Eleabwa 27

Paalo ngɔɔ efwɔ abɛ Rom

1Èndzobo chɛ â shi nu etsɛrɛ kpe mbyɛɛ ngɔɔ efwɔ abɛ Itali ngɛ, â ndɛʼ Paalo mane abɔ dzɔm tsɛrɛ fyee ebe gho deʼ wɛ ekumu ngɔ à mwɔ Juliyɔs ngɛ. Juliyɔs wunɔ à na ato ebe bɔ ebiri ekobi, byɛ â mwɔ efwɔ ǹtìmi Augustus ngɛ. 2Mbyɛɛ à nyii efwɔ àwùundim afwɔ deʼ yɛ â ma zɔʼrɔ kpe Adramityum, yɛ à ma ke ngɔɔ eba ebɔrɔndim efwɔ abɛɛ abɛ Esya ngɛ. Aristakyus wɛ à mwɔ gho Masedonya me zeʼe a Tesalonika ngɛ à ne mwɔ nè mbyɛɛ. 3À tam enchwe aŋu, mbyɛɛ bwɛn efwɔ abɛ Sidɔn. Juliyɔs à le ebwa ǹchwɔ̀ ekwa Paalo aŋu à sàa engɔ ngɔ̀ɔ zɔ asɔrɔ mɔ angɔ gɛrɛ ndɛʼ ela byɛ engɔ à ma ke ngɛ ebe engɔ. 4Mbyɛɛ à nyɛn aŋu sa zhiri me ene abɛɛ angli Sayprɔs yɛ efùu a me tsɛʼ aŋu bo ngɛ. 5Mbyɛɛ nyɛn efwɔ ebɛ Silisya mane Pamfilya kpɛ̀n ngɔ̀ɔ ebɔrɔndim bwɛn efwɔ Mira efwɔ abɛ Lisya. 6Aŋu gho kɛ̀ à zɔ àwùundim wɛ à ma zeʼe efwɔ abɛ Alɛkzandrya ma ngɔ̀ɔ efwɔ abɛ Itali ngɛ, engɔ ge angbɛɛ efwɔ.

7Ezhin à ne kɔrɔ, mbyɛɛ bɔŋɔ à zhiri efwɔ enji akɛkɛ efwɔ ndim, ngɔ̀ɔ bwɛn efwɔ abɛ Sinidus. Efùu a ke wu ndɛʼ afwɔ endyɛɛ é ngɔ̀ɔ embè ene aghɛʼ yɛ bo. Éngɛ mbyɛɛ ghɛɛbɛ sa klakla, ngɔɔ efwɔ afwɔ angli Kret, fɔɔ anji efwɔ abɛ Salmonɛ, yɛ â me shwèere amɔ ngɔɔ efwɔ ndim ngɛ. 8Mbyɛɛ à na zhiri me eba eji, e zɔ ǹgoʼ de shi ngɔ̀ɔ bwɛn ene afwɔ deʼ yɛ â ma zɔʼrɔ kpe afwɔ ǹchwɔ̀ é kuru, yɛ â me mwɔ ebara abɛ Laseya ngɛ.

9Mbyɛɛ à tsɔmɔ anɔ efwɔ endzobo dɔɔdɔɔ, aŋu abwa à kam ghɛʼ me tsɛʼ aghɛʼnji endyɛɛ é ngɔ̀ɔ embè ene eghɛb zɔnɔ bo ngɛ. Éngɛ anji é tsɔmɔ ene nchwɔrɔ ma tsàʼrà Ngwe kpe Ngwe dzɛrɛ abwa bɔɔbɔɔ bɔ ngɛ shi fɔɔ. Éngɛ Paalo ndɛʼ etɛʼɛ zɔnɔ ebe angɔ kpe 10“Bɔ mbu, mmɛ shi zɔ kpe eghɛb zɔnɔ ke ma ngo me nara bo. Eku mane àwùundim ba ngo bɔɔ, ka de mwɔ ntsɔ, ngadeʼ ntsɔ ba kudu.” 11Egho wɛ à mwɔ ato ebe eko bɔ ebiri ngɛ ge ato mɔ me ene ebwa wɛ àtiri àwùundim mane egho wɛ à me le àwùundim à ma ga ngɛ, shi ne ge ato mɔ ene ebwa wɛ Paalo à ma gà ngɛ bo. 12Na aŋu afwɔ yɛ àwùundim à me koʼro é tam à ne me nara bo mbɔʼnga a mwɔ endzobo ankìn ngɛ, bɔ akɛkɛ gâ kpe e ngɔɔ embè sa tama ene afwɔ deʼ yɛ â ma zɔʼrɔ kpe Fornikz ngɛ. Afwɔ zɔnɔ à ne efwɔ abɛ Kret ma kɔʼ abɛɛ abitin mane abɛɛ abekè.

