Ətefɨ̂aʼ 28

Ghɛ zɛ ə ze kyàyn sê Pɔ̂l endaʼ ə Maltàe

1Ə tè nyi kə ghàs pə̀yn fɨ etipì ə tsô ndɔ̀ʼɔ ghɛ zhîze kyayn sê wùə vîvè ə ghàs ə fètəyn, ə nyi ashìŋə̀ kɛ ə ghàs tè ke nə ndâʼlə̀ nə fɨnə mə ə fètə̂ tsò tè nyi Maltà. 2Ghɨ endaʼ ətəyn ghɛ ə ghàs tè kote ə tsâmtə̀ ghàs. Gholze ə zhə̀tə̀ se tso, fofke e kwɨlə ghàs, nyiəmə, ghənə ə fɛtə̂ èwus nə ghàs zɨte, nə̀ pə̀yn achûŋ sê ghàs. 3Pɔ̂l ə komtə̂ m̀sɛ kə m̀ kàʼa m̀ lwiyn gho vəynghe əpɛ̀, kə è kwà ndûə kàʼ mə təyn mè echi, mbam ə fɨə ətəyn kə wusve chûm zə̂ynzè, ə ndomə àgho ə vəynke ə ghaŋnə̂ faŋə. 4Kə ghɨ endaʼ nə ghɛ tè fe zhò ə̀təyn e ghaŋnə̂ ə Pɔ̂l agho, kyì e pîə se kyì nə, “Wùə vɨ̀nə nyîə zhwiə ə̀ghɨ. È və tə fɨ ke nâʼà ə tsô mə è paʼà kwu, pîza tsôsvè nə̀ za va vəyn nə è ndam.” 5Pîza Pɔ̂l ə sə̀ʼə̀ àgho ə vəynke, zhò ə̀təyn ə tânə̀ ewùs ndɔ̀ʼɔ è ndəmse vəyn nâʼà səkɔs. 6Ghənə tè lɨmtə nə wiyn ə vəyn mol, ə̀ va zâ, ə è pfɨ̀ŋə̀ pfɨ kwu. Ə mòtə̀ nâʼà sə aghaf pîza ə tàʼa fe kə ghɛ zhîze kyâyn sê vəyn. Ghənə ə ke kwiyne ekwâʼtè e ghənə̂zè, sè piə nə, “È kàʼa è və nyi kepî Fèzhə̀ fîfe!”

7Wùə èghaʼâ endaʼ nə zɛ ə ze tè nyi ə fètə̂ tsò tè kyi mfùʼ etipì ə enjwì ə fengwaŋve. Zə vəynze tè nyi Pupiyùs. È və fiə ghàs nâʼà àchûŋ ə pfɨtə̂ ghàs sə mtuʼ mta. 8Ə̀ tè nyi zâ, pɨ̀a Pupiyùs e nyɨŋ ekwì è wiyn ekasəve, fɨnə ndûə eluʼ. Pɔ̂l ə njiə ndùə əfètəyn ndɛ zɛ ə è tè nyìŋ ətəyn ə tsə̀mə̀ se vəyn, ə ndə̀mə̀ ə̀gho ə vəyn ə ewìyn, zaf ətəynze ə mìə. 9Ə̀ tè nyi kə ghɛ nə zɨ̂nə̀ mə kyàyn, nâʼà əghɨ zafəghe əkɨ̂m ghɛ ə ghe tè nyì fu endaʼ ə fɨə pə̂, Pɔ̂l ə tsuʼə kəpî ghənə. 10Ghɨ endaʼ nə ghɛ ə màʼtə̀ ghàs èfɨave ve tsɨ̂ə kə nyî. Ə pə̀ kə ghàs kyiŋə se ndò, ghənə ə ndə̀mə̀ efɨa èkɨ̂m vɛ ə ghàs tè kyiŋə ə ngwùʼ èghaʼâ kwəynə, kə ghàs ndùə kwîə ətəynze.

