Eleabwa 26

Paalo sɛʼ esɛʼ mɔ efàarà M̀fɔ̀ Agripa

1Agripa gâ ebe Paalo kpe, “Mmɛ ndɛʼ afwɔ engɛ̂ é ga ebwa ngwɛ.” Éngɛ Paalo beʼ abwo mɔ klada sa gà kpe 2“O! M̀fɔ̀ Agripa, ato ndza ye nɔmɔ, é tam efàarà njɛ é gii ega ene abwa yɛ bɔ Juu me ge enji ndza ngɛ. 3Mmɛ we nɛɛ kpe ngwo we nɛɛ eleabwa njɛɛ mbyɛɛ bɔ Juu gimkpaʼ mane angɔ yɛ mbyɛɛ ma fɛ̀ɛrɛ anyi ngɛ. Ngà klini etaa mfyɛ, tɛŋɛ zhuru ebwa mmɛ ma ke é gà ngɛ anchwɔnchwɔ. 4Bɔ Juu gimkpaʼ be nɛɛ anchwɔnchwɔ aŋu mmɛ à ma tɛ̀bɛ mwɔ adɔ̀kpara ngɛ. Angɔ be nɛɛ aŋu mmɛ à ma tsɔmɔ abɛ be ndza mane a Jerusalɛm ngɛ. 5Mala angɔ me doʼo é ga éŋwaʼa, shi angɔ ba gà engɛ̂ kpe mmɛ à ne egho bi abwaʼ bɔ Farisii byɛ â me shi etaa àmɔ̀ ene ebwa Ngwe anchwɔnchwɔ ngɛ. 6Enjitsɔ mmɛ ne tama ene esɛʼ mbɔʼ ezhuŋu kɔʼɔ ndza ene ebwa wɛ Ngwe à tɔ̧ɔrɔ ebe ètɛ sam bɔ ngɛ. 7Ne etɔ̧ɔrɔ yɛ akla wum ǹchwɔ̀ fyee bɔ ma ke é le aŋu angɔ ma ghɔ Ngwe ǹklì mane nchi ngɛ. M̀fɔ̀, ne enji yɛ bɔ Juu me ge abwa enji ndza ngɛ. 8Mbɔn shi na tɔrɔ kpe Ngwe ke ma zhwɛɛmɛ bɔ ene ewu bo ngɛ kpe ayɛ?

9Mmɛ à ne bɛrɛ kpe mmɛ we né le abwa gimkpaʼ é tsɔŋɔ ekumu Yeso gho Nazarɛd ngɛ. 10Ebwa mmɛ à le a Jerusalɛm ngɛ ne ga kpe, mmɛ à nu ekama ebe m̀fɔ̀rɔ̀ zhiri é bɛrɛ eto efwɔ ndɔngwe gɛ̀rɛ̀ ge bɔ Ngwe akɛkɛ a ndɔdzɔm. Mmɛ à gɛ̀rɛ̀ bɛ̀rɛ nè abɔ â ma ké zhudu angɔ ngɛ kpe e zhudu angɔ. 11Mmɛ à shi nyii angɔ akyɛ akɛkɛ efwɔ ndɔrɔ bɛɛrɛ abwa bɔ Juu kpe angɔ tɔn ebɛrɛtaa àmɔ̀ gɛ̀rɛ̀ ndwàʼ Ngwe. Etaa ndza à ne twa ene aghɛʼnji yɛ mmɛ à chi ekwa ngu é zhudu angɔ, ma zhiri à kiri angɔ ngɔɔ efwɔ ebɛ àgɔn.

Paalo gâ na aŋu engɔ à da le ebɛrɛ ene Yeso ngɛ

12Anji deʼ, mmɛ nyɛn ma kla ngɔ̀ɔ a Damaskɔs. M̀fɔ̀rɔ̀ zhiri â ne ndɛʼ ekama mane etsɛrɛ ena é bèddè angɔ. 13M̀fɔ̀, à sa bwɛn aghɛɛghɛɛ nchi nɔ, aŋu mmɛ à ma zhiri a njikɛ̀ ngɛ, ekɛʼ pɛ nyɛ̀rɛ̀ zèʼe ekere ma nɛŋɛrɛ à fɔɔ etaranchwe, pɛ ekwa ngu mane abɔ byɛ mmɛ à mwɔ nè angɔ ngɛ. 14Mbyɛɛ bɔ gimkpaʼ godo a chwâ. Mmɛ zo etsoʼ deʼ gà ena atsoʼ Aramayk kpe ‘Saalo! Saalo! Ngwo na nyìi angu kpe ayɛ? Ngwo na nyii awɛ bwaʼ kpe mbè na nyìi angu, na ashwê na de ma nde amɔ, a bwaʼ kpe mbè na nde etirindoʼ ngɛ.’ 15Mmɛ biiri kpe ‘Masakɛ, ngwo na awɛ?’ Masakɛ gíì kpe ‘Mmɛ na Yeso wɛ ngwo ma nyìi ngɛ. 16Enjitsɔ ngà tam ekere, mmɛ shi tee angu engɛ̂, è chì awɛ na gho afwɛʼ ngu gɛrɛ mwɔ antsɛ ngu nɔ. Ngwo wa ngo sɛ̀ɛrɛ̀ abwa yɛ ngwo shi zɔ ngɛ mane angɔ yɛ mmɛ ma bli é zeʼe é ga ngɛ ebe abɔ tsɛrɛ. 17Mmɛ wa ngo mwɔ nè ngwo, chi awɛ eblabwo bɔ mbyɛ mane ebɛbɔ. Mmɛ wa ngo sàa awɛ ebe ebɛbɔ. 18Ngwo wa ngo fuʼ aghɔɔ angɔ shi angɔ kobo eleabwa àmɔ̀, gli efwɔ ǹklì nyii efwɔ ekɛʼ, gɛ̀rɛ̀ waʼ abwa asatan, sa kìrì Ngwe. Éngɛ e ba dzɛ̀d abwa bɔɔbɔɔ angɔ, e le afwɔ abwaʼ bɔ Ngwe byɛ e me chidi é le angɔ pɛ nyɛ̀rɛ̀ zèʼe ene ebɛrɛtaa yɛ angɔ me le ene mmɛ ngɛ.’ ”