Efùu kɛ́ efwɔ ebɔrɔndim

13Èndzobo chɛ efùu kpara à klada sa fùu à zeʼe anji abɛɛ abitin ngɛ, angɔ zɔ kpe mbɔɔ ba nyimi, angɔ chi ǹkɔ̀, e tiri àwùundim ngɔɔ efwɔ abɛ Kret. 14Afwɔ nɔ sa ndada nɔ, angwa efùu sa fùu à zeʼe anji abɛɛ gli etaranchwe. 15Efùu fɔnɔ à tiri àwùundim. Na aŋu aghɛʼ à me tsɛʼ é le kpe àwùundim ngɔɔ ene abɛɛ yɛ efùu à ma zeʼe ngɛ bo, mbyɛɛ saara kpe ebwa wɛ e ma doʼo é gli ngɛ e gli. 16Èndzobo chɛ mbyɛɛ à bwɛn efwɔ enkɔɔ abɛ deʼ yɛ â ma zɔʼrɔ kpe Kawuda ngɛ, mbyɛɛ shi le afwɔ ku̧ru deʼ aŋu. Mbyɛɛ à nde ǹgoʼ é le àwùundim wɛ tam. 17Â tiri àwùundim wunɔ ngɔ̀ɔ ewee eji è tyɛ ene anduʼ. Angɔ à na bumu kpe mbɔɔ ba tse ŋwɛrɛ efwɔ eblandim ewee ndim ebara ndim Libya ngɛ, e fudu ǹdiri chɛ efɔɔ ma fùu àwùundim anyi ngɛ, sàa àwùu kpe efùu me né beʼ, e beʼ. 18Efùu kɛ́ fɔnɔ à sa ngɔɔ embè embè. Éngɛ tam enchwe aŋu ngɛ, angɔ klada sa chidi eku deʼ efwɔ àwùundim ndwa efwɔ ndim é le kpe e zam. 19À sa bwɛn efwɔ enji tɛd, e gɛrɛ wu chidi aklo deʼ ene àwùundim sàa ewee eji. 20Mbyɛɛ à tsɔmɔ efwɔ enji akɛkɛ ne zɔ enchwe kà ńtɔrɔta bo. Efùu kɛ́ fyɛ à dà ma ngɔɔ embè embè. Mbyɛɛ ngudu zhuŋu kpe mbyɛɛ ke ma ngo nɔ àkɔʼɔ bo. 21Aŋu abɔ byɛ â mwɔ efwɔ àwùundim wunɔ â shi tsɔmɔ ene nchwɔrɔ efwɔ endzobo dɔɔdɔɔ ngɛ, Paalo tam efàarà angɔ gà kpe, “Abɔ bɔ, mala mbɔn à zhuru ena ne nyɛrɛ efwɔ abɛ Kret bo, shi mbɔn ke zɔ m̀pè ǹgoʼ zɔnɔ gɛ̀rɛ̀ nyim ela bɔnɔ bo. 22Bɛʼngɛ, enjitsɔ mbɔn klini ńtara ntsɔn. Tsɛ̀ʼ gho ŋwaʼ deʼ abwaʼ ndzɔn ma ngo ku bo. À tye ma àwùundim ma ngo nyim. 23Mmɛ na gà énde mbɔʼnga Ngwe yɛ mmɛ mwɔ egha ngɔ gɛrɛ ma ghɔ engɔ ngɛ, à tɔm angere ena ǹklì anji ntweʼe, 24gɛ̀rɛ̀ gà ena kpe ‘Paalo, ka bum ngwo wara ngɔɔ tam efàarà Kaasa. Ngwe, nyɛ̀rɛ̀ zèʼe ene ǹchwɔ̀ ngɔ, a shi le kpe engwo mane abɔ byɛ a mwɔ nè engwo ngɛ ka kudu.’ 25Éngɛ, abɔ bɔ, mbɔn klini etaa! Enga mmɛ we le ebɛrɛ ene Ngwe kpe e wa ngo gli nkirinkin aŋu à shi ga ena ngɛ. 26Bɛʼngɛ efùu fa ngo tiri abɔ e ngɔɔ saa ewee eji akwâ zɔm.”