Ghə̀ Pɔ̂l ə ndò ə Maltà ə ndùə ə Lûm

11Ghàs tè ndam ə Maltà sə senjɔŋ seta ə piə ə ndô ndò ə njiə ə ngwùʼ èghaʼâ kwəynə mə è tè ndò ə Àlèksandilyà. Ə tè tɔŋtə̂ ngwùʼ èghaʼâ kwəynə ə̀təyn nə, “Epɨâʼsè ə Mzhə̀vè.” Ngwùʼ ə̀təyn ə pə̀ tyəmə̂ fu àshɨŋə̀ kɛ ə fofke nyi tsɛ̂sè, fof e tɛke e tsɛ̂. 12Ghàs ə kwìə ə pə̀ fɨə endaʼ ə Silakùszè. Ghàs tè ndamtə̂ fumə sə mtuʼ mta. 13Ə ndò fumə endaʼ ə ndùə pɨənə ə endaʼ eghaʼâzè e tɔŋtə̂ nə Lengòm. Tuʼve ə zo, fofke ə zhə̀tə̀ sè tsɛ̂, pə̂ èndomve apàs ə etyə̀ke. Ghàs ə kwìə sə mtuʼ ə m pɛ̀ ə pə̀ fɨə ə tɔ̂ŋ ə Pùtulì. 14Kə ghàs nji ndû fumə ə kotə ə̀ghɨə pomə fu, ghənə ə chyatə̂ nə ghâsè ghə̀ ghənə ndamte sə ngâm, ghàs ə ke tsɛ ndù ə Lûm. 15Ə̀ tè se nyi mə ghɨe poməghe ə Lûm ə zɨ nə ghàs pə̂ ndò, ə pə̀ se lɨmtə ghàs ə setɔ̂ŋ sə Ezhɔynə Apiyùsvè, yîghe e lɨmtə̂ kəpi ghàs elùʼ vɛ ə ghɨ e motə pə tè pə njiə ətəyn, e tɔŋtə̂ nə, Ndɛ sə ghɨ̀ ə Motə pə seta. Ə pə̀ kə Pɔ̂l fe ghənə, ə fo àzɔ̀ŋnè se Zhə̀fè ze ə nə̀ vəyn è və kyi ə̀təm ə tɛghe.

Pɔ̂l ə ndàʼà tom èchùŋ sê ghɨ Njûsə̀ ə Lûm

16Ə tè nyi kə ghàs pə̀yn tâyn endaʼ ə Lûmzè, ə zà Pɔ̂l nə è və ndamə kə nâʼà sə və ngɨŋ ə fo sokə̀ʼ nə è və tsɨ̂ŋnə̀ vəyn.

17Tuʼmè ə tsɛ̀ m̀ta, Pɔ̂l ə tɔŋɔ̂ àtsɨ̂ynte yighə̀ tu ə ghɨ̀ ə Njûs vɛ ə ve tè nyi ə Lûm. Kə ghənə ə pə̂yn, Pɔ̂l ə pìə sê ghənə nə, “Ghɔnyì ghɨm ghə Isìlâyghè, m tè paʼà nə̀yn pi zhîzè se ghɨ ghɨ̀nə̀, ə tàʼa nə pofsê eghɛ zhîze kûmə̀ ètsɨsə̂ endaʼ zɛ ə pɨ̀a ə ghâsènì ghəshiə tè zà sè ghâsènì. Pîza kə ghɨ ə ghasènìghe tè ko mi Njèlusalɛ̀m ə fo mi sê tu ə ghɨ̀ ə Lûmvè. Nyiəmə, ze tyə̂nə̀ nə m zo fa nyi kə wùə ndɛ ə̀chaʼ. 18Ghɨ saʼa nə ghɨ̂yn ə pfɨftə̂ ə̀ghɛ sê mi sè kyiŋə se zà mi kûmə̀ nə ghənə tè pâʼà fe nə mə ə nə̀yn ghɛze kə ə zhwi mi. 19Ə tè se nyi kə ghɨ Njûsə̀ kwiynse nə kə ə za mi, m kyi se pə̀ ə Lûm fayn nə Fɔ̀yn Kaysà zɨ ghɛze kûmə̀ saʼ zɨ̂mè nâʼà pì kə m tè kyi va ghɛ epi zhîze se pì kûmə̀ ə̀ghɨ ghɨmə nâʼà səkɔs. 20Ə̀ za nyi eghɛ zɛ m tɔŋə ghàyn nə ghâsènì kate ghɛghe. Se pì səmɔʼ, m kyiŋə nə ghàyn ke nə ə chaʼse nyi ə mì ekɔyn, ə ze ə nyi kûmə̀ wùə vɛ ə ghɨ Isìlâyghè tè nyi mə ndə̀m ə ghənə ətəm nə è tə pə̂.”

21Tu nə vɛ mə ə ke pì sè Pɔ̂l nə, “Ghàs pâʼà fe ŋwàʼlè kə è ndò ə Njòndyâ ə pə̀ sê ghàs kûmə̀ ghò. Nâʼàpî ə̀ghɔnyì ghàs ghɛ ə ghe ndô fu ə pə̀ fayn pâʼà pì ghɛ epi zhîze kûmə̀ ghò. 22Pîza, ghàs nyiə kyiŋə se zɨ ekwâʼtè zɛze kûmə̀ nə ghàs tsɛ̂ nâʼàpî ghayn, zɨə kə ghɨ wàmnə̀ ghɛ ghe tsɔ̂fə̀ va kûmə̀ èkyî anɔ̀yn kɨ̂nə̀ ə ò nyi ətəyn nyi.”

