Pwede abwa 8

Ŋwɔ ǹglɔ̀ fuʼ nuru anɛ̂ sàambyɛ

1Èndzobo chɛ Ŋwɔ Gho à fuʼu anɛ̂ nùrù sàambyɛ ngɛ, ezob ba tuuu ene endɛrɛ bi. 2Éngɛ mmɛ zɔ engere sàambyɛ byɛ a me tamma efàarà Ngwe ngɛ, e me ndɛʼ emboo ebe angɔ sàambyɛ.

3Angere tsɛrɛ wɛ à me bere akɔʼ twɔrɔ adwe yɛ a me ndeere ene aklibi àfɔ̀n ngɛ, zeʼe tam efàarà echud twɔrɔ adwe. Â ndɛʼ adwe tsɛrɛ akɛkɛ ebe engɔ é zhiiri ene atsaʼra bɔ Ngwe gimkpaʼ, é ndɛʼ etɔ̧ɔrɔ edɔm echud aklibi àfɔ̀n. Echud zɔnɔ à ne mwɔ efàarà atan m̀fɔ̀. 4Enjiʼ wɛ a ma gli ene adwe yɛ angere à me bere abwo mɔ ngɛ, a na ngɔ̀ɔ ekere afwɔbi mane atsaʼra yɛ angere a ma tsàʼrà mbɔʼ bɔ Ngwe ngɛ. Angere wɛ à ne tama efàarà Ngwe. 5Éngɛ angere wɛ nu akɔʼ twɔrɔ adwe yɛ, è chi éwu edɔm echud yɛ è ge efwɔ akɔʼ yɛ, è tam ndwa a chwâ anɔ. Ezob kumu, m̀bò sa bwe à ghɔbɔ, ese binni.

Emboo

6Éngɛ engere sàambyɛ byɛ â me bere emboo sàambyɛ ngɛ ndeere amɔ é fee emboo byɛ.

7Angere mbèmbè à fee amɔ, awa mane éwu wɛ à me blidi nè anɔm ngɛ à tu chwâ, chwâ gɛbbɛ ene aklo tɛd, eklo bi fe. Ezɔd gɛrɛ gɛ̀bbɛ̀ ene aklo tɛd, eklo bi fe mane afu egɛ ju gimkpaʼ.

8Éngɛ angere nùrù fyee fee amɔ amboo. Ala deʼ ne engwa egu ma bɛ̀rɛ éwu nɔ, turu efwɔ ebɔrɔndim, ebɔrɔndim yɛ gɛbbɛ ene ebɔʼ tɛd, àbi firi anɔm. 9Ela kɔʼɔ efwɔ ndim gimkpaʼ gɛbbɛ ene ǹtìmìri tɛd, ǹtìmi bi ku, èwùundim gɛbbɛ akyɛ tɛd, e tsɔŋɔ eklo bi.

10Angere nùrù tɛd ngɛ fee amɔ amboo, engwa etɔrɔta deʼ, e ma bɔ ne engwa ekɛʼ deʼ nɔ, turu zeʼe ezob edɔm eklo ndimiri bi wɛ a me gɛ̀bbɛ ene aklo tɛd ngɛ mane ene emumun ndim. 11Ekumu etɔrɔta fyɛ à na “Angwentsɔʼ.” Eklo bi ene aklo tɛd yɛ sa ngwè. Bɔ akɛkɛ ŋwɔ andim myɛ kudu mbɔʼnga à shi firi angwentsɔʼ.

12Éngɛ angere nùrù kwɛ̀ fee amɔ amboo, etaranchwe gɛbbɛ ene akyɛ tɛd, ala deʼ wuru èklo bi, eta gɛbbɛ ene akyɛ tɛd, ala deʼ wuru eklo ebi, ńtɔrɔta gɛbbɛ ene akyɛ tɛd, epɛ yɛ a ma le ngɛ gɛbbɛ ene aklo tɛd, ebi nyim. Eklo bi ene ela tɛd bɔnɔ kwaʼ di. Nchi gɛbbɛ amɔ ene akyɛ tɛd, eklo ŋwaʼ kwaʼ di. Ǹklì gɛbbɛ ene aklo tɛd, eklo ŋwaʼ di fɔɔ azê.

13Éngɛ mmɛ ghɛɛbɛ angu kɔʼ, zɔ adwaʼa deʼ ma furu ekere antsɛ ma tsɛɛ kpe, “Chaʼ ànkwɔ̀nɔ̀! Ànkwɔ̀nɔ̀! E yà me ngoʼo ebe abɔ byɛ e mwɔ edɔm chwâ zɔnɔ èndzobo chɛ engere abê ma mɛ̀ɛrɛ̀ fee âmɔ̀ emboo ngɛ, wɛ e ma ngo fee afwɔ mpiʼ ngɛ.”

Currently Selected:

Pwede abwa 8: nbt

Highlight

Copy

Compare