27Efwɔ enji wum ǹchwɔ̀ kwɛ̀, mbyɛɛ bli efwɔ ebɔrɔndim Meditereniyan, aghɛɛghɛɛ ǹklì àtiri àwùu bwaʼ kpe mbyɛɛ a sa zamma bwɛn ewee eji. 28Â chu etye ene enduʼ è saa efwɔ eji e mò kpe ndim ne kla ngɔɔ a chwâ ene, e zɔ kpe na emɛta èsama fyee é bwɛn a chwâ, gɛ̀rɛ̀ tini ngɔɔ wu mo, e zɔ kpe e shi emɛta asamabi tɛʼ wum. 29Aŋu mbyɛɛ à ma bumu kpe àwùu wa ngo tim amɔ ene ekob ngɛ, mbyɛɛ saa ǹkɔ̀rɔ̀ kwɛ̀ a chwâ achim àwùu ma tsàʼrà Ngwe kpe akwâ pɛ̀. 30Àgòo àwùundim byɛ â na ke é dɔrɔ waʼ àwùu, e ngɔɔ zɛɛrɛ bwo àwùundim saa efwɔ ndim ma ndooro à ga kpe e ba ké ndèerè ǹkɔ̀ yɛ ma ngo klini àwùu ngɛ. 31Éngɛ Paalo gâ ebe gho kɛ́ mane abɔ ebiri byɛ kpe, “Mala àgòo àwùu bɔnɔ ne tye anɔ bo, shi ntsɔ ke ma ngo nɔ àkɔʼɔ bo.” 32Éngɛ abɔ ebiri byɛ tsɛddɛ anduʼ yɛ â me klini bwo akpe ngɛ, akpe klada sa ngɔɔ ngɔɔ.

33Aŋu ese à sa kèʼ ngɛ, Paalo bii angɔ kpe e nde ala deʼ, ma ga ebe angɔ kpe, “Efwɔ enji wum ǹchwɔ̀ kwɛ̀ mbɔn ke shi nde ala deʼ bo. 34Mmɛ buʼ ebwo endɔn, mbɔn nde mbɔʼtye mbɔn nɔ àkɔʼɔ. Nyɔ-ato ŋwaʼ ke ma ngo chaʼ ato ndzɔn bo.” 35Èndzobo chɛ engɔ à shi mɛ̀ɛrɛ ga abwa zɔnɔ ngɛ, è nu m̀bɔʼ akoʼ, ndɛʼ ebɛrɛ ebe Ngwe efàarà angɔ, bɔʼ klada sa nde. 36Ebwa wunɔ à twaʼra angɔ e gɛrɛ zeʼe nde âmɔ̀ ende. 37Mbyɛɛ bɔ gimkpaʼ a na bɔ ako fyee nè èsama tɛd tɛʼ wum ǹchwɔ̀ mfo efwɔ àwùundim. 38Èndzobo chɛ angɔ à shi nde zo ngɛ, e ndwa ǹkùru chɛ a mwɔ efwɔ ekpe ngɛ efwɔ eji, ekpe zam. 39Èndzobo chɛ ese à keʼ ngɛ, bàgòo àwùu byɛ zɔ kpe a sa zamma bwɛn ewee eji. Angɔ à ke me nɛɛ akwâ bo, angɔ kɔʼ zɔ afwɔ deʼ ńchiri à mwɔ aŋu. Angɔ tsɛrɛ àwùu gòo ngɔɔ aŋu. 40Angɔ à tsɛddɛ anduʼ yɛ â me koro ǹkɔ̀rɔ̀ anyi ngɛ, gɛ̀rɛ̀ zɛ̀ɛ angwa aparandi wɛ a ma klini àwùundim ngɛ mbɔʼtye efɔɔ ne wu beʼ àwùundim saa efwɔ eji bo. 41Éngɛ àwùundim kwo amɔ ene ńchiri è nɔ a chwâ aŋu. Ato àwùundim fla efwɔ ńchiri, awawa gɔbbɔ tsɔ̀ŋɔ̀ ela akɛkɛ efwɔ. 42Bɔ ebiri à ndeere àmɔ̀ é zhudu abɔ dzɔm byɛ â mwɔ efwɔ àwùu ngɛ mbɔʼtye angɔ ne turu efwɔ eji è dɔrɔ bo. 43Bɛʼngɛ gho kɛ̀ angɔ ga kpe angɔ ke éngɛ le, mbɔʼnga engɔ à ke me doʼo kpe Paalo ku bo. Engɔ gâ kpe abɔ byɛ e me né sò ndim ngɛ e kpɛn ngɔ̀ɔ kɔʼɔ angɔ ewee eji. 44Abɔ byɛ â me tye ngɛ â kpɛn edɔm ebɛɛ ezɔd kà ebɛɛ atɔrɔ byɛ â me bɔɔ ene àwùu ngɛ. Ene aghɛʼ zɔnɔ, angɔ bɔ gimkpaʼ gli àkɔʼɔ ngɔɔ a chwâ, gho deʼ ne ku bo.

Currently Selected:

Eleabwa 27: nbt

Highlight

Copy