eto m̀pwɔ̀rɔ̀ chɛ â ne mwɔ ne eto ǹgɔmɔrɔaŋwa nɔ. Enjiʼ, éwu mane ala deʼ yɛ a me mwɔ ne egwɔ fan nɔ a na gli à zeʼe eklo angɔ. 18Ewu, enjiʼ, mane ala deʼ yɛ a me mwɔ ne egwɔ fan ngɛ, ma gli eklo m̀pwɔ̀rɔ̀ chɛ zhudu abɛɛ bɔ bi efwɔ ebɛɛ tɛd. 19Akama m̀pwɔ̀rɔ̀ bèʼebɔ chɛ â na zeʼe efwɔ aklo mane entsakɔ̀d angɔ. Entsakɔ̀d angɔ à ne mwɔ na jwere nɔ, entsakɔ̀d bɔnɔ me le eto, e ma gli eto byɛ é ndɛʼ ebyɛ ebe bɔ anyi.

20Etseʼre bɔ yɛ aŋwan zɔnɔ a ne zhudu bo ngɛ â ke kobo eleabwa bɔɔbɔɔ àmɔ̀ bo. Angɔ à ke saara é ghɔ ezhwɛɛrɛ bɔɔbɔɔ mane ngwere chɛ angɔ à me ndeere ene ebwo amɔ ene aklibi àfɔ̀n, aklibi asere, eklibi èkapɛ, kà awa ngɛ bo. Èngwere tsɔnɔ â ke ma zɔ akwa bo, ke ma zo ebwa bo gɛrɛ ne ma zhiri bo. 21Angɔ à ge de ke saara abwa bɔɔbɔɔ yɛ â ma le ngɛ bo. Éngɛ angɔ ne kobo eleabwa amɔ. Angɔ a ke saara é zhudu bɔ bo, ke saara é tɛrɛ ǹgbara bo, ne saara endese bo gɛrɛ ne saara ejii bo.

Currently Selected:

Pwede abwa 9: nbt

Highlight

Copy

Compare