Eleabwa 28

Paalo efwɔ eklaba abɛ Malta

1Èndzobo chɛ mbyɛɛ à shi bwɛrɛ anchwɔnchwɔ ngɛ, mbyɛɛ zo e ma zɔʼrɔ afwɔ yɛ kpe Malta. 2Abɔ byɛ aŋu ngɛ tee ǹchwɔ̀ endyɛɛ. Aŋu m̀bò à klada sa ngwe efɔɔ gɛrɛ ma kwaʼ ngɛ, angɔ ge éwu kpe mbyɛɛ zhwa. 3Paalo à ne pɛdɛ èghɛʼ deʼ ma ge edzɔ. Jwe deʼ à ne mwɔ efwɔ awa mɔmbwo. Aŋu éwu à sa twɔ̀n ngɛ, jwe yɛ gli fudu amɔ abwo Paalo. 4Èndzobo chɛ abɔ bɔnɔ â zɔ jwe zɔnɔ ngɛ, angɔ sa ga àmɔ̀ àmɔ̀ kpe, “Egho wunɔ na angu ngɛ ma gho enɔgho, ka de mwɔ aŋu engɔ shi zhiri efwɔ ndim gli ngɛ, éŋwaʼa ke bɛrɛ kpe engɔ tye ekɔʼɔ bo.” 5Bɛʼngɛ Paalo à kuru jwe yɛ abwo mɔ sàa efwɔ edzɔ, ala deʼ gɛrɛ ne le engɔ bo. 6Abɔ byɛ â na ké zɔ kpe abwo Paalo mɔrɔ kà engɔ ku. Bɛʼngɛ angɔ à tsɔmɔ efwɔ endzobo dɔɔdɔɔ ebwa deʼ ne gli ekwa Paalo bo. Angɔ à kobo ezhuŋu àmɔ̀ ene Paalo sa gà kpe engɔ na Ngwe.

7Asɔmɔ deʼ â ne mwɔ ebara afwɔ zɔnɔ yɛ â mwɔ angɔ Publyus ngɛ. Publyus wunɔ à na m̀fɔ̀ efwɔ eklaba afwɔ zɔnɔ. Egho wunɔ à chɛdɛ angbɛɛ a ndɔ mɔ, mbyɛɛ tsɔmɔ aŋu efwɔ enji tɛd. 8Àtɛ Publyus à ne bwɛrɛ etan, ma gwɔn efɔɔ mane ànyɛrɛngɔ̀. Paalo ngɔɔ atwɔndɔ ngɔ gamma ebe àtɛ wɛ tsàʼrà Ngwe gɛrɛ tɛ̀ʼ ebwo mɔ ato ngɔ gli engɔ. 9Aŋu ebwa wunɔ à gli ngɛ, abɔ tsɛrɛ byɛ â ma gwɔn efwɔ eklaba afwɔ yɛ ngɛ zeʼ, è gɛ̀rɛ̀ gli angɔ. 10Abɔ byɛ â tɔ̧ɔrɔ angbɛɛ ene ela akɛkɛ. Aŋu mbyɛɛ à sa ké ngɔ̀ɔ ngɛ, angɔ ndɛʼ ela byɛ mbyɛɛ à ma ke é ngɔ̀ɔ nè angɔ ngɛ.

Paalo bwɛn a Rom

11Ata â fɔɔ atɛd, mbyɛɛ zhiri efwɔ àwùundim wɛ à me zeʼe efwɔ antiri abɛ Alɛkzandrya, e ma zɔʼrɔ àwùundim wɛ kpe, “Bwɔ Ngwere” byɛ akumu angɔ à mwɔ Kastɔɔ mane Polukz ngɛ. 12Mbyɛɛ à bwɛn a Sirakus, è tsɔmɔ aŋu efwɔ enji tɛd. 13Mbyɛɛ nyɛn aŋu ngɔɔ tsɔmɔ efwɔ antiri abɛ Regyum. Aŋu mbyɛɛ à tsɔmɔ aŋu efwɔ anji ŋwaʼ ngɛ, efùu deʼ klada sa fùu à zeʼe anji abɛɛ abitin. Enji sa fɔɔ èfyee mbyɛɛ bwɛn ene afwɔ deʼ â ma zɔʼrɔ kpe Putyoli ngɛ. 14Mbyɛɛ à zɔ bɔ kristo deʼ aŋu, e ga mbyɛɛ tsɔmɔ nè angɔ efwɔ enji sàambyɛ. Éngɛ mbyɛɛ nyɛn ngɔ̀ɔ a Rom. 15Èndzobo chɛ bɔ kristo à zo mbɔʼ mbyɛɛ ngɛ, bɔ nyɛn zeʼe efwɔ akwâ deʼ yɛ â ma zɔʼrɔ kpe Ewu Apiyus mane afwɔ tsɛrɛ yɛ â ma zɔʼrɔ kpe ndɔrɔ àgɔn tɛd ngɛ é kla angbɛɛ. Aŋu Paalo à zɔ angɔ ngɛ, è ndɛʼ ebɛrɛ ebe Ngwe gɛ̀rɛ̀ shi twaʼra amɔ. 16Èndzobo chɛ mbyɛɛ à bwɛn a Rom ngɛ, e saara Paalo kpe engɔ sa tsɔmɔ egha mɔ shi me ge gho ebiri ma kɔʼ engɔ.