Paalo gà mbɔʼ afwɛʼ mɔ

19Paalo fɔɔ embè gâ kpe, “M̀fɔ̀ Agripa, éngɛ mmɛ à ke tɔrɔ é zo azhi ebwa zɔnɔ a nyɛn zeʼe ezob ngɛ bo. 20Mmɛ à klada é sɛ̀ɛrɛ̀ a Damaskɔs, nyɛ̀n ngɔɔ a Jerusalɛm, sɛ̀ɛrɛ̀ efwɔ ebɛ Judeya gimkpaʼ, gɛ̀rɛ̀ sɛ̀ɛrɛ̀ ebe ebɛbɔ kpe angɔ kobo eleabwa bɔɔbɔɔ àmɔ̀ e kiri Ngwe, eleabwa yɛ e ma tee kpe angɔ shi kobo ene abwa yɛ angɔ à ma le ngɛ. 21Ne ǹji yɛ bɔ Juu â bere angu efwɔ ndɔngwe kɛ̀ kpe mbɔɔ zhudu angu ngɛ. 22Bɛʼngɛ Ngwe à ne mwɔ nè mmɛ, è shi angu mmɛ nɔ ekɔʼɔ bwɛn ànchwɔ̀, é sɛɛrɛ abwa zɔnɔ ebe bɔ gimkpaʼ, e klada ene epɛdɛ bɔ ngɔ̀ɔ bwɛn ene bɔ kɛ́. Mmɛ ke ma tee ma abwa tsɛrɛ bo, mmɛ na sɛ̀ɛrɛ̀ ma abwa yɛ Mose mane bàmɛnɛkɔn â shi ga kpe a yà gli ngɛ. 23Angɔ à ga kpe Ǹtɔmzhwaʼa wara ngo zɔ ǹgoʼ, mwɔ gho mbèmbè é zhwɛm ene ewu, e nu ekɛʼ etyê zeʼe ebe bɔ Juu dye sa ngɔ̀ɔ ebe ebɛbɔ.”

24Aŋu Paalo à ma bli à ga ebwa mɔ ngɛ, Fɛstus tsɛrɛ ega ngɔ gà kpe, “Paalo, ala deʼ ye fɔɔ ato njɛ? Aŋwɛʼrɛ ngwo me nɛɛ ghɛʼ ngɛ ya le ambyɛ bere awɛ?” 25Bɛʼngɛ Paalo gíì kpe, “Gho kɛ̀, Fɛstus, ato ndza ke bɔɔ bo. Mmɛ na ga me éŋwaʼa. 26M̀fɔ̀ Agripa we nɛɛ abwa zɔnɔ gimkpaʼ. Mmɛ ga éŋwaʼa kpe engɔ we nɛɛ abwa zɔnɔ gimkpaʼ mbɔʼnga â ke ma gli adi̧iri bo. 27M̀fɔ̀ Agripa, ngwo we bɛrɛ ene abwa yɛ bàmɛnɛkɔn Ngwe ma ga ngɛ? Mmɛ we nɛɛ kpe ngwo we bɛrɛ.” 28M̀fɔ̀ Agripa gâ ebe Paalo kpe, “Ngwo we zhuŋu kpe ngwo we né nu ampiʼ endzobo é le mmɛ mwɔ gho kristo?” 29Paalo gíì kpe, “Ka mwɔ ampiʼ endzobo, kà endzobo dɔɔdɔɔ, atsaʼra ndza ebe Ngwe ne ga kpe, engwo mane bɔ gimkpaʼ byɛ e ma zhuru ena ànchwɔ̀ ngɛ, mwɔ na mmɛ mwɔ ngɛ shi tɔn dzɔmɔrɔ tsɔnɔ abwo ndza nɔ.” 30Éngɛ m̀fɔ̀, gobena mane Bɛɛnis tamma ekere nyɛnnɛ. 31Aŋu angɔ à nyɛn efwɔ ndɔ klada sa sɛ̀ɛrɛ̀ abwa ngɛ, e sa ga àmɔ̀ àmɔ̀ kpe, “Egho wunɔ ke shi le ebwa deʼ tyetye e zhudu engɔ kà e sàa engɔ a ndɔdzɔm bo.” 32Éngɛ Agripa gâ ebe Fɛstus kpe, “Â ne né sàarà engɔ mala â ne shi nu esɛʼ ngɔ̀ɔ ebe Kaasa bo.”

Currently Selected:

Eleabwa 26: nbt

Highlight

Copy