Pwede abwa 17

Aye àndese wɛ bɔ â me nɛɛ engɔ ngɛ

1Éngɛ angere bi abwaʼ engere sàambyɛ byɛ â me le ńkuʼru sàambyɛ ngɛ zeʼe ga ena kpe, “Zeʼe mmɛ wa ngo tee engɛ̂ na aŋu e ma ngo ge enyii ekwa àndese wɛ â shi dye nɛɛ engɔ ngɛ, wɛ ma mwɔ efwɔ abɛ kɛ́ yɛ â me byɛ ebara ndimiri ngɛ. 2M̀fɔ̀rɔ̀ gimkpaʼ edɔm chwâ à nde ese nè engɔ. Éngɛ bɔ efwɔ ese a na ku mɔm na aŋu angɔ à ŋwɔ mɔm aye wunɔ ngɛ, klada sa nde ese nè engɔ.” 3Azhwɛɛrɛ Ngwe nu afwɔ efwɔ ekwa ngu, angere wɛ nu angu ngɔ̀ɔ akwânked. Aŋu mmɛ zɔ aye deʼ me tsɔmɔ edɔm nyɛm ǹgɛ̀ fàn deʼ yɛ â me ŋwɛʼrɛ akumu ene ekwa ngɔ gimkpaʼ ma ndwàʼ Ngwe. Nyɛm ǹgɛ̀ yɛ à ne le eto sàambyɛ mane ǹdwɔrɔ wum. 4Aye wɛ à ne ge ǹdi fàn, ekwa ngɔ ma nɛŋɛrɛ ene eku aklibi àfɔ̀n nè bwo atye naranara mane ela deʼ â ma zɔʼrɔ kpe èpɛɛl. Engɔ à ne bere ǹtoʼ deʼ abwo mɔ yɛ â me ndeere ene aklibi àfɔ̀n ngɛ. Ǹtoʼ yɛ à ne shwe ene ànkwɔ̀nɔ̀ ma tee abwa mfiri yɛ engɔ à shi le ngɛ. 5Â ne ŋwɛʼrɛ ekumu deʼ akɔshi ngɔ, ekumu wunɔ me le ǹji nɛŋɛ deʼ kpe, “Antiri abɛ kɛ́ Babilɔn, áʼɔ̧̀ ebe bàndese mane m̀pèrè abwa ḿfiri gimkpaʼ efwɔ ese.” 6Éngɛ mmɛ zɔ kpe aye wunɔ à ne ku mɔm ene anɔm bɔ Ngwe mane abɔ byɛ â zhudu angɔ mbɔʼnga â ma kìrì Yeso ngɛ.