23Ghənə ə ndə̀mə̀ etuʼ se pə zɨtê se Pɔ̂l. Tuʼ ətəynve ə kwəynə, ghənə ə fɨə nâʼà setsɨ̀ ə pə̀ elùʼ vɛ ə Pɔ̂l tè ndamə ətəyn. È və pɨsə̂ zhə̀tə̀ se wàmnə̀ sê ghənə, ə nə̀ wàmnə̀ kə nyi ə ndùə tânə̀ ashìŋə̀ ezhwikwɨləke, ə fɛtə̂ tsâ paynsə̂ èghɛ zɛ ə è tè kyi se tsàyn sê ghənə kûmə̀ èfɔyn ə Fezhə̀vè. È və mɔ̀msə̀ se nə̀yn nə ghənə ke Njisə̀s. È və fɨnə pîə ə̀ghɛ ghɛ ə ghe fɨ ə ŋwàʼlè Àlâŋ zɛ ə Mosîs tè pə̀yn è zə̂yn è kɨ̂sè ə ŋwàʼlè ə̀ sèfɨ̀aʼtè kə ghənə pomə nə Njisə̀s nyi Klâys. 24Ghɨ yîghe ə pomə nə è piə kə nâʼà səmɔʼ, yîghe ə tàʼa pomə̂ nə ghɛ zɛ ə è tè pìə tè va səmɔʼ. 25Nyiəmə, ghənə ə zhə̀tə̀ se saʼnê əghɛ kə ghənə tè ndù. Tsɔ̀fə kə ghənə ndo, Pɔ̂l ə tsà sê ghənə nə, “Zuʼse Ŋwaʼase tè nyi ke nâʼà chichi kə se tè tsàyn ghɛghe se Fɨ̀aʼtè Èsayà nə è tsayn sê pɨ̀a ə ghâsènì ghəshiə nə, 26‹Nduə pì sê ghɨ ghɨyn nə,

ghàyn tə nə̂ ə zɨə, fɨnə zɨə,

pîza ə ghàyn ə zɨə kêva,

ə ghàyn ə naynə̂ tèluʼ, fɨnə naynə̂

pîza fe va nâʼà səkɔs.

27M piə nyiəmə kûmə̀ nə təm ə ghɨ nə ghɨ̂ynə mə nyîə tɛ,

mə ghənə ə fɨ̀yntè tûŋne ə ghənə̂vè,

ə fɨnə kɨmtə̂ ə̀shi.

Ə zə fe va nyiəmə, mə shi ə ghənə̂ghè fe ndò,

mə tûŋne ə ghənə̂vè zɨə ndò, təm ə ghənə̂ghè e zɨə kê

kə ghənə kɛse pəyn sê Mi,

ə M tsuʼ ghənə.›”

28-29Pɔ̂l tè wàmne ə piə è mɨ̂sə̀ ndò ə piə nə, “Ghàyn e ke nə, tom èsɔza zɛ ə Zhə̀fè tom, È və tom zə̂ynzè zôyn se ghɨ etumə, mə ghənə nə̀ zɨtə̂ zə̂ynzè. #28.28-29 Ŋwàʼlè sə shîse nyi mə sə paʼsê 29: Kə Pɔ̂l tè pi zɨnə̀, ghɨə Njûs ghɛ ə ghe tè nyì fu, ə ndò saʼnə̂ nduə ə ghənə ə sengɨŋ nâʼà sə atyaʼ.

30Pɔ̂l ə ndamə fu sə sepìŋ sèpɛ̀, ndaʼà zə vəyn nə ndɛ. È tè fiə nâʼà pî ndè vɛ ə è pə̀yn se môtə̀ vəyn è saŋnêzè.

31È tè ndàʼa tom ə̀ Fèzhə̀ kûmə̀ èfɔ̀yn ə Fezhə̀vè, zaʼlə̂ ə̀ghɨ kûmə̀ Pɛ̂pɛ Njisə̀s Klâys mə è ndə̀ʼə̀ fànə̀ va, wùə vîvè ə tàʼa mɔ̀msè se tàsə vəyn nə kə è wamne.”

Currently Selected:

Ətefɨ̂aʼ 28: bfm

Highlight

Compare

Copy