Pwede abwa 22
22
Andzɔ̀ʼ wɛ ma ndɛʼ etyê kengudu ngɛ
1Angere a tee andzɔ̀ʼ wɛ e ma ndɛʼ ndim etyê kengudu ngɛ ena, è ma bla na alakedeshi nɔ, ma kla zeʼe ene atan m̀fɔ̀ Ngwe mane ŋwɔ ǹglɔ̀. 2Ndim myɛ ma kla fɔɔ aghɛɛghɛɛ ǹjìkɛ̀ efwɔ antiri abɛ kɛ́. Ezɔd byɛ e ma ndɛʼ etyê kengudu ngɛ mwɔ ene ebɛɛ eji gimkpaʼ, ma kla akyɛ wum ǹchwɔ̀ fyee efwɔ anɔ̂m, ekyɛ ŋwaʼ efwɔ eta. È gɛrɛ ma glì afu ezɔd byɛ é glì bɔ anyi 3Ala deʼ yɛ Ngwe shi ndwaʼa ngɛ ke ma ngo mwɔ efwɔ antiri abɛ kɛ́ yɛ bo. Bɛʼngɛ atan m̀fɔ̀ Ngwe mane ŋwɔ ǹglɔ̀ ya ngo mwɔ aŋu, bɔ afwɛʼ ngɔ sa ghɔ engɔ. 4E ba ngo zɔ engɔ, engɔ gɛrɛ zɔ angɔ. E ba ngo ŋwɛ̀ʼrɛ̀ ekumu ngɔ ekɔshi angɔ. 5Ǹklì yà ne wu mwɔ bo, éngɛ me tsɛʼ ǹji deʼ ene anâm kà etaranchwe bo mbɔʼnga Masakɛ Ngwe ya ngo mwɔ ekɛʼ angɔ, angɔ sa klini abwa na m̀fɔ̀rɔ̀ nɔ ngɔɔ bwɛn ene endzobo kengudu.
Eyɔɔ zɔ aŋu Yeso ma zeʼe ngɛ
6Éngɛ angere gà ena kpe, “Abwa zɔnɔ mmɛ me ga engɛ̂ nɔ ye koʼro gɛ̀rɛ̀ mwɔ éŋwaʼa. Masakɛ Ngwe yɛ à saa azhwɛɛrɛ mɔ é kaama bàmɛnɛkɔn é sɛɛrɛ ekɔn ngɔ ngɛ, shi tɔm angere mɔ é zeʼe toʼro abwa yɛ a ma ngo glì afwɔ mpiʼ ngɛ ebe bɔ afwɛʼ mɔ” 7Yeso gâ kpe, “Mbɔn kɔʼɔ! Mmɛ a sa zamma zeʼ! M̀bɔ̀nɔ ye ebe egho wɛ ma zo ega wɛ e me ŋwɛʼrɛ efwɔ aŋwɛʼrɛ zɔnɔ yɛ a ma ngo gli enjitsɔ mane endzobo e ma ngo zeʼe ngɛ.”
8Mmɛ Eyɔɔ, mmɛ à zo gɛrɛ zɔ abwa zɔnɔ. Èndzobo chɛ mmɛ zo gɛ̀rɛ̀ zɔ abwa zɔnɔ ngɛ, mmɛ go a chwâ elo angere wɛ à tee abwa zɔnɔ ena ngɛ é ghɔ engɔ. 9Bɛʼngɛ angere wɛ gà ena kpe, “Ngà ke le éngɛ bo! Mmɛ na gho afwɛʼ na ngwo nɔ, mane bwɔngwa mbyɛ abê byɛ e mwɔ bèmpwɔnɔntɔm mane bɔ gimkpaʼ byɛ e ma shi abwa yɛ efwɔ aŋwɛʼrɛ zɔnɔ ngɛ. Ndɛʼ eghɔ tye ebe Ngwe!” 10Éngɛ angere wu ga ena kpe, “Ngà ke nɛŋɛ abwa yɛ efwɔ aŋwɛʼrɛ zɔnɔ yɛ a ma ngo gli ngɛ bo, mbɔʼnga endzobo shi tini. 11Shi bɔ byɛ e ma le abwa bɔɔbɔɔ ngɛ ngɔɔ embè é le, abɔ byɛ e ma le abwa mfiri ngɛ nɔ nè mfiri amɔ, abɔ ngɔ byɛ e gɛrɛ ma le abwa ǹchwɔ̀ yɛ a me koʼro efàarà Ngwe ngɛ ngɔɔ embè é le abwa yɛ a me koʼro ngɛ, abɔ byɛ e gɛrɛ me pɛ ngɛ nɔ me pɛ.”
