Pwede abwa 15

Engere sàambyɛ nè m̀pèrè ǹgoʼro sàambyɛ

1Éngɛ mmɛ wu zɔ anɛ̂ kɛ́ deʼ ezob yɛ a le mmɛ kɔn ngɛ, engere sàambyɛ nè ǹgoʼro kamakam sàambyɛ byɛ â me ngudu ngɛ. Â ne tee aŋu eboo Ngwe shi ngudu ngɛ.

2Éngɛ mmɛ zɔ ala deʼ ne ebɔrɔndim e me ndeere ene alakedeshi nɔ me blidi nè éwu nɔ. Mmɛ gɛrɛ wu zɔ abɔ byɛ â shi ngwe fɔɔ nyɛm twatwa mane azhi mɔ ngɛ mane nuru ekumu enyɛm mbèmbè ngɛ. Angɔ à ne tamma eba afwɔ yɛ â me mwɔ ne ebɔrɔndim yɛ e me ndeere ene alakedeshi nè emboo byɛ Ngwe à shi ndɛʼ ebe angɔ ngɛ. 3Angɔ à na kwɔrɔ etsa Mose gho afwɛʼ Ngwe mane etsa ŋwɔ ǹglɔ̀ kpe

“Angwanìm Masakɛ Ngwe, abwa yɛ ngwo ma fwɛʼ ngɛ ye tsa da dɛʼɛ, gɛrɛ me kɔrɔ ebe bɔ gimkpaʼ

M̀fɔ̀ ebe ebɛ gimkpaʼ. Ngwo na fwɛʼ abwa njɛ a me koʼro ene éŋwaʼa.

4Masakɛ awɛ ne me né bum awɛ bo?

Awɛ ne me né ndɛ̀ʼ eghɔ engɛ̂ bo?

Na ngwo gho zhiʼ me pɛ mɛ̀ɛrɛ̀.

Bɔ efwɔ ebɛ gimkpaʼ ba ngo zeʼ é ghɔ awɛ

enga aghɛʼnji yɛ ngwo ma le abwa a me koʼro ngɛ shi tee apɛpɛ.”

5Aŋu abɔ bɔnɔ â mɛɛrɛ kwɔrɔ etsa ngɛ, mmɛ kɔʼɔ è zɔ kpe à shi fuʼu ankpɛʼ wɛ a mwɔ efwɔ ndɔngwe kɛ ngɛ. 6Engere sàambyɛ byɛ â me bere ǹgoʼro sàambyɛ ngɛ glini zeʼe efwɔ ndɔngwe kɛ̀. Angɔ me ge ǹdiri chɛ e me pɛ ma nɛŋɛrɛ ngɛ, me koro enka ala à me ndeere ene aklibi àfɔ̀n ngɛ a nyɛbid àmɔ̀. 7Éngɛ ala ŋwaʼ bi abwaʼ ela kɔʼɔ kwɛ̀ byɛ ndɛʼ ńkuʼru aklibi àfɔ̀n sàambyɛ ebe engere sàambyɛ byɛ, byɛ â me shwe ene eboo kɛ Ngwe fyɛ e me tye ekyɛ ŋwaʼ ngɛ. 8Ndɔngwe kɛ̀ à ne shwe ene enjiʼ ma tee enɛŋɛrɛkɛ mane ekama Ngwe. Gho deʼ à ke ne nyii efwɔ etsam Ngwe bo bwɛrɛ èndzobo chɛ anyii sàambyɛ yɛ engere sàambyɛ â me bere â myɛ ngɛ.

Currently Selected:

Pwede abwa 15: nbt

Highlight

Copy

Compare