Eleabwa 25

Paalo ngɔɔ efàarà Kaasa

1Aŋu enji à fɔɔ ètɛd ngɛ Fɛstus bwɛn efwɔ abɛɛ abɛ, nyɛn a Kaysarya ngɔɔ a Jerusalɛm. 2Azɔnɔ na afwɔ yɛ m̀fɔ̀rɔ̀ zhiri mane eto ebe bɔ Juu â ma bwɛ asɛʼ àmɔ̀ ato Paalo à zeʼe ngɛ. Angɔ buʼ ebwo ebe Fɛstus 3kpe engɔ kpede angɔɔ nu Paalo ngɔɔ a Jerusalɛm, mbɔʼnga angɔ à shi ndeere é zhudu engɔ anji. 4Fɛstus gíì ebe angɔ kpe, “Paalo bli a ndɔdzɔm a Kaysarya, mmɛ mɔmbwo wa ngɔɔ aŋu afwɔ mpiʼ. 5Mbɔn saa eto mbɔn shi e ngɔɔ a Kaysarya nè mmɛ dù ga ebwa wɛ egho wunɔ me go ngɛ aŋu.”

6Fɛstus à tsɔmɔ nè angɔ efwɔ enji deʼ ne efwɔ̧ɔ kà wum nɔ de sa ngɔɔ a Kaysarya. Aŋu ese à keʼ ngɛ, engɔ ngɔɔ efwɔ ndɔ m̀pàrà tsɛrɛ asɛʼ gɛ̀rɛ̀ ga kpe e nu Paalo zeʼ. 7Èndzobo chɛ Paalo à bwɛn ngɛ, bɔ Juu byɛ â me zeʼe a Jerusalɛm ngɛ tamma kɛɛrɛ engɔ sò, klada sa gà abwa akɛkɛ mbɔʼ engɔ yɛ a ne me tee éŋwaʼa bo ngɛ. 8Bɛʼngɛ Paalo twaʼra amɔ gà kpe, “Mmɛ ke go ebwa deʼ ene atsɛrɛ bɔ Juu kà efwɔ ndɔngwe kɛ̀, kà efàarà Kaasa bo.” 9Bɛʼngɛ Fɛstus à na ke kpe bɔ Juu ma doʼo angbe, éngɛ engɔ biiri ebe Paalo kpe, “Ngwo we doʼo kpe mmɛ ngɔɔ sɛʼ awɛ a Jerusalɛm ene abwa zɔnɔ?” 10Paalo gíì kpe, “Mmɛ wa tama efwɔ ndɔ m̀pàrà, efàarà Kaasa wɛ è me koʼro é sɛʼ angu ngɛ. Mbɔn mbwo be nɛɛ anchwɔnchwɔ kpe mmɛ ke le ebwa bɔɔbɔɔ deʼ ekwa bɔ Juu bo. 11Mala mmɛ me go etsɛrɛ gɛ̀rɛ̀ me le ebwa deʼ wɛ é me koʼro é zhudu angu ngɛ, mbɔn shi mmɛ ku. Bɛʼngɛ mala éŋwaʼa deʼ me tsɛʼ ene abwa andɔɔ yɛ angɔ me ge enji ndza ngɛ bo, shi ne tsɛʼ gho deʼ me né ndɛʼ angu ebe angɔ bo. Mmɛ nu esɛʼ ngu ngɔɔ ebe Kaasa.” 12Èndzobo chɛ Fɛstus à shi ga achimchim nè bɔ mɔ ngɛ, è gii kpe, “Ngwo shi bii esɛʼ é ngɔ̀ɔ ebe Kaasa, éngɛ ngwo wa ngɔɔ.”