12Yeso gâ kpe, “Mbɔn zhuru, afwɔ mpiʼ mmɛ wa zeʼe. Mmɛ wa ngo nɛ̀rɛ̀ gho ŋwàʼaŋwàʼ ene afwɛʼ yɛ engɔ shi fwɛʼ ngɛ. 13Mmɛ na Alfa mane Omega, eklada mane engudu, ǹtsembè mane koochim.
14Ǹchwɔ̀ na abɔ byɛ e shi so ǹdiri àmɔ̀ ngɛ, enga angɔ ba ngo me koʼro é nde enta ene azɔd etyê kengudu, gɛ̀rɛ̀ nyii efwɔ antiri abɛ pɛ me fɔɔ enduʼnkɛmɛ. 15À na ngo mwɔ ese ma boro, bàtɛrɛ ǹgbara, bàndese, bàzhudu abɔ, abɔ e ma ghɔ ngwere bli ngɛ mane bɔ gimkpaʼ byɛ e me doʼo gɛrɛ ma gà andɔɔ ngɛ.
16Na mmɛ Yeso à saa angere ngu endɔn mane ekɔn wunɔ ebe ndɔrɔngwe. Mmɛ na agha gɛ̀rɛ̀ mwɔ gho ekla m̀fɔ̀ Devid. Mmɛ na etɔrɔta nchwenchwe.”
17Azhwɛɛrɛ mane aye elô ga kpe, “Zeʼe” Mbɔn bɔ gimkpaʼ byɛ e ma zo ngɛ gɛrɛ ga kpe, “Zeʼe” Bɔ gimkpaʼ byɛ fi̧ri angɔ gɛrɛ ma fe ngɛ zeʼe è ŋwɔ andim myɛ è ma ndɛʼ etyê kengudu ngɛ.
Aga ngudu Eyɔɔ
18Mmɛ Eyɔɔ wa gbeʼre ato gho ŋwàʼaŋwàʼ wɛ ma zhuru ekɔn mbɔʼ abwa yɛ a ma gli enjitsɔ gɛ̀rɛ̀ ma ngo gli endzobo achim yɛ mmɛ shi ŋwɛʼrɛ efwɔ aŋwɛʼrɛ zɔnɔ ngɛ. Mala gho deʼ zhiiri ebwa deʼ anyi, shi Ngwe ya ngo zhiiri enyii yɛ e me toʼro efwɔ aŋwɛʼrɛ zɔnɔ ngɛ ekwa ngɔ. 19Mala gho deʼ chi ebwa deʼ efwɔ aŋwɛʼrɛ zɔnɔ mbɔʼ abwa yɛ a ma ngo gli ngɛ, shi Ngwe ya ngo chi êngɔ eklo ene enta azɔd etyê kengudu, gɛ̀rɛ̀ chi afwɔ ngɔ efwɔ antiri abɛ pɛ yɛ e me toʼro efwɔ aŋwɛʼrɛ zɔnɔ ngɛ.
20Egho wɛ ma bɛ̀rɛ antsɛ ene abwa zɔnɔ ngɛ ga kpe, “Éŋwaʼaŋwâʼ mmɛ wa zamma zèʼ!” Ekoʼro. Masakɛ Yeso zeʼ!
21Enarataa Masakɛ Yeso mwɔ nè bɔ Ngwe gimkpaʼ. Ekoʼro!
Currently Selected:
Pwede abwa 22: nbt
Highlight
Copy
Compare
Share
Want to have your highlights saved across all your devices? Sign up or sign in
© 2022, CABTAL
