Pwede abwa 1

1Aŋwɛʼrɛ zɔnɔ na mbɔʼ abwa yɛ a ma ngo gli, yɛ Yeso Kristo à pwede ngɛ. Ngwe à ndɛʼ Mpwede ebwa zɔnɔ ebe engɔ mbɔʼtye è tee abwa yɛ a ma zamma gli, ka de mwɔ ebwa yɛ ngɛ ebe bɔ afwɛʼ mɔ. Yeso à pwede abwa zɔnɔ ebe gho afwɛʼ mɔ Eyɔɔ, aŋu à tɔm angere mɔ ebe Eyɔɔ ngɛ. 2Éngɛ Eyɔɔ shi gà abwa yɛ engɔ à zɔ ngɛ. Azɔnɔ na abwa yɛ Eyɔɔ à ga mbɔʼ aŋwɛʼrɛ yɛ â zeʼ ebe Ngwe ngɛ, mane abwa yɛ engɔ à zɔ Yeso fwɛʼ ngɛ. 3Ǹchwɔ̀ ne egho wɛ è ma zɔ̀ʼrɔ̀ ekɔn wunɔ ebe abɔ tsɛrɛ ene abwa yɛ a ma gli ngɛ. Ǹchwɔ̀ gɛrɛ mwɔ ebe egho wɛ è ma zo abwa mbɔʼ abwa a ma ngo gli ngɛ, mbɔʼnga èndzobo chɛ abwa zɔnɔ ma ngo gli ngɛ a shi mbín.

Atsaʼra ebe ndɔrɔ Ngwɛ sàambyɛ

4Aŋwɛʼrɛ zɔnɔ ne zeʼe ena Eyɔɔ, mmɛ me ŋwɛʼrɛ sàa ebe ndɔrɔngwe sàambyɛ efwɔ abɛɛ abɛ Esya.

Enarataa mane m̀bwarambwad mwɔ nè mbɔn nyɛ̀rɛ̀ zeʼe ebe Ngwe yɛ à mwɔ, yɛ è mwɔ, mà ngo zeʼe ngɛ. Enarataa mane m̀bwarambwad gɛrɛ mwɔ nè mbɔn nyɛ̀rɛ̀ zèʼe ebe ezhwɛɛrɛ sàambyɛ byɛ e mwɔ efàarà atan m̀fɔ̀ ngɔ ekere ngɛ, 5gɛrɛ me zeʼe ebe Yeso Kristo, engɔ wɛ à le ntsɔ nɛɛ éŋwaʼa mbɔʼ Ngwe ngɛ. Engɔ na gho mbèmbè wɛ â zhwɛɛmɛ engɔ ene ewu, è gɛrɛ mwɔ ato ebe m̀fɔ̀rɔ̀ gimkpaʼ efwɔ ese ngɛ. Engɔ we doʼo abɔ, shi pwèere abɔ chi efwɔ abwa bɔɔbɔɔ ene ewu yɛ à ku ene egha bɔ ngɛ. 6Nyɛrɛ zeʼe ene abwa zɔnɔ, engɔ shi le ntsɔ shi ǹtìmi ètɛ zhiri é fwɛʼ ebe Ngwe mɔ yɛ mwɔ àtɛ wɛ mwɔ ato ebe bɔ ngɛ. Enɛŋɛrɛkɛ mane ekama mwɔ ebe Yeso Kristo ene akyɛ nè akyɛ. Ekoʼro. 7Mbɔn kɔʼɔ, è we efwɔ m̀bɛ̀ʼ ma zeʼe! Gho ŋwàʼaŋwàʼ wa ngo zɔ engɔ ka de mwɔ abɔ byɛ â toʼo ebara ngɔ ene éŋwɔ ngɛ. Bɔ gimkpaʼ efwɔ ese ba ngo dè engɔ. E yà mwɔ éngɛ. Ekoʼro. 8Angwanìm Ngwe yɛ e me fɔɔ ngwere gimkpaʼ ngɛ ga kpe, “Mmɛ na ǹtsembè gɛ̀rɛ̀ mwɔ koochim.” Engɔ wɛ e mwɔ, engɔ wɛ à mwɔ, mane engɔ wɛ e ma ngo zeʼe ngɛ.