Paalo a Rom

17Enji â fɔɔ tɛd Paalo zɔʼ eto ebe bɔ Juu afwɔbi. Èndzobo chɛ angɔ à sɔŋɔ ngɛ Paalo gâ ebe angɔ kpe, “Bwɔngwaanɔm mbu, â bere angu a Jerusalɛm ndɛʼ ebe bɔ Rom. Ka de mwɔ aŋu mmɛ à ne le ebwa bɔɔbɔɔ deʼ ekwa bɔ kà ene atsɛrɛ ètɛ sam bɔ bo ngɛ. 18Aŋu â sɛʼ angu ngɛ, bɔ Rom gâ kpe e pweere angu mbɔʼnga à ne tsɛʼ ǹji deʼ é zhudu angu bo. 19Bɛʼngɛ ambu bɔ byɛ â mwɔ bɔ Juu ngɛ à tɔn. Ne ǹji yɛ mmɛ nu etsɛrɛ kpe e nu esɛʼ ngu ngɔɔ ebe Kaasa ngɛ. Ke mwɔ mbɔʼnga mmɛ à me le ezhuŋu bɔɔbɔɔ deʼ mbɔʼ bɔ mbu bo. 20Ne ǹji yɛ mmɛ à biiri kpe mmɛ zɔ angɔn ngɛ. É ga éŋwaʼa, mmɛ na zɔ ǹgoʼ nè dzɔm abwo ndza nɔ mbɔʼ egho wɛ bɔ Israel me shi ezhuŋu kɔʼɔ àmɔ̀ ene engɔ ngɛ.” 21Angɔ gíì kpe, “E ke shi saa aŋwɛʼrɛ deʼ endyɛɛ zeʼe a Judeya mbɔʼ ngwo bo. Tsɛ̀ʼ ghongwaanɔm deʼ shi zeʼe a Judeya è ga ebwa bɔɔbɔɔ deʼ endyɛɛ mbɔʼ ngwo bo. 22Bɛʼngɛ mbyɛɛ be doʼo é zo ebwa wɛ ngwo me zhuŋu é ga ngɛ mbɔʼnga mbyɛɛ be nɛɛ kpe akwâ gimkpaʼ bɔ be doʼo é ga mbɔʼ ǹtìmi bɔ nɔ.”

Paalo sɛɛrɛ ega Ngwe a Rom

23Aŋu angɔ à shi tɔ̧ɔrɔ anji é sɔ̀ŋɔ̀ nè Paalo ngɛ, angɔ bɔ akɛkɛ ngɔɔ kla engɔ afwɔ yɛ engɔ à ma tsɔmɔ ngɛ. Enyɛrɛ enchwenchwe bwɛn etiʼdi, Paalo à sɛ̀ɛrɛ̀ gɛ̀rɛ̀ tòʼrò ǹjiri abwa ebe angɔ mbɔʼ ebwa m̀fɔ̀ Ngwe, gɛ̀rɛ̀ ma ké le angɔ bɛrɛ ene Yeso nyɛ̀rɛ̀ zèʼe ene atsɛrɛ Mose mane abwa yɛ bàmɛnɛkɔn Ngwe â ŋwɛʼrɛ mbɔʼ engɔ ngɛ. 24Abɔ deʼ â bɛrɛ ene ebwa wɛ engɔ à ga ngɛ, abɔ deʼ ne bɛrɛ bo. 25Éngɛ efɛɛrɛ à nyii abwaʼ angɔ. Aŋu angɔ à sa sàma ngɛ, Paalo gâ ebwa tsɛrɛ ŋwaʼ ebe angɔ kpe, “Azhwɛɛrɛ pɛ à ne koʼro é ga ebe ètɛ sam mbɔn nyɛ̀rɛ̀ zèʼe achim àmɛnɛkɔn Ngwe Azaya kpe 26‘Ngɔ̀ɔ ga ebe abɔ bɔnɔ kpe

mbɔn ba ngo zo gɛ̀rɛ̀ wu zo shi ne ǹji nɛɛ,

mbɔn ba ngo kede gɛ̀rɛ̀ wu kede shi ne ma zɔ bo.

27Enga abɔ bɔnɔ shi kaama ńtara àmɔ̀,

ètimi angɔ me koo é zo ebwa.

Angɔ gɛrɛ shi kubu aghɔɔ àmɔ̀

mbɔʼtye angɔ ne kɔʼɔ akwâ ene aghɔɔ àmɔ̀

gɛrɛ zo ebwa ene ètimi amɔ bo.

Angɔ gɛrɛ ke bɛrɛ é nɛɛ ǹji abwa efwɔ ńtara e

kobo eleabwa àmɔ̀ mbɔʼtye mmɛ kpede angɔ bo.’

28Mmɛ we ke kpe mbɔn nɛɛ kpe e shi saa ebwa Ngwe wɛ e ma pwèerè bɔ ngɛ ebe ebɛbɔ. Angɔ ba ngo zhuru.” 29#28:29 Aŋu Paalo à shi ga abwa zɔnɔ ngɛ, bɔ Juu â nyɛrɛ sa zhiri à zhwɔ̀ àmɔ̀ àmɔ̀. 30Paalo à tsɔmɔ aŋu efwɔ enɔ̂m fyee ma nɛ̀rɛ̀ ndɔ mɔ egha mɔ, gɛ̀rɛ̀ ma bwɛ abɔ byɛ â ma zeʼe ebe engɔ ngɛ. 31Paalo à na sɛ̀ɛrɛ̀ mbɔʼ ebwa m̀fɔ̀ Ngwe gɛrɛ ma tee abwa mbɔʼ Yeso Kristo ebe bɔ ene egere, ala deʼ ne ma kɔrɔ engɔ bo.

Currently Selected:

Eleabwa 28: nbt

Highlight

Copy