Èndzobo chɛ mmɛ à zɔ aye wunɔ ngɛ mmɛ kɔ̂n ghɛʼ. 7Bɛʼngɛ angere wɛ gâ ena kpe, “Ngwo ne kɔ̂n kpe ayɛ? Mmɛ wa ngo tòʼrò ǹji enɛŋɛ aye wunɔ mane nyɛm ǹgɛ̀ yɛ à me beʼe engɔ me le eto sàambyɛ mane ǹdwɔrɔ wum ngɛ engɛ̂. 8Enyɛm ǹgɛ̀ yɛ ngwo à zɔ ngɛ, à ne dye mwɔ ekɔʼɔ bɛʼngɛ e ke bli ekɔʼɔ enjitsɔ bo. È ne gli efwɔ ebla ndzàm yɛ e ne me le engudu bo ngɛ. Ngwe gɛrɛ ma wu tsɔŋɔ engɔ. Abɔ byɛ e ma tsɔmɔ edɔm chwâ wɛ Ngwe à ne shi ŋwɛʼrɛ akumu angɔ efwɔ aŋwɛʼrɛ etyê dye e sa ndèerè ese ngɛ bo, angɔ ba ngo kɔ̂n èndzobo chɛ e ma zɔ enyɛm ǹgɛ̀ yɛ ngɛ, à ne dye mwɔ ekɔʼɔ shi ne bli ekɔʼɔ enjitsɔ bo ngɛ, bɛʼngɛ a wu mwɔ ekɔʼɔ. 9Ewunɔ na ngɔ̀ɔ ebe abɔ byɛ azɔm angɔ shi bere ngɛ. Eto nyɛm ǹgɛ̀ sàambyɛ byɛ ne tamma ene agu kparakpara sàambyɛ yɛ aye wunɔ me tsɔmɔ edɔm ngɛ. E gɛrɛ ne tamma ene m̀fɔ̀rɔ̀ sàambyɛ. 10M̀fɔ̀rɔ̀ tan abwaʼ m̀fɔ̀rɔ̀ sàambyɛ shi godo, eŋwàʼ wa bli à fwɛʼ enjitsɔ. Êwè ke shi zeʼe bo, bɛʼngɛ è wa de zeʼe, è wara ngo tsɔmɔ me ene antiri endzobo. 11Enyɛm ǹgɛ̀ yɛ à me dye mwɔ ekɔʼɔ bɛʼngɛ è ne me wu mwɔ ekɔʼɔ bo ngɛ na m̀fɔ̀ yɛ mwɔ nùrù fwɔ̧ɔ ngɛ. Ne m̀fɔ̀rɔ̀ tse sàambyɛ a me le engɔ, e gɛrɛ ma ngo zhudu engɔ. 12Ǹdwɔrɔ nyɛm ǹgɛ̀ wum chɛ ngwo à zɔ ngɛ na m̀fɔ̀rɔ̀ wum chɛ e ne shi nu atan bo ngɛ. Bɛʼngɛ e ba ngo nu afwɔ amɔ na m̀fɔ̀rɔ̀ mane nyɛm ǹgɛ̀ yɛ nɔ efwɔ antiri endzobo. 13M̀fɔ̀rɔ̀ wum tsɔnɔ mane nyɛm ngɛ yɛ be le ǹji ebwa amɔ eŋwàʼ, e gɛrɛ shi ndɛʼ afwɔ mane ekama àmɔ̀ ebe nyɛm ǹgɛ̀ é fwɛ̀ʼ. 14Angɔ ba ngo nyii ene ebiri nè ŋwɔ ǹglɔ̀, bɛʼngɛ ŋwɔ ǹglɔ̀ wa ngo ngwè fɔɔ angɔ mbɔʼnga engɔ na Masakɛ ebe èmasa abê, gɛ̀rɛ̀ mwɔ m̀fɔ̀ ebe m̀fɔ̀rɔ̀ tse. Engɔ wa ngo mwɔ nè abɔ byɛ Ngwe shi chidi gɛrɛ zɔʼ ngɛ, angɔ byɛ e ma fwɛʼ ebe engɔ ene ńtara amɔ gimkpaʼ ngɛ.” 15Éngɛ angere wɛ gâ ena kpe, “Ndimiri chɛ ngwo a zɔ aye àndese wɛ ma tsɔmɔ aŋu ngɛ, e ne tamma ene afwɔ ebaŋabɔ wɛ e mwɔ efwɔ ebɛ ne ebɛ ma ga atsoʼ m̀pèrempèrè ngɛ. 16Ǹdwɔrɔ wum chɛ mane nyɛm ǹgɛ̀ yɛ ngwo à zɔ ngɛ tsa ngo gwè aye àndese. E ba ngo bwɛ ela gimkpaʼ byɛ engɔ me le ngɛ sàa engɔ nè ekwa kɛɛ. E ba ngo nde nyɛm ekwa ngɔ gɛ̀rɛ̀ twɔ̀n etseʼre ekwa ngɔ ene éwu. 17Angɔ ba ngo le énde mbɔʼnga Ngwe à shi ge ezhuŋu mɔ efwɔ ńtara angɔ, ezhuŋu yɛ ma ngo le angɔ fwɛʼ abwa yɛ Ngwe me zhuŋu kpe angɔ fwɛʼ ngɛ. Angɔ ba ngo ma zo ega nyɛm ǹgɛ̀ yɛ bwɛn èndzobo chɛ ega Ngwe ma gli aŋu engɔ à shi shi ngɛ. 18Éngɛ aye wunɔ ngwo à zɔ ene nklama nchi fyɛ nɔ, è ne tama ene antiri abɛ kɛ̀ yɛ à klini m̀fɔ̀rɔ̀ efwɔ ese ngɛ.”

Currently Selected:

Pwede abwa 17: nbt

Highlight

Copy

Compare