Eyɔɔ zɔ Kristo ene nklama nchi

9Mmɛ ne Eyɔɔ ghongwaanɔm ngɔn, na gho e ma kìrì Yeso Kristo ngɛ, ntsɔ ne mwɔ egimi aŋu ntsɔ ma klini ńtara bɔ ma kii ǹgoʼ yɛ è ma zeʼe ebe abɔ byɛ e mwɔ efwɔ ebwa m̀fɔ̀ Yeso Kristo ngɛ. Â ge angu efwɔ eklaba ndim Patmos mbɔʼnga mmɛ à sɛɛrɛ ega Ngwe, mane abwa yɛ mmɛ à zɔ mbɔʼ Yeso Kristo ngɛ. 10À na anji Masakɛ, azhwɛɛrɛ bere angu mmɛ zo go deʼ yɛ à mwɔ ne engwa amboo nɔ, e ma ga achim ndza. 11E go yɛ ga kpe, “Ngà ŋwɛʼrɛ abwa yɛ ngwo ma zɔ ngɛ a chwâ gɛ̀rɛ̀ sàa ebe ndɔrɔngwe efwɔ ebɛ sàambyɛ bɔnɔ, Efɛsɔs, Simayna, Pɛgamum, Tyatira, Sadis, Filadɛlfya mane Laodisya” 12Éngɛ mmɛ ghɛɛbɛ angu, é zɔ kpe awɛ ma gà ena, è zɔ achud tɛʼ anâm sàambyɛ yɛ â me ndeere ene aklibi àfɔ̀n ngɛ. 13Abwaʼ achud tɛʼɛ anâm yɛ, ala deʼ mwɔ na gho nɔ, è me shwee ǹdi yɛ à me kla bwɛn elo ngɛ, mane engwa bɛ̀rɛ̀ enka ǹdi wɛ â me ndeere ene aklibi àfɔ̀n ngɛ a nyɛbid mɔ. 14Nyɔrɔ ato ngɔ â na bla pɛɛm, ma nɛŋɛrɛ, aghɔɔ ngɔ ma bɔ̀ mwɔ ne enɛmɛ éwu nɔ. 15Elo ngɔ â ne mwɔ na atɔrɔ akapɛ a ma bɔ̀ edzɔwu nɔ, etsoʼ ngɔ mwɔ na ndim e ma chimmi ene ekob nɔ. 16Engɔ à ne klini ńtɔrɔta sàambyɛ abwo nde mɔ, ebye twatwa ebɛɛ fyee ma gli à zeʼe eklo ngɔ, efàarà ngɔ ma nɛŋɛrɛ ne etaranchwe aghɛɛghɛɛ nchi nɔ. 17Èndzobo chɛ mmɛ à zɔ engɔ ngɛ, mmɛ go elo ngɔ na gho ku nɔ. Éngɛ engɔ tɛʼ abwo nde mɔ ekwa ngu ga kpe, “Ka bum, mmɛ ne ǹtsembè gɛrɛ mwɔ koochim. 18Mmɛ na gho kɔʼɔ. Mmɛ à ne ku, bɛʼngɛ mmɛ we ekɔʼɔ ene akyɛ nè akyɛ. Na mmɛ a me klini ewu mane ene abɛ bɔ kudu. 19Éngɛ ŋwɛʼrɛ abwa yɛ ngwo ma zɔ enjitsɔ ngɛ, angɔ a mwɔ enjitsɔ mane angɔ a mwɔ endzobo achim ngɛ. 20Ebwa nɛŋɛ wɛ e mwɔ ene ńtɔrɔta sàambyɛ myɛ ngwo à zɔ eblabwo nde ndza mane achud tɛʼɛ anâm sàambyɛ yɛ e me ndeere ene aklibi àfɔ̀n ngɛ ne tee kpe ńtɔrɔta sàambyɛ myɛ na engere ndɔrɔngwe sàambyɛ chɛ, achud tɛʼɛ anâm sàambyɛ byɛ me tamma ene ndɔrɔngwe sàambyɛ.”

Currently Selected:

Pwede abwa 1: nbt

Highlight

Copy

Compare