Pwede abwa 16

Nkuʼru eboo Ngwe sàambyɛ

1Éngɛ mmɛ zo angwa etsoʼ deʼ ma gli à zeʼe efwɔ ndɔngwe kɛ̀ ma mɛ̀nɛ̀ ebe engere sàambyɛ kpe, “Ngɔɔ tu ńkuʼru ǹgoʼ sàambyɛ chɛ a me le eboo Ngwe kwaʼ ngɛ edɔm ese.”

2Angere mbèmbè ngɔɔ tù èmɔ enyii efwɔ ese, ebyɛ mane efiʼri gli akwa abɔ byɛ â me le anɛ̂ akwa àmɔ̀ é tee kpe angɔ ba ghɔ azhi enyɛm zɔnɔ ngɛ.

3Angere nùrù fyee tu èmɔ enyii efwɔ ebɔrɔndim. Ndim firi shi na anɔm gho ku nɔ. Ela gimkpaʼ byɛ â mwɔ efwɔ ndim ngɛ kudu.

4Angere nùrù tɛd tu èmɔ enyii efwɔ andzɔ̀ʼ mane bwo ndimiri, ndim firi shi ma anɔm. 5Mmɛ zo angere wɛ mwɔ ato ene ndim ngɛ ga kpe, “Etsɛrɛ esɛʼ yɛ ngwo me ndɛʼ ngɛ ye koʼo! Oh ngwo na gho wɛ ngwo me pɛ, ngwo wɛ ngwo mwɔ gɛrɛ shi dye mwɔ ngɛ! 6Mbɔn shi ndɛʼ anɔm ebe angɔ é ŋwɔ mbɔʼnga angɔ à zhudu bɔ kristo mane bàmɛnɛkɔn Ngwe. M̀pè ǹgoʼ zɔnɔ ye kɔʼɔ ebe angɔ.” 7Éngɛ mmɛ zo etsoʼ deʼ gli zeʼe efwɔ echud ga ega Ngwe kpe, “Ɔ̧̀ɔɔ! Oh Masakɛ Ngwe Angwanìm! Atsɛrɛ esɛʼ njɛ ye koʼro gɛ̀rɛ̀ mwɔ éŋwaʼa.”

8Angere nùrù kwɛ̀ tu èmɔ enyii edɔm enchwe. Â ndɛʼ ekama ebe enchwe é twɔ̀n bɔ ne éwu nɔ. 9Azhuʼ yɛ à ma gli à zeʼe efwɔ éwu ngɛ à sɔ̂ʼ angɔ. Angɔ à ke bɛrɛ é kobo abwa bɔɔbɔɔ amɔ efàarà Ngwe bo. Angɔ sa ndwàʼ Ngwe yɛ me le ekama edɔm ela bɔnɔ ngɛ gɛ̀rɛ̀ ne ndɛʼ eghɔ ebe engɔ bo.

10Angere nùrù tan tu èmɔ enyii edɔm atan m̀fɔ̀ yɛ nyɛm ǹgɛ̀ yɛ à gli efwɔ ebɔrɔndim a me tsɔmɔ edɔm ngɛ. Ebwa m̀fɔ̀ ngɔ kwaʼ di, bɔ ngɔ klada sa kwo ashwɔ amɔ mbɔʼ enyii yɛ angɔ à ma zɔ ngɛ. 11Angɔ sa ndwàʼ Ngwe ekere mbɔʼ enyii yɛ angɔ à ma zɔ mane ebyɛ byɛ a mwɔ akwa angɔ ngɛ. Angɔ tɔrɔ é bɛrɛ gɛrɛ kobo abwa bɔɔbɔɔ amɔ ene abwa yɛ angɔ à ma le ngɛ. 12Angere nùrù mfo tu èmɔ enyii efwɔ andzɔ̀ʼ kɛ̀ Yufrɛds. Andzɔ̀ʼ Yufrɛds nyɛ, é ndèe ǹjì ebe m̀fɔ̀rɔ̀ chɛ e ma nyɛ̀rɛ̀ zèʼe anji abɛɛ gli etaranchwe ngɛ. 13Éngɛ mmɛ zɔ ezhwɛɛrɛ bɔɔbɔɔ deʼ tɛd byɛ â mwɔ ne emumuʼ nɔ, aŋwaʼ ma gli à zeʼe efwɔ eklo ala deʼ yɛ à mwɔ na jwe nɔ, e ma zɔʼrɔ kpe dragɔn, àbi gli zeʼe eklo nyɛm ǹgɛ̀ mbèmbè yɛ à gli efwɔ ebɔrɔndim ngɛ, àbi gli zeʼe eklo bàmɛnɛkɔn andɔɔ. 14Angɔ ne ezhwɛɛrɛ bɔɔbɔɔ ma fwɛʼ anɛ̂ abwa akɛkɛ. Angɔ ba yɛ̀rɛ zhiri edɔm ese gimkpaʼ ma shùru m̀fɔ̀rɔ̀ ma ke é zeʼe é ngwè Angwanìm Ngwe anji tsɛrɛ esɛʼ. 15Mbɔn zhuru, mmɛ wa ngo zeʼe ne ejii nɔ, ene endzobo yɛ gho deʼ ne nɛɛ bo ngɛ! M̀bɔ̀nɔ ya ngo mwɔ ebe egho wɛ è ma ngo tsɔmɔ ekere gɛ̀rɛ̀ me klini ǹdi tsɛrɛ mbɔʼtye e ne sa zhiri nè ekwa kɛɛ sa jù é tam efàarà abɔ tsɛrɛ bo. 16Éngɛ ezhwɛɛrɛ bɔɔbɔɔ bɔnɔ bwɛ m̀fɔ̀rɔ̀ tsɔnɔ ngɔ̀ɔ afwɔ deʼ yɛ e ma zɔʼrɔ atsoʼ Hibru kpe Amagɛdɔn ngɛ.

17Angere nùrù sàambyɛ tu èmɔ enyii efwɔ efɔɔ. Ngwe gâ ene angwa etsoʼ deʼ nyɛrɛ zèʼ edɔm atan m̀fɔ̀ efwɔ ndɔngwe kɛ̀ kpe, “E shi gli.” 18Éngɛ m̀bò sa ghɔbɔ, m̀bò kumù, chwâ gɛrɛ sa njiʼi ekamakama. Nyɛrɛ èndzobo chɛ â ndeere bɔ efwɔ ese ngɛ, akwâ ke shi njiʼi enɔ bo! Â ne ndeʼe. 19Antiri abɛ kɛ́ Babilɔn gɛbbɛ ene entiri tɛd. Â tsɔŋɔ entiri ebɛ kɛkɛ byɛ â mwɔ efwɔ ebɛ gimkpaʼ efwɔ ese ngɛ. Éngɛ Ngwe zhuŋu abɛ kɛ bɔ Babilɔn è le abɔ byɛ â mwɔ efwɔ antiri abɛ yɛ ngɛ zɔ enyii, de sa ngo le angɔ ŋwɔ efwɔ ǹtoʼ eboo ngɔ. 20Eklabara ndim gimkpaʼ mane agu gimkpaʼ â sodo. 21Eklibi awà byɛ â ma diri na ekilò èsama fyee tɛʼ tan nɔ turu zeʼe ekere ato bɔ. Bɔ sa ndwaʼa Ngwe mbɔʼnga â ne ndeʼe.

Currently Selected:

Pwede abwa 16: nbt

Highlight

Copy

Compare