E nu Paalo ngɔɔ efàarà Agripa mane Bɛɛnis

13Endzobo deʼ à fɔɔ, m̀fɔ̀ Agripa mane Bɛɛnis zeʼ a Kaysarya é gamma ebe Fɛstus. 14Aŋu angɔ à shi tsɔmɔ aŋu efwɔ enji akɛkɛ ngɛ, Fɛstus toʼro ezɔɔrɔ Paalo ebe m̀fɔ̀ kpe, “Gho deʼ wa a ndɔdzɔm wɛ Fɛlikz à waʼ ngɛ. 15Èndzobo chɛ mmɛ à ngɔɔ a Jerusalɛm ngɛ, m̀fɔ̀rɔ̀ zhiri, bɔ Juu mane eto angɔ gâ abwa akɛkɛ mbɔʼ engɔ, ga ena kpe mmɛ nyɛ è bɛ̀ʼrɛ̀ engɔ. 16Bɛʼngɛ mmɛ à gii ebe angɔ kpe, ntsɔ bɔ Rom, ntsɔ ke le ezɔɔrɔ yɛ é ma nu gho deʼ ndɛʼ kpe é zhudu wɛ engɔ ne shi sɔŋɔ nè egho wɛ a me ge ebwa enji ngɔ gɛ̀rɛ̀ shi zo ebe engɔ ngɛ bo. 17Endzobo angɔ à zeʼe anɔ ngɛ, mmɛ à ke nyiimi endzobo bo, mmɛ à tam enchwe aŋu, zɔʼ ndɔ m̀pàrà, tsɔmɔ edɔm atan m̀fɔ̀ gà kpe e nu engɔ zeʼe. 18Bɔ m̀pɛ̀ʼ ngɔ â tamma, bɛʼngɛ â ke ga ebwa bɔɔbɔɔ deʼ ena mbɔʼ abwa yɛ mmɛ à ma zhuŋu kpe e ba ngo gà ngɛ bo. 19Abwa gimkpaʼ yɛ angɔ à me le ngɛ à tye me efɛɛrɛ nè engɔ mbɔʼ ebwa Ngwe àmɔ̀ mane mbɔʼ gho deʼ wɛ e ma zɔʼrɔ kpe Yeso wɛ à shi ku, bɛʼngɛ Paalo ma ga kpe engɔ bli ekɔʼɔ ngɛ. 20Mmɛ à ke shi nɛɛ aŋu mmɛ ma ngo wèe mbɔʼ abwa zɔnɔ ngɛ bo. Éngɛ mmɛ biiri ebe Paalo kpe engɔ we doʼo kpe e nu engɔ ngɔɔ sɛʼ edɔm abwa zɔnɔ a Jerusalɛm? 21Bɛʼngɛ Paalo gâ kpe e saa esɛʼ ngbe embè. E shi angbe enji ǹkɔʼ shi Kaasa tsɛrɛ esɛʼ ngbe. Éngɛ mmɛ tsɛrɛ kpe e shi engɔ enji ǹkɔʼ bwɛn èndzobo chɛ mmɛ ma ngo saa ngɔ ebe Kaasa ngɛ.” 22Agripa gâ ebe Fɛstus kpe, “Mmɛ we doʼo é zo ebe egho wunɔ mɔmbwo.” Fɛstus gíì ebe angɔ kpe, “Ngwo wa ngo zo engɔ enchwe.” 23E tam enchwe aŋu, Agripa mane Bɛɛnis zeʼ ene egere, bwɛn nyii efwɔ etsam abɛ mane eto ebe bɔ ebiri mane eto efwɔ abɛ. Fɛstus gâ kpe e nu Paalo zeʼe. 24Fɛstus gâ kpe, “M̀fɔ̀ Agripa mane bɔ gimkpaʼ byɛ e mwɔ anɔ nè mbyɛɛ ngɛ, mbɔn zɔ egho wunɔ wɛ bɔ Juu gimkpaʼ anɔ mane a Jerusalɛm shi zeʼe ga abwa ena mbɔʼ engɔ ngɛ. Angɔ flaba akwâ gà kpe, engɔ ke wu tsɔmɔ ekɔʼɔ ene endzobo dɔɔdɔɔ bo. 25Bɛʼngɛ mmɛ ke zɔ ebwa bɔɔbɔɔ deʼ wɛ e me tee kpe e zhudu engɔ ngɛ bo. Aŋu engɔ mɔmbwo à nu esɛʼ ngɔɔ ebe Kaasa ngɛ, mmɛ nu etsɛrɛ é sàa engɔ ebe Kaasa. 26Bɛʼngɛ mmɛ ke le ebwa kamakam deʼ é ŋwɛ̀ʼrɛ̀ mbɔʼ engɔ é sàa ebe Kaasa bo. Éngɛ mmɛ shi nu engɔ ngɔɔ efàarà m̀fɔ̀, ndanda efàarà njɛ m̀fɔ̀ Agripa, é le kpe mala ngwo shi wee ǹji ene esɛʼ ngɔ, mmɛ me nɛɛ ebwa deʼ é ŋwɛ̀ʼrɛ̀ anyi. 27E na mmɛ ke zɔ ǹji é sàa gho deʼ a dzɔm ebe Kaasa ne me nɛɛ ebwa é ŋwɛ̀ʼrɛ̀ enji ngɔ ngɛ bo.”

Currently Selected:

Eleabwa 25: nbt

Highlight